ದಾವಣಗೆರೆ: ಶುಕ್ರವಾರ 1111 ಜನರು ಡಿಸ್ಚಾರ್ಜ್; 225 ಸೋಂಕು ಪತ್ತೆ

ದಾವಣಗೆರೆ: ಜಿಲ್ಲೆಯಲ್ಲಿ ಶುಕ್ರವಾರ 225 ಜನರಲ್ಲಿ ಹೊಸದಾಗಿ ಕೋವಿಡ್ ಸೋಂಕು ಪತ್ತೆಯಾಗಿದೆ. ಸೋಂಕಿತರ ಸಂಖ್ಯೆಗಿಂತಲೂ ಬಿಡುಗಡೆಯಾದವರ ಸಂಖ್ಯೆ ಯೇ ಹೆಚ್ಚಾಗಿರುವುದು ವಿಶೇಷ. ಒಂದೇ ದಿನ ದಾಖಲೆ ಪ್ರಮಾಣದಲ್ಲಿ 1111 ಜನರು ಡಿಸ್ಚಾರ್ಜ್ ಆಗಿದ್ದಾರೆ.

ಕೊರೊನಾ ಜೊತೆಗೆ ತೀವ್ರ ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದ ಹೊನ್ನಾಳಿ ತಾಲೂಕಿನ ಕುಂಬಳೂರು ಗ್ರಾಮದ 77 ವರ್ಷದ ವೃದ್ಧೆ (ರೋಗಿ ನಂಬರ್ 609874) ಮೃತಪಟ್ಟವರು.

ಈವರೆಗೆ ಜಿಲ್ಲೆಯಲ್ಲಿ ಕೊರೊನಾದಿಂದ 242 ಜನರು ಮೃತಪಟ್ಟಿದ್ದಾರೆ. ದಾವಣಗೆರೆ ನಗರ ಮತ್ತು ಇತರೆ ಭಾಗದ 92, ಹರಿಹರದ 54, ಜಗಳೂರಿನ 11, ಚನ್ನಗಿರಿಯ 29, ಹೊನ್ನಾಳಿಯ 36 ಮತ್ತು ಹೊರ ಜಿಲ್ಲೆಯ ಮೂವರು ಒಳಗೊಂಡಂತೆ 225 ಜನರಲ್ಲಿ ಸೋಂಕು ಪತ್ತೆಯಾಗಿದೆ.

ದಾವಣಗೆರೆ ನಗರ ಮತ್ತು ತಾಲೂಕಿನ ಇತರೆ ಭಾಗದ 643, ಹರಿಹರದ 168, ಜಗಳೂರಿನ 69, ಚನ್ನಗಿರಿಯ 115, ಹೊನ್ನಾಳಿಯ 104 ಹಾಗೂ ಹೊರ ಜಿಲ್ಲೆಯ 12 ಜನರು ಸೇರಿ 1111 ಜನರು ಡಿಸ್ಚಾರ್ಜ್ ಆಗಿದ್ದಾರೆ. ಜಿಲ್ಲೆಯಲ್ಲಿ ಒಟ್ಟು16466 ಪ್ರಕರಣಗಳಲ್ಲಿ ಈವರೆಗೆ 14564 ಜನರು ಬಿಡುಗಡೆ ಆಗಿದ್ದಾರೆ. 1660 ಸಕ್ರಿಯ ಪ್ರಕರಣಗಳಿವೆ.