ಆಗ್ರಾ: 26 ವರ್ಷದ ಡ್ಯಾನ್ಸರ್ ಒಬ್ಬಾಕೆಯನ್ನು ಫ್ಲಾಟ್‌ನಲ್ಲಿ ಮೂರು ದಿನಗಳ ಕಾಲ ಒತ್ತೆಯಾಳಾಗಿ ಇಟ್ಟುಕೊಂಡು ಇವೆಂಟ್ ಮ್ಯಾನೇಜರ್ ಒಬ್ಬ ಅತ್ಯಾಚಾರ ಎಸಗಿದ್ದಾನೆ ಎಂದು ಪೊಲೀಸರು ರವಿವಾರ(ಅ13) ತಿಳಿಸಿದ್ದಾರೆ.
ಆರೋಪಿಯನ್ನು ವಿನಯ್ ಗುಪ್ತಾ ಎಂದು ಗುರುತಿಸಲಾಗಿದೆ. ಡ್ಯಾನ್ಸರ್ ಆಗಿ ಕೆಲಸ ಮಾಡುವ ಉತ್ತರ ಪ್ರದೇಶದ ಗಾಜಿಯಾಬಾದ್ ಮೂಲದ ಸಂತ್ರಸ್ತೆಯನ್ನು ಆಗ್ರಾದಲ್ಲಿ ನಡೆದ ಕಾರ್ಯಕ್ರಮಕ್ಕಾಗಿ ಸಂಪರ್ಕಿಸಿದ್ದ. ಅಕ್ಟೋಬರ್ 8 ರಂದು, ಗುಪ್ತಾ ತನ್ನ ನಿವಾಸಕ್ಕೆ ಕರೆದೊಯ್ದು ಅಲ್ಲಿ ಆತನ ಪತ್ನಿ ನಿದ್ರೆ ಮಾತ್ರೆ ಹಾಕಿದ್ದ ಚಹಾ ನೀಡಿದ್ದು ನಂತರ ಡ್ಯಾನ್ಸರ್ ಪ್ರಜ್ಞಾಹೀನಳಾಗಿದ್ದಳು. ಆಕೆ ಎಚ್ಚರಗೊಂಡಾಗ ಅವಳು ಕೋಣೆಯೋಧರಲ್ಲಿ ಇದ್ದಳು ಎಂದು ದೂರು ದಾಖಲಿಸಿರುವುದಾಗಿ ” ಪೊಲೀಸರು ತಿಳಿಸಿದ್ದಾರೆ.
ಗುಪ್ತಾ ತನ್ನನ್ನು ಮೂರು ದಿನಗಳ ಕಾಲ ಒತ್ತೆಯಾಳಾಗಿ ಇಟ್ಟುಕೊಂಡು ಅತ್ಯಾಚಾರ ಎಸಗಿದ್ದಾನೆ. ಹೆಚ್ಚಿನ ಹಣ ಸಂಪಾದಿಸಲು ವೇಶ್ಯೆಯಾಗುವಂತೆ ಒತ್ತಾಯಿಸಿದ್ದ, ಮಾತ್ರವಲ್ಲದೆ ಇತರ ಮಹಿಳೆಯರನ್ನೂ ವೇಶ್ಯಾವಾಟಿಕೆಗೆ ಬಲವಂತಪಡಿಸಿದ್ದಾನೆ ಎಂದು ಆಕೆ ಆರೋಪಿಸಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
“ಸಂತ್ರಸ್ತ ಮಹಿಳೆ ಹೇಗೋ ಗುಪ್ತಾ ಅವರ ಮನೆಯಿಂದ ತಪ್ಪಿಸಿಕೊಂಡು ತಾಜ್‌ಗಂಜ್ ಪೊಲೀಸ್ ಠಾಣೆಗೆ ಬಂದು ಶುಕ್ರವಾರ ದೂರು ದಾಖಲಿಸಿದ್ದಾರೆ” ಎಂದು ಆಗ್ರಾದ ಸಹಾಯಕ ಪೊಲೀಸ್ ಆಯುಕ್ತ (ತಾಜ್ ಸುರಕ್ಷಾ ಮತ್ತು ಸಂಚಾರ) ಸೈಯದ್ ಅರೀಬ್ ಅಹ್ಮದ್ ಪಿಟಿಐಗೆ ತಿಳಿಸಿದ್ದಾರೆ.
ದೂರಿನ ಆಧಾರದ ಮೇಲೆ ಎಫ್‌ಐಆರ್ ದಾಖಲಿಸಿ ವಿನಯ್ ಗುಪ್ತಾ ಮತ್ತು ಆತನ ಪತ್ನಿಯನ್ನು ಶನಿವಾರ ಬಂಧಿಸಲಾಗಿದೆ. ಈ ಬಗ್ಗೆ ಹೆಚ್ಚಿನ ತನಿಖೆ ನಡೆಯುತ್ತಿದೆ ಎಂದು ಅಹ್ಮದ್ ಹೇಳಿದರು.
