Dallas Open ಟೆನಿಸ್‌ : ಟಾಮಿ ಪೌಲ್‌ ಚಾಂಪಿಯನ್‌

ಡಲ್ಲಾಸ್‌: “ಆಲ್‌ ಅಮೆರಿಕನ್‌’ ಡಲ್ಲಾಸ್‌ ಓಪನ್‌ ಟೆನಿಸ್‌ ಫೈನಲ್‌ನಲ್ಲಿ ದ್ವಿತೀಯ ಶ್ರೇಯಾಂಕದ ಟಾಮಿ ಪೌಲ್‌ ಪ್ರಶಸ್ತಿ ಎತ್ತಿದ್ದಾರೆ. ಅವರು ತೀವ್ರ ಹೋರಾಟ ನೀಡಿದ ಮಾರ್ಕೋಸ್‌ ಗಿರೋನ್‌ ವಿರುದ್ಧ 7-6 (3), 5-7, 6-3 ಅಂತರದಿಂದ ಗೆಲುವು ಸಾಧಿಸಿದರು.

ಇದು ಟಾಮಿ ಪೌಲ್‌ ಗೆದ್ದ ದ್ವಿತೀಯ ಟೂರ್‌ ಲೆವೆಲ್‌ ಪ್ರಶಸ್ತಿ. ಮೊದಲ ಪ್ರಶಸ್ತಿಯನ್ನು 2021ರ ಸ್ಟಾಕ್‌ಹೋಮ್‌ ಟೂರ್ನಿಯಲ್ಲಿ ಜಯಿಸಿದ್ದರು.

ಇದು 2021ರ “ಟೋಕಿಯೊ ಓಪನ್‌’ ಬಳಿಕ ಅಮೆರಿಕನ್ನರಿಬ್ಬರು ಮುಖಾಮುಖೀಯಾದ ಮೊದಲ ಫೈನಲ್‌ ಆಗಿತ್ತು. ಈ ಜಯದೊಂದಿಗೆ 26 ವರ್ಷದ ಟಾಮಿ ಪೌಲ್‌ ವಿಶ್ವ ರ್‍ಯಾಂಕಿಂಗ್‌ನಲ್ಲಿ 14ನೇ ಸ್ಥಾನಕ್ಕೆ ಮರಳಿದ್ದಾರೆ. ಹಾಗೆಯೇ ಅಮೆರಿಕದ ನಂ.2 ಟೆನಿಸಿಗನೆಂಬ ಗೌರವಕ್ಕೂ ಪಾತ್ರರಾಗಿದ್ದಾರೆ. ಅಗ್ರಸ್ಥಾನದಲ್ಲಿರುವವರು ಟೇಲರ್‌ ಫ್ರಿಟ್ಜ್.
“ಇದೊಂದು ನಂಬಲಾಗದ ಸಾಧನೆ. ನಾನು ಆಡಿದ ಅತ್ಯುತ್ತಮ ಫೈನಲ್‌’ ಎಂಬುದಾಗಿ ಟಾಮಿ ಪೌಲ್‌ ಪ್ರತಿಕ್ರಿಯಿಸಿದ್ದಾರೆ.