Cyclone Remal ಅಪಾರ ಹಾನಿ ; ಪ.ಬಂಗಾಲದಲ್ಲಿ 6, ಬಾಂಗ್ಲಾದಲ್ಲಿ 7 ಸಾವು

ಕೋಲ್ಕತಾ/ಢಾಕಾ: ರವಿವಾರ ರಾತ್ರಿ ಬಾಂಗ್ಲಾ ಕರಾವಳಿಗೆ ಅಪ್ಪಳಿಸಿದ ರೆಮಲ್‌ ಚಂಡಮಾರುತಕ್ಕೆ ಪ.ಬಂಗಾಲದಲ್ಲಿ 6 ಮತ್ತು ಬಾಂಗ್ಲಾದಲ್ಲಿ 7 ಮಂದಿ ಸಾವನ್ನಪ್ಪಿದ್ದಾರೆ. ಗಂಟೆಗೆ 135 ಕಿ.ಮೀ. ವೇಗದಲ್ಲಿ ಚಂಡಮಾರುತ ಹಾದು ಹೋಗಿದ್ದು, ಶಿಥಿಲಗೊಂಡಿದ್ದ ಕಟ್ಟಡಗಳು, ನೂರಾರು ಮರಗಳು ಧರೆಗುರುಳಿವೆ.

ಬಾಂಗ್ಲಾ ಮತ್ತು ಪ.ಬಂಗಾಲ ಕರಾವಳಿ ಯುದ್ದಕ್ಕೂ ಅಪಾರ ಪ್ರಮಾಣದ ಹಾನಿಯಾಗಿದೆ. ಅನೇಕ ಮನೆಗಳ ಛಾವಣಿಗಳು ಹಾರಿಹೋಗಿದ್ದು, ವಿದ್ಯುತ್‌ ಕಂಬಗಳು ಧರೆಗುರುಳಿವೆ. ಬಾಂಗ್ಲಾದಲ್ಲಿ ವಿದ್ಯುತ್‌ ಸಂಪರ್ಕ ಸ್ಥಗಿತಗೊಂಡು, 1.50 ಕೋಟಿ ಮಂದಿ ಕಗ್ಗತ್ತಲಲ್ಲೇ ರಾತ್ರಿ ಕಳೆದಿದ್ದಾರೆ.
ಪ.ಬಂಗಾಲದ ಹಲವು ಪ್ರದೇಶಗಳಲ್ಲಿ ಭಾರೀ ಮಳೆಯಿಂದಾಗಿ ಪ್ರವಾಹ ಸ್ಥಿತಿ ಉಂಟಾಗಿತ್ತು. ಮೆಟ್ರೋ, ರೈಲು, ವಿಮಾನ ಸೇವೆಗಳು ವ್ಯತ್ಯಯ ವಾಗಿವೆ. ಕೋಲ್ಕತಾ ಏರ್‌ಪೋರ್ಟ್‌ನಲ್ಲಿ 21 ಗಂಟೆಗಳ ಕಾಲ ವಿಮಾನಗಳ ಸಂಚಾರ ಸ್ಥಗಿತ ಗೊಂಡಿದ್ದವು. ಕೋಲ್ಕತಾದಲ್ಲಿ ರವಿವಾರ ಬೆಳಗ್ಗೆ 8.30ರಿಂದ ಸೋಮವಾರ ಬೆಳಗ್ಗೆ 5.30ರ ವರೆಗೆ 146 ಮಿ.ಮೀ. ಮಳೆಯಾಗಿದೆ. ಸೋಮವಾರ ಮುಂಜಾನೆ 5.30ರ ವೇಳೆಗೆ ಚಂಡಮಾರುತವು ತೀವ್ರತೆ ಕಳೆದುಕೊಂಡಿದ್ದು, ಕ್ರಮೇಣ ದುರ್ಬಲ ವಾಗಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಸೈಕ್ಲೋನ್‌ ಭೀಕರತೆ ವೀಡಿಯೋದಲ್ಲಿ ಸೆರೆ!: ಬಾಂಗ್ಲಾ ದಿನಪತ್ರಿಕೆ “ದಿ ಡೈಲಿ ಸ್ಟಾರ್‌’ನ ವೀಡಿಯೋಗ್ರಾಫ‌ರ್‌ವೊಬ್ಬರು ಚಂಡಮಾರುತದ ಭೀತಿಯ ನಡುವೆಯೇ ಏಕಾಂಗಿಯಾಗಿ ಬೋಟ್‌ನಲ್ಲಿ ಸಾಗಿ ರೆಮಲ್‌ ರೌದ್ರಾವತಾರ ತಾಳುತ್ತಿರುವುದನ್ನು ತಮ್ಮ ಕೆಮರಾದಲ್ಲಿ ಸೆರೆಹಿಡಿದಿದ್ದು, ವೀಡಿಯೋ ವೈರಲ್‌ ಆಗಿದೆ.