ಚೆನ್ನೈ: ಮೂರು ಬಾರಿಯ ಐಪಿಎಲ್‌ ಚಾಂಪಿಯನ್‌, ಮಹೇಂದ್ರ ಸಿಂಗ್‌ ಧೋನಿ ಸಾರಥ್ಯದ ಚೆನ್ನೈ ಸೂಪರ್‌ ಕಿಂಗ್ಸ್‌ ತನ್ನ ನೂತನ ಸಮವಸ್ತ್ರವನ್ನು ಅನಾವರಣಗೊಳಿಸಿದೆ. ಇದರಲ್ಲಿ ಭಾರತೀಯ ಸೇನೆಯ ಸಮವಸ್ತ್ರದ ಬಣ್ಣ ಗೋಚರಿಸಿದೆ. ತಮ್ಮ ತಂಡ ಸೇನೆಗೆ ಸಲ್ಲಿಸುತ್ತಿರುವ ಗೌರವ ಇದಾಗಿದೆ ಎಂದು ಫ್ರಾಂಚೈಸಿ ಹೇಳಿಕೊಂಡಿದೆ.
“ಕೆಲವು ಸಮಯದಿಂದ ಇಂಥದ್ದೊಂಂದು ಆಲೋಚನೆ ನಮ್ಮಲ್ಲಿತ್ತು. ದೇಶ ಕಾಯುವ ಸೇನೆಯ ನಿಸ್ವಾರ್ಥ ಸೇವೆಗೆ ಗೌರವ ಸೂಚಿಸಬೇಕು ಎಂಬ ಅರಿವು ನಮ್ಮದಾಗಿತ್ತು. ಈ ನೂತನ ಸಮವಸ್ತ್ರದಲ್ಲಿ ಸೇರಿಸಲಾಗಿರುವ ಸೇನೆಯ ಬಣ್ಣ ಅವರಿಗೆ ಸೂಚಿಸುತ್ತಿರುವ ಗೌರವವಾಗಿದೆ. ಅವರೇ ನಿಜವಾದ ಹೀರೋಗಳು’ ಎಂದು ಸಿಎಸ್‌ಕೆ ತಂಡದ ಸಿಇಒ ಕೆ.ಎಸ್‌. ವಿಶ್ವನಾಥನ್‌ ಹೇಳಿದ್ದಾರೆ. ತಂಡದ ನಾಯಕ ಮಹೇಂದ್ರ ಸಿಂಗ್‌ ಧೋನಿ ಪ್ರಾದೇಶಿಕ ಸೇನೆಯಲ್ಲಿ ಗೌರವ ಲೆಫ್ಟಿನೆಂಟ್‌ ಕರ್ನಲ್‌ ಆಗಿರುವುದನ್ನು ಇಲ್ಲಿ ಗಮನಿಸಬಹುದು.
ಪ್ಲಾಸ್ಟಿಕ್‌ ಮರುಬಳಕೆಯ ಜಾಗೃತಿ :
ಈ ನೂತನ ಜೆರ್ಸಿಯನ್ನು ಬಳಸಿ ಎಸೆಯಲಾದ ಪ್ಲಾಸ್ಟಿಕ್‌ ಬಾಟಲ್‌ನಿಂದ ತಯಾರಿಸಿರುವುದು ಇನ್ನೊಂದು ವಿಶೇಷ. ಒಂದು ಜೆರ್ಸಿಯನ್ನು ತಯಾರಿಸಲು 15 ಪ್ಲಾಸ್ಟಿಟ್‌ ಬಾಟಲ್‌ ಬಳಸಲಾಗಿದೆ. ಇಂಗಾಲ ಹೊರಸೂಸುವಿಕೆಯನ್ನು ಕಡಿಮೆಗೊಳಿಸುವ ಸಾಮರ್ಥ್ಯವನ್ನೂ ಈ ಜೆರ್ಸಿ ಹೊಂದಿದೆ.
“ಪ್ಲಾಸ್ಟಿಕ್‌ ಮರುಬಳಕೆಯ ಬಗ್ಗೆ ಜಾಗೃತಿ ಮೂಡಿಸುವ ಮೂಲಕ ಪರಿಸರ ಹಾನಿಯನ್ನು ತಡೆಗಟ್ಟುವುದು ನಮ್ಮ ಉದ್ದೇಶವಾಗಿದೆ’ ಎಂದು ಪ್ರಾಂಚೈಸಿ ಹೇಳಿದೆ.
