ವಿಧಾನಸೌಧದ ಹೊರಗೂ ನೆರೆದ ಜನಜಂಗುಳಿ

ಬೆಂಗಳೂರು: ರಾಜ್ಯ ಸರ್ಕಾರದಿಂದ ಹಜರತ್‌ ಟಿಪ್ಪು ಸುಲ್ತಾನ್‌ ಜಯಂತಿ ಆಚರಣೆ ಸಮಾರಂಭ ನಡೆದ ವಿಧಾನಸೌಧದ ಬ್ಯಾಂಕ್ವೆಟ್‌ ಹಾಲ್‌ ಕಿಕ್ಕಿರಿದು ತುಂಬಿತ್ತು. ಬ್ಯಾಂಕ್ವೆಟ್‌ ಹಾಲ್‌ ಭರ್ತಿಯಾಗಿದ್ದರಿಂದ ಸಭಿಕರು ವಿಧಾನಸೌಧದ ಪೂರ್ವ ದ್ವಾರದ ಬಳಿಯ ಹುಲ್ಲುಹಾಸಿನ ಮೇಲೆ ಕುಳಿತಿದ್ದರು.

ಹೀಗಾಗಿ ಶಾಸಕ ಜಮೀರ್‌ ಅಹಮ್ಮದ್‌ ಖಾನ್‌, ಹೊರಗೇ ಇದ್ದು ಜನರನ್ನು ನಿಯಂತ್ರಿಸುತ್ತಿದ್ದರು. ಸಂಜೆ 7 ಗಂಟೆಗೆ ಕಾರ್ಯಕ್ರಮಕ್ಕೆ ಆಗಮಿಸಿದ ಸಿಎಂ, ಎಲ್ಲರಿಗೂ ಶುಭಾಷಯ ಕೋರಿದರು. ಹೊರಭಾಗದಲ್ಲೂ ಭಾರಿ ಸಂಖ್ಯೆಯಲ್ಲಿ ಜನ ಸೇರಿದ್ದರಿಂದ ಅವರಿಗೂ ಶುಭ ಕೋರಲು ತೆರಳಿದ ಸಿದ್ದರಾಮಯ್ಯ, ಹೊರಗಿದ್ದ ಜನರತ್ತ ಕೈಬೀಸಿ, ಜಮೀರ್‌ ಅಹಮದ್‌ರನ್ನು ವೇದಿಕೆಗೆ ಕರೆತಂದರು.

ಸಭಾ ಕಾರ್ಯಕ್ರಮ ಶುರುವಾದ ನಂತರ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಶಾಸಕ ಜಮೀರ್‌ ಅಹಮ್ಮದ್‌ ಖಾನ್‌ ಸೇರಿದಂತೆ ಹಲವರು ಬೆಳ್ಳಿ ಕಿರೀಟ, ಬೆಳ್ಳಿ ಖಡ್ಗ, ಹೂಮಾಲೆ, ಹೂವಿನ ಪೇಟ ತೊಡಿಸಿ ಅಭಿನಂದನೆ ಸಲ್ಲಿಸಿದರು.