ಮುಂಬಯಿ: ಕ್ರಿಕೆಟ್‌ ದೇವರೆಂದೆ ಖ್ಯಾತವಾಗಿರುವ ಮಾಸ್ಟರ್‌ ಬ್ಲಾಸ್ಟರ್‌ ಸಚಿನ್‌ ತೆಂಡುಲ್ಕರ್‌ ಅವರು ಇಂದು ಎಪ್ರಿಲ್‌ 24 45 ನೇ ಜನ್ಮ ದಿನವನ್ನು ಆಚರಿಸಿಕೊಳ್ಳುತ್ತಿದ್ದಾರೆ. ಈ ಸುಸಂದರ್ಭದಲ್ಲಿ ಕ್ರಿಕೆಟ್‌ ಆಸ್ಟ್ರೇಲಿಯಾ ಕೀಳು ಅಭಿರುಚಿಯ ಟ್ವೀಟ್‌ ಮಾಡಿ ಹಲವರ ಆಕ್ರೋಶಕ್ಕೆ ಗುರಿಯಾಗಿದೆ.
ಸಚಿನ್‌ ಅವರೊಂದಿಗೆ ಆಸೀಸ್‌ ಮಾಜಿ ಆಟಗಾರ ಡೆಮಿಯನ್‌ ಪ್ಲೆಮಿಂಗ್‌ ಅವರೂ ಜನ್ಮದಿನ ಆಚರಿಸಿಕೊಳ್ಳುತ್ತಿದ್ದು, ಅವರು ಸಚಿನ್‌ ಅವರನ್ನು ಕ್ಲೀನ್‌ ಬೌಲ್ಡ್‌ ಮಾಡಿರುವ ಹಳೆಯ ಪಂದ್ಯವೊಂದರ ವಿಡಿಯೋ ತುಣುಕೊಂದನ್ನು ಟ್ವೀಟ್‌ ಮಾಡಿ ಪ್ಲೆಮಿಂಗ್‌ಗೆ ಜನ್ಮದಿನದ ಶುಭಾಶಯ ಕೋರಿದೆ.
ಚೆಂಡು ವಿರೂಪಗೊಳಿಸಿ ಈಗಾಗಲೇ ಕಳಂಕಕ್ಕೊಳಗಾಗಿರುವ ಆಸೀಸ್‌ ಮಾಡಿರುವ ಟ್ವೀಟ್‌ಗೆ ಸಚಿನ್‌ ಅಭಿಮಾನಿಗಳು ವ್ಯಾಪಕ ಆಕ್ರೋಶ ವ್ಯಕ್ತಪಡಿಸಿದ್ದು, ಟ್ವೀಟ್‌ಗಳ ಮೂಲಕ ತಿರುಗೇಟು ನೀಡಿದ್ದಾರೆ.
ಫ್ಲೆಮಿಂಗ್‌ ಅವರು 48 ರ ಹರೆಯಕ್ಕೆ ಕಾಲಿಟ್ಟಿದ್ದು ಸದ್ಯ ಐಪಿಎಲ್‌ ವೀಕ್ಷಕ ವಿವರಣೆಗಾರನಾಗಿದ್ದಾರೆ.
