ಕುಮಟಾದ ಐದು ಖಾಸಗಿ ಆಸ್ಪತ್ರೆಯಲ್ಲಿ ಕೋವಿಡ್ ಚಿಕಿತ್ಸೆ

ಕುಮಟಾ: ರಾಜ್ಯಾದ್ಯಂತ ಸುವರ್ಣ ಆರೋಗ್ಯ ಸುರಕ್ಷಾ ಟ್ರಸ್ಟ್‌ ಅಡಿಯಲ್ಲಿ ಕಾರ್ಯ ನಿರ್ವಹಿಸುತ್ತಿರುವ 518 ಖಾಸಗಿ ಆಸ್ಪತ್ರೆಗಳಲ್ಲಿ ಕೋವಿಡ್ ಸೋಂಕಿತರಿಗೆ ಚಿಕಿತ್ಸೆ ನೀಡಲು ರಾಜ್ಯ ಸರ್ಕಾರ ಅವಕಾಶ ನೀಡಿದ್ದು, ಈ ಯೋಜನೆಯಡಿಯಲ್ಲಿ ತಾಲೂಕಿನ 5 ಖಾಸಗಿ ಆಸ್ಪತ್ರೆಗಳು ಸಂದರ್ಭಕ್ಕನುಸಾರವಾಗಿ ರೋಗಿಗಳಿಗೆ ಚಿಕಿತ್ಸೆ ಒದಗಿಸಲಿವೆ.

ಸರ್ಕಾರ ಈಗಾಗಲೇ ತಾಲೂಕಿನ ಖಾಸಗಿ ಆಸ್ಪತ್ರೆಗಳ ಮುಖ್ಯಸ್ಥರಿಗೆ ಹಾಗೂ ವೈದ್ಯರಿಗೆ ಕೋವಿಡ್ ಚಿಕಿತ್ಸೆ ಒದಗಿಸುವ ನಿಟ್ಟಿನಲ್ಲಿ ಸುರಕ್ಷಾ ವಾರ್ಡ್ ನಲ್ಲಿ ಸಕಲ ಸಿದ್ಧತೆ ನಡೆಸಲು ಸೂಚಿಸಿದೆ. ಈ ವಾರ್ಡ್‌ನಲ್ಲಿ ವೆಂಟಿಲೇಷನ್‌ ಸೌಲಭ್ಯ ಹೊರತುಪಡಿಸಿ, ಆಕ್ಸಿಜನ್‌ ಸೇರಿದಂತೆ ಇನ್ನಿತರ ಚಿಕಿತ್ಸೆಗೆ ಅತ್ಯವಶ್ಯವಿರುವ ಎಲ್ಲ ಬಗೆಯ ಪರಿಕರಗಳು ಸಿದ್ಧವಿರುತ್ತವೆ. ಪ್ರಾಥಮಿಕ ಹಂತದಲ್ಲಿರುವ ಕೋವಿಡ್ ರೋಗಿಗೆ ಇಲ್ಲಿಯೇ ಚಿಕಿತ್ಸೆ ಒದಗಿಸಲಾಗುತ್ತದೆ. ಹೆಚ್ಚಿನ ಚಿಕಿತ್ಸೆ ಅವಶ್ಯವಿದ್ದಲ್ಲಿ ಕಾರವಾರದ ರವಾನಿಸಲಾಗುತ್ತದೆ.

ರಾಜ್ಯ ಸರ್ಕಾರ ಖಾಸಗಿ ಆಸ್ಪತ್ರೆಗಳಲ್ಲಿ ಕೊರೊನಾ ಚಿಕಿತ್ಸೆ ನೀಡಲು ಅನುಮತಿ ನೀಡಿದೆ. ಆದರೆ ನಮ್ಮ ಉಪವಿಭಾಗದ ವ್ಯಾಪ್ತಿಯಲ್ಲಿ ಈಗಾಗಲೇ ಕೋವಿಡ್ ಸೋಂಕಿತರಿಗೆ ಸೂಕ್ತ ಚಿಕಿತ್ಸೆ ಒದಗಿಸುವ ನಿಟ್ಟಿನಲ್ಲಿ ಕುಮಟಾ ಸರ್ಕಾರಿ ಆಸ್ಪತ್ರೆಯಲ್ಲಿ 35 ಹಾಸಿಗೆಯ ವಿಶೇಷ ವಾರ್ಡ್ ನ್ನು ನಿರ್ಮಿಸಿದ್ದೇವೆ. ಅಲ್ಲದೇ, ಕಾರವಾರದಲ್ಲಿಯೂ 250 ಹಾಸಿಗೆಯ ವಿಶೇಷ ವಾರ್ಡ್‌ ಇದೆ. ಆದ್ದರಿಂದ ನಮಗೆ ತುರ್ತಾಗಿ ಖಾಸಗಿ ಆಸ್ಪತ್ರೆ ಅವಲಂಬಿಸುವ ಪರಿಸ್ಥಿತಿಯಿಲ್ಲ. -ಎಂ. ಅಜಿತ ರೈ, ಉಪ ವಿಭಾಗಾಧಿಕಾರಿ