ರಜೆಗೆ ಬಂದ ಯೋಧನಿಗೆ ಕೋವಿಡ್

ಖಾನಾಪುರ: ರಜೆ ಮೇಲೆ ಕರವಿನಕೋಪ್ಪ ಗ್ರಾಮಕ್ಕೆ ಆಗಮಿಸಿದ್ದ ಯೋಧನಿಗೆ ಕೋವಿಡ್ ಸೋಂಕು ದೃಢಪಟ್ಟಿದೆ. ಕೇರಳ ಬಳಿ ಕರ್ತವ್ಯ ನಿರ್ವಹಿಸುತ್ತಿದ್ದ ಈತನಿಗೆ ತನ್ನ ಜೊತೆಯಿದ್ದ ಸೋಂಕಿತ ಇಬ್ಬರಿಂದ ಕೋವಿಡ್ ಆವರಿಸಿದೆ ಎನ್ನಲಾಗಿದೆ.

ತಕ್ಷಣ ಬೆಳಗಾವಿಗೆ ತೆರಳಿ ತಾನೇ ಖುದ್ದಾಗಿ ಪರೀಕ್ಷೆ ಮಾಡಿಸಿಕೊಂಡಿದ್ದಾನೆ. ಶುಕ್ರವಾರ ಈತನಿಗೆ ಪಾಸಿಟಿವ್‌ ಇರುವ ಮಾಹಿತಿ ಬಂದಿದೆ. ಸ್ಥಳಕ್ಕೆ ತಹಶೀಲ್ದಾರ್‌ ರೇಷ್ಮಾ ತಾಳಿಕೋಟಿ, ಇಒ ಅಡವಿಮಠ ಮತ್ತು ಸಿಪಿಐ ಸುರೇಶ ಶಿಂಘೆ ಮತ್ತು ನಂದಗಡ ಪಿಎಸ್‌ಐ ಯು. ಎಸ್‌. ಅವಟಿ ಸ್ಥಳಕ್ಕೆ ತೆರಳಿ ಆತನನ್ನು ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆತ ಇರುವ ಶಾಲೆಯ ಬಳಿ ಮನೆ ಸುತ್ತ ಬ್ಯಾರಿಕೆಡ್‌ ಹಾಕಿ ಯಾರು ಬರದಂತೆ ನೋಡಿಕೊಳ್ಳಲಾಗಿದೆ.

ಅವರ ಕುಟುಂಬದವರನ್ನು ಮನೆಯಲ್ಲಿ ಕ್ವಾರಂಟೈನ್‌ ಮಾಡಲಾಗಿದೆ. ಪಾಸಿಟಿವ್‌ ಹೊಂದಿದ 30 ವರ್ಷದ ವ್ಯಕ್ತಿ ಆರೋಗ್ಯವಾಗಿಯೇ ಇದ್ದಾನೆಂದು ತಿಳಿದು ಬಂದಿದೆ. ಖಾನಾಪುರ ತಾಲೂಕಿನಲ್ಲಿ ಇಲ್ಲಿಯವರೆಗೆ ಕೋವಿಡ್ ಪ್ರಕರಣ ಒಂದೂ ಇರಲಿಲ್ಲ. ಇದೀಗ ಈ ಘಟನೆಯಿಂದ ಜನರಲ್ಲಿ ಆತಂಕ ಮೂಡಿಸಿದೆ.