ಆರೋಗ್ಯ ಯೋಧರು: ಮಗನನ್ನು ಆಲಿಂಗಿಸಿಕೊಳ್ಳಲು ಆಗದೇ ಕಣ್ಣೀರು ಹಾಕುವ ವೈದ್ಯ

ಕೋವಿಡ್ 19 ವೈರಸ್ ಗೆ ಹೆದರಿ ಎಲ್ಲರೂ ಮನೆಯ 4 ಗೋಡೆಗಳಿಗೆ ಸೀಮಿತವಾಗಿರುವ ಈ ಸಂದರ್ಭದಲ್ಲಿ ವೈದ್ಯರೊಬ್ಬರ ಮನೆಯಲ್ಲಿ ನಡೆದ ಘಟನೆಯ ಭಾವನಾತ್ಮಕ ವಿಡಿಯೋವೊಂದು ಎಲ್ಲರ ಕಣ್ಣನ್ನು ಮಂಜಾಗಿಸಿದೆ.

ಸೌದಿ ಅರೇಬಿಯಾದಲ್ಲಿ ಕೋವಿಡ್ 19 ವೈರಸ್ ಪೀಡಿತರಿಗೆ ಚಿಕಿತ್ಸೆ ನೀಡಿದ ವೈದ್ಯರೊಬ್ಬರು ಆಸ್ಪತ್ರೆಯಿಂದ ಮನೆಗೆ ವಾಪಸಾಗುತ್ತಾರೆ. ಮನೆಯ ಬಾಗಿಲು ತೆಗೆದು ಒಳಪ್ರವೇಶಿಸುತ್ತಿದ್ದಂತೆ, ಅಪ್ಪನನ್ನು ಕಂಡು ಸಂತೋಷಗೊಂಡ ಮಗು ಅಪ್ಪನನ್ನು ಆಲಿಂಗಿಸಿಕೊಳ್ಳಲೆಂದು ಧಾವಿಸಿ ಬರುತ್ತದೆ.

ವೈದ್ಯಕೀಯ ಸುರಕ್ಷಾ ಉಡುಪನ್ನು ಧರಿಸಿದ್ದ ವೈದ್ಯ ತಂದೆ, ತಕ್ಷಣ ದೂರದಿಂದಲೇ ಮಗುವನ್ನು ನಿಲ್ಲುವಂತೆ ತಡೆದು, ಹಿಂದಕ್ಕೆ ಹೋಗು ಎಂದು ಸೂಚಿಸುತ್ತಾರೆ. ಆಗ ಮಗುವಿನ ಮುಖದಲ್ಲಾದ ದುಗುಡ ನೋಡಿ ಮರುಗುವ ತಂದೆ, ಅಲ್ಲೇ ಕುಳಿತು ಕಣ್ಣೀರು ಹಾಕುವ ದೃಶ್ಯ ಮನಕಲಕುವಂತಿದೆ.