ಇದೀಗ ಸಣ್ಣ ಜ್ವರವಿದ್ರೂ ಕ್ವಾರಂಟೈನ್‌

ಕೋವಿಡ್ 19 ವೈರಸ್ ಸೋಂಕು ತೀವ್ರವಾಗಿ ಹಬ್ಬುತ್ತಿರುವ ಹಿನ್ನೆಲೆಯಲ್ಲಿ ರ್ಯಾಪಿಡ್‌ ಆ್ಯಂಟಿ ಬಾಡಿ ಟೆಸ್ಟ್‌ಗೆ ಕಟ್ಟುನಿಟ್ಟಿನ ಕ್ರಮಗಳನ್ನು ಅನುಸರಿಸಲಾಗುತ್ತಿದೆ. ಕಂಟೈನ್‌ಮೆಂಟ್‌ ಝೋನ್‌ ಮತ್ತು ಹೆಚ್ಚು ವಲಸಿಗರಿರುವ ಪ್ರದೇಶಗಳಲ್ಲಿ ಆ್ಯಂಟಿಬಾಡಿ ಟೆಸ್ಟ್‌ (ಪ್ರತಿರೋಧ ಪರೀಕ್ಷೆ) ನಡೆಯಲಿದೆ.

ವ್ಯಕ್ತಿಗೆ ಸೋಂಕನ್ನು ತಡೆದುಕೊಳ್ಳಲು ಅಗತ್ಯವಾದ ಪ್ರತಿರೋಧ ಕಣಗಳು (ಆ್ಯಂಟಿಬಾಡಿ) ಇವೆಯಾ ಎಂಬುದನ್ನು ಈ ಪರೀಕ್ಷೆ ತಿಳಿಸುತ್ತದೆ. ಕಂಟೈನ್‌ಮೆಂಟ್‌ ಮತ್ತು ವಲಸಿಗರ ಪ್ರದೇಶಗಳಲ್ಲಿ ಪ್ರತಿ ಯೊಬ್ಬ ವ್ಯಕ್ತಿಯೂ ಈ ಪರೀಕ್ಷೆ ಒಳಪಡು ತ್ತಾನೆ. ಪಾಸಿಟಿವ್‌ ಫ‌ಲಿತಾಂಶ ಬಂದವರಿಗೆ, ಹೋಮ್‌ ಕ್ವಾರಂಟೈನ್‌ಗೆ ಸೂಚಿಸಲಾಗುತ್ತದೆ. ಇನ್‌ಫ್ಲ್ಯೂಯೆಂಝಾ ಸೋಂಕು, ಸಣ್ಣ ಜ್ವರವಿರುವ ವ್ಯಕ್ತಿಯನ್ನೂ ಇಲ್ಲಿ ಹೆಚ್ಚುವರಿ ಪರೀಕ್ಷೆಗೆ ಒಳಪಡಿಸಲಾಗುತ್ತದೆ. ಅಲ್ಲದೆ, ಇಂಥ ರೋಗಿಗಳನ್ನು 14 ದಿನಗಳ ಹೋಮ್‌ ಕ್ವಾರಂಟೈನ್‌ನಲ್ಲಿ ಇರಿಸಲಾಗು ತ್ತದೆ. ನಿತ್ಯವೂ ವೈದ್ಯರ ನಿಗಾದಲ್ಲೇ ಇರಬೇಕಾಗುತ್ತದೆ. ಕಫ‌, ಶೀತ, ಗಂಟಲು ಕೆರೆತ ಲಕ್ಷಣಗಳಿದ್ದವರನ್ನೂ ಹೀಗೆಯೇ ವರ್ಗೀಕರಿಸಲಾಗುತ್ತದೆ.

ದೇಹದಲ್ಲಿ ಪ್ರತಿರೋಧ ಶಕ್ತಿ ಕಡಿಮೆ ಇರುವಂತವರನ್ನೇ ಈ ಮಾರಕ ವೈರಸ್, ನುಂಗಿ ನೀರು ಕುಡಿಯುತ್ತಿರುವುದರಿಂದ ಇಂಡಿಯನ್‌ ಕೌನ್ಸಿಲ್‌ ಆಫ್ ಮೆಡಿಕಲ್‌ ರಿಸರ್ಚ್‌, ಈ ಪರೀಕ್ಷಾ ಕ್ರಮವನ್ನು ಸರ್ಕಾರಕ್ಕೆ ಸೂಚಿಸಿತ್ತು.