ಕಾಂಗ್ರೆಸ್‌ ಪರಿವರ್ತನಾ ಯಾತ್ರೆಗೆ ಜನಸಾಗರ

ಉಡುಪಿ: ಕಾಂಗ್ರೆಸ್‌ ಪಕ್ಷದ ಜನಪರ ಕಾರ್ಯಕ್ರಮಗಳನ್ನು ಜನರಿಗೆ ತಿಳಿಸಲು ಮತ್ತು ಲೋಕಸಭೆ ಚುನಾವಣೆಯ ಸಿದ್ದತೆ ಮತ್ತು ಪ್ರಚಾರ, ಜನಸ್ಪಂದನದ ರೂಪುರೇಷೆಗಳ ಬಗ್ಗೆ ಮಾರ್ಗದರ್ಶನ ನೀಡುವ ಉದ್ದೇಶದಿಂದ ರವಿವಾರ ಉಡುಪಿ ಕಲ್ಸಂಕದ ರಾಯಲ್‌ ಗಾರ್ಡನ್‌ನಲ್ಲಿ ನಡೆದ “ಕಾಂಗ್ರೆಸ್‌ ಪರಿವರ್ತನಾ ಯಾತ್ರೆ ಮತ್ತು ಜಿಲ್ಲಾ ಮಟ್ಟದ ಕಾರ್ಯಕರ್ತರ ಬೃಹತ್‌ ಸಮಾವೇಶ’ಕ್ಕೆ ಜನಸಾಗರ ಹರಿದು ಬಂತು. 

ಬಿಸಿಲಿನ ತಾಪವನ್ನು ಲೆಕ್ಕಿಸದ ಜನ
ನಗರದಲ್ಲಿ ತಾಪಮಾನ 33 ಡಿಗ್ರಿ ತಲುಪಿದ್ದು, ಇವುಗಳನ್ನೆಲ್ಲ ಲೆಕ್ಕಿಸದೆ ಜನ ಸಮಾವೇಶದಲ್ಲಿ ಭಾಗವಹಿಸಿದರು. ಕಲ್ಸಂಕ ಗಾರ್ಡನ್‌ ಹಾಗೂ ರಸ್ತೆ ಬದಿಗಳಲ್ಲಿ ಸಾಲುಗಟ್ಟಿ ವಾಹನಗಳ ನಿಲುಗಡೆಯಾಗಿತ್ತು. ಬಸ್ಸು, ಕಾರು, ಬೈಕ್‌ಗಳಲ್ಲಿ ಸಹಸ್ರಾರು ಜನ ಕಾಂಗ್ರೆಸ್‌ ಕಾರ್ಯಕರ್ತರು ಸಮಾವೇಶಕ್ಕೆ ಆಗಮಿಸಿದರು. 

ಮಜ್ಜಿಗೆ ವಿತರಣೆ
ಬಹುತೇಕ ಜನರು ತಂಪು ಪಾನೀಯಗಳಿಗೆ ಮೊರೆ ಹೋದರು. ಹೋಟೆಲ್‌ಗ‌ಳು, ತಂಪುಪಾನಿಯದ ಅಂಗಡಡಿಗಳು ಜನರಿಂದ ತುಂಬಿದ್ದವು. ಸಮಾವೇಶದಲ್ಲಿ ಸೇರಿದ ಕಾರ್ಯಕರ್ತರಿಗೆ ಮಜ್ಜಿಗೆಯನ್ನೂ ವಿತರಿಸಲಾಯಿತು. ರವಿವಾರ ಆದ ಕಾರಣ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದರು. 

ರಾಹುಲ್‌ ಕೀ ಜೈ ಘೋಷ
ಸುಮಾರು 50ಕ್ಕೂ ಅಧಿಕ ಕಾಂಗ್ರೆಸ್‌ ಕಾರ್ಯಕರ್ತರು ಬೈಕ್‌ನಲ್ಲಿ ರಾಹುಲ್‌ ಕೀ ಜೈ ಘೋಷ ವಾಕ್ಯ ಕೂಗುತ್ತಾ ಸಮಾವೇಶಕ್ಕೆ ಆಗಮಿಸಿದರು. ನಾಯಕರ ಫ್ಲೆಕ್ಸ್‌ಗಳು ನಗರದಾದ್ಯಂತ ರಾರಾಜಿಸಿದವು.

ಪೊಲೀಸ್‌ ಬಂದೋಬಸ್ತು
ಸಮಾವೇಶದ ಸುತ್ತಮುತ್ತ ಬಿಗಿ ಪೊಲೀಸ್‌ ಬಂದೋಬಸ್ತ್ ಆಯೋಜಿಸಲಾಗಿತ್ತು. ಕಲ್ಸಂಕ ಸಹಿತ ಕಿನ್ನಿಮೂಲ್ಕಿ, ಶಿರಿಬೀಡು, ಕರಾವಳಿ ಜಂಕ್ಷನ್‌, ಕಡಿಯಾಳಿ ಸುತ್ತಮುತ್ತ ಪೊಲೀಸರು ಸೂಕ್ತ ಬಂದೋಬಸ್ತ್ ಕೈಗೊಂಡಿದ್ದರು.