Ajmer: ಅಜ್ಮೇರ್‌ ದರ್ಗಾದಲ್ಲಿ ನರ್ತನಕ್ಕೆ ಖಂಡನೆ

ಜೈಪುರ: ರಾಜಸ್ಥಾನದ ಪ್ರಸಿದ್ಧ ಧಾರ್ಮಿಕ ಕ್ಷೇತ್ರಗಳಲ್ಲಿ ಒಂದಾದ ಅಜ್ಮೇರ್‌ ದರ್ಗಾದಲ್ಲಿ ಮಹಿಳೆಯೊಬ್ಬರು ನರ್ತಿಸಿರುವ ಘಟನೆ ಟೀಕೆಗೆ ಗುರಿಯಾಗಿದೆ. ಸೂಫಿ ಸಂತರ ಪವಿತ್ರ ಕ್ಷೇತ್ರವಾದ ತಾರಾಗರ್‌ ಬೆಟ್ಟದಲ್ಲಿರುವ ಅಜ್ಮೇರ್‌ ದರ್ಗಾದಲ್ಲಿ ಅಪರಿಚಿತ ಮಹಿಳೆಯೊಬ್ಬಳು ಸುತ್ತಮುತ್ತಲಿನ ಪರಿವೆ ಇಲ್ಲದೆ ಇಯರ್‌ ಫೋನ್‌ ಹಾಕಿಕೊಂಡು ನೃತ್ಯ ಮಾಡಿದ್ದಾರೆ. ಈ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ.

“ಧಾರ್ಮಿಕ ಕ್ಷೇತ್ರದಲ್ಲಿ ಹೇಗೆ ನಡೆದುಕೊಳ್ಳಬೇಕು ಎಂಬುದನ್ನು ಮಹಿಳೆ ಕಲಿಯಬೇಕು” ಎಂದು 13ನೇ ಶತಮಾನದ ಸೂಫಿ ಸಂತ ಖ್ವಾಜಾ ಮೊಯಿನುದ್ದೀನ್‌ ಚಿಸ್ತಿ ದರ್ಗಾದ ಆಡಳಿತ ಮಂಡಳಿ ಹೇಳಿದೆ. ಹಿಂದೂ-ಮುಸ್ಲಿಮರಿಬ್ಬರ ಶ್ರದ್ಧಾಕೇಂದ್ರವಾಗಿರುವ ಜಾಗದಲ್ಲಿ ಮಹಿಳೆ ವರ್ತಿಸಿರುವ ರೀತಿಗೆ ನೆಟ್ಟಿಗರು ಕಿಡಿಕಾರಿದ್ದಾರೆ.