ಹುಬ್ಬಳ್ಳಿ: ಪೊಲೀಸ್ ಬಿಗಿ ಭದ್ರತೆಯಲ್ಲಿ ದರ್ಗಾ ಸುತ್ತಲಿನ ಕಂಪೌಂಡ್, ಮೇಲ್ಛಾವಣಿ ತೆರವು

ಹುಬ್ಬಳ್ಳಿ: ಇಲ್ಲಿನ ಭೈರಿದೇವಕೊಪ್ಪದ ಹಜರತ್ ಸಯ್ಯದ್ ಮೆಹಮೂದ್ ಶಹಾ ದರ್ಗಾ ತೆರವು ವಿಚಾರವಾಗಿ ದರ್ಗಾ ಸುತ್ತಲಿನ ಕಂಪೌಂಡ್ ಹಾಗೂ ಮೇಲ್ಛಾವಣಿಯನ್ನು ಪೊಲೀಸ್ ಬಿಗಿ ಭದ್ರತೆಯಲ್ಲಿ ತೆರವು ಮಾಡಿದ್ದಾರೆ.

ಗೋರಿ ತೆರವಿಗೆ ಅಂತಿಮ ಕಾರ್ಯದ ಹಿನ್ನಲೆಯಲ್ಲಿ ಸ್ಥಳಕ್ಕೆ ಅಂಜುಮನ್ ಸಂಸ್ಥೆ ಅಧ್ಯಕ್ಷ ಯುಸೂಫ್ ಸವಣೂರ, ಧಾರ್ಮಿಕ ಗುರು ಸೇರಿದಂತೆ ಪ್ರಮುಖರು ಆಗಮಿಸಿದ್ದಾರೆ. ಗೋರಿ ತೆರವು ಕಾರ್ಯಾಚರಣೆ ನಡೆಯಲಿದೆ ಎಂದು ಮೂಲಗಳು ತಿಳಿಸಿವೆ.

ತೆರವು ಹಿನ್ನೆಲೆಯಲ್ಲಿ ದರ್ಗಾ ಸಮೀಪದ ಎಪಿಎಂಸಿ ಮೊದಲ ಗೇಟ್ ಬಂದ್ ಮಾಡಲಾಗಿದೆ. ನಗರದಾದ್ಯಂತ ಕಟ್ಟೆಚ್ಚರ ವಹಿಸಲಾಗಿದೆ.‌

ಸೂಕ್ಷ್ಮ ಪ್ರದೇಶಗಳಲ್ಲಿ ಹೆಚ್ಚಿನ ಪೊಲೀಸ್ ಬಂದೋಬಸ್ತ್ ಕೈಗೊಳ್ಳಲಾಗಿದೆ. ಕಾನೂನು ಮತ್ತು ಸುವ್ಯವಸ್ಥೆ ವಿಭಾಗದ ಡಿಸಿಪಿ ಸೇರಿದಂತೆ ಹಿರಿಯ ಅಧಿಕಾರಿಗಳು ನಗರದಲ್ಲಿ ತೀವ್ರ ನಿಗಾವಹಿಸಿದ್ದಾರೆ.