ವನಿತಾ ಹಾಕಿ: ಭಾರತಕ್ಕೆ ಆಘಾತ

ಗೋಲ್ಡ್‌ ಕೋಸ್ಟ್‌: ವನಿತಾ ಹಾಕಿ ಸ್ಪರ್ಧೆಯಲ್ಲಿ ಭಾರತವು ಅಷ್ಟೊಂದು ಬಲಿಷ್ಠವಲ್ಲದ ವೇಲ್ಸ್‌ ವಿರುದ್ಧ 2-3 ಗೋಲುಗಳಿಂದ ಸೋತು ಆಘಾತಕ್ಕೆ ಒಳಗಾಗಿದೆ. ಪ್ರಮುಖ ಕೂಟವೊಂದರಲ್ಲಿ ಭಾರತ ಮೊದಲ ಬಾರಿ ವೇಲ್ಸ್‌ ವಿರುದ್ಧ ಸೋತಿದೆ.

ಪಂದ್ಯ ಆರಂಭವಾದ 7ನೇ ನಿಮಿಷದಲ್ಲಿ ಲಿಸಾ ಡಾಲೆ ಮೊದಲ ಗೋಲನ್ನು ಹೊಡೆದು ವೇಲ್ಸ್‌ಗೆ ಮುನ್ನಡೆ ಒದಗಿಸಿದ್ದರು. 26ನೇ ನಿಮಿಷದಲ್ಲಿ ಲಭಿಸಿದ ಪೆನಾಲ್ಟಿ ಸ್ಟ್ರೋಕ್‌ ಅವಕಾಶದಲ್ಲಿ ಸಿಯಾನ್‌ ಫ್ರೆಂಚ್‌ ಗೋಲನ್ನು ಹೊಡೆದು ಮುನ್ನಡೆಯನ್ನು 2-0ಕ್ಕೇರಿಸಿದರು. ಮೂರನೇ ಕ್ವಾರ್ಟರ್‌ ಅವಧಿಯಲ್ಲಿ ಭಾರತೀಯರು ಪ್ರಬಲ ಹೋರಾಟ ನಡೆಸಿದರು. ನಾಯಕಿ ರಾಣಿ 34ನೇ ನಿಮಿಷದಲ್ಲಿ ಪೆನಾಲ್ಟಿ ಕಾರ್ನರ್‌ ಮೂಲಕ ಗೋಲನ್ನು ಹೊಡೆದುರು. ಮೂರನೇ ಕ್ವಾರ್ಟರ್‌ ಅವಧಿ ಮುಗಿಯಲು ಸ್ವಲ್ಪ ಹೊತ್ತು ಇರುವಾಗ ನಿಕ್ಕಿ ಪ್ರಧಾನ್‌ ಅಮೋಘ ಗೋಲನ್ನು ಹೊಡೆದು 2-2 ಸಮಬಲ ಸಾಧಿಸಿದರು.

ನಾಲ್ಕನೇ ಕ್ವಾರ್ಟರ್‌ನಲ್ಲಿ ಎರಡೂ ತಂಡಗಳ ಆಟಗಾರ್ತಿಯರು ಪ್ರಬಲವಾಗಿ ಹೋರಾಡಿದರು. ಕೊನೆ ಹಂತದಲ್ಲಿ ನಟಾಶಾ ಮಾರ್ಕೆ ಜೋನ್ಸ್‌ (57ನೇ ನಿಮಿಷ) ಗೆಲುವಿನ ಗೋಲು ಹೊಡೆದು ಭಾರತಕ್ಕೆ ಆಘಾತವಿಕ್ಕಿದರು.