ಡ್ಯೂಟಿ ಫ್ರೀ ಮಳಿಗೆಗಳಲ್ಲಿ ಒಂದು ಬಾಟಲ್‌ ಮದ್ಯ ಖರೀದಿಗೆ ಮಾತ್ರ ಅವಕಾಶ ಸಾಧ್ಯತೆ

ಹೊಸದಿಲ್ಲಿ: ಡ್ಯೂಟಿ ಫ್ರೀ (ಸುಂಕ ಪಾವತಿಸದೇ ಇರುವ) ಮಳಿಗೆಗಳಿಂದ ಇನ್ನು ಮುಂದೆ ಒಂದೇ ಒಂದು ಮದ್ಯದ ಬಾಟಲಿ ಖರೀದಿಗೆ ಮಾತ್ರ ಅವಕಾಶವಿರಲಿದೆಯೇ? ವಾಣಿಜ್ಯ ಸಚಿವಾಲಯವು ವಿತ್ತ ಖಾತೆಗೆ ನೀಡಲಾಗಿರುವ ಬಜೆಟ್‌ ಸಲಹೆಗಳಲ್ಲಿ ಈ ಅಂಶ ಉಲ್ಲೇಖವಾಗಿದೆ. ಅಲ್ಲದೆ, ಮದ್ಯದ ಜತೆಗೆ ಬಳಕೆಯಾಗುವ ಸಿಗರೇಟು ಖರೀದಿಯ ಮೇಲೆ ಕೂಡ ನಿಯಂತ್ರಣ ಹೇರುವುದೊಳಿತು ಎಂದು ವಾಣಿಜ್ಯ ಇಲಾಖೆ ಸಲಹೆ ನೀಡಿದೆ.

ಅಗತ್ಯ ವಸ್ತುಗಳ ಪಟ್ಟಿಯಲ್ಲಿ ಇಲ್ಲದ ವಸ್ತುಗಳನ್ನು ಆಮದು ಮಾಡಿಕೊಳ್ಳುವುದರ ಮೇಲೆ ನಿಯಂತ್ರಣ ಹೇರುವ ನಿಟ್ಟಿನಲ್ಲಿ ಇಂಥ ನಿಯಮ ಜಾರಿಗೆ ತರಬಹುದು ಎಂದು ತಿಳಿಸಿದೆ. ಹಾಲಿ ಇರುವ ನಿಯಮ ಪ್ರಕಾರ, ವಿದೇಶಗಳಿಂದ ಆಗಮಿಸುವವರು ಡ್ಯೂಟಿ ಫ್ರೀ ಮಳಿಗೆಗಳಲ್ಲಿ ಎರಡು ಲೀಟರ್‌ ಮದ್ಯ, ಒಂದು ಪ್ಯಾಕ್‌ ಸಿಗರೇಟ್‌ ಖರೀದಿ ಮಾಡಲು ಅವಕಾಶ ಇದೆ.

ಅಂತಾರಾಷ್ಟ್ರೀಯ ಪ್ರಯಾಣಿಕರಿಗೆ 1 ಲೀಟರ್‌ ಮದ್ಯ ಮಾತ್ರ ಖರೀದಿಗೆ ಅವಕಾಶ ನೀಡುವ ರಾಷ್ಟ್ರಗಳೂ ಇವೆ. ಅದೇ ನಿಯಮವನ್ನೂ ನಮ್ಮ ದೇಶಕ್ಕೂ ಅನ್ವಯಿಸಬಹುದು ಎನ್ನುತ್ತವೆ ವಾಣಿಜ್ಯ ಸಚಿವಾಲಯದ ಮೂಲಗಳು.