ಎಳೆಯರ ಮನಸ್ಸಿನ ಪ್ರತಿಬಿಂಬ ಕೊಲಾಜ್‌ ನಾಟಕ

ಶಿಕ್ಷಣ ಎಂಬುದು ಇಂದು ಮಾರುಕಟ್ಟೆಯ ಸರಕಾಗಿದೆ. ಅದರಲ್ಲಿ ಎಳೆಯರ ಬಾಲ್ಯ ಸಹಜ ಚಟುವಟಿಕೆಗಳು ಕಳೆದು ಹೋಗುತ್ತಿವೆ. ಶಾಲೆಗಳಲ್ಲಿ ರಂಗ ಚಟುವಟಿಕೆಗಳ ಮೂಲಕ ಅವರ ಮೂಲಭೂತ ಪ್ರವೃತ್ತಿಯನ್ನು ಸಾಂಸ್ಕೃತಿಕವಾಗಿ ಪರಿವರ್ತಿಸಿದಾಗ ಅವರು ಸಹಜವಾಗಿ ಅರಳಬಲ್ಲರು. ಅದಕ್ಕಾಗಿ “”ಶಿಕ್ಷಣ ಮತ್ತು ರಂಗಭೂಮಿ” ಎನ್ನುವ ಶೀರ್ಷಿಕೆಯೊಂದಿಗೆ ಬ್ರಹ್ಮಾವರ ಎಸ್‌.ಎಂ.ಎಸ್‌. ಆಂಗ್ಲ ಮಾಧ್ಯಮ ಶಾಲಾ ವಿದ್ಯಾರ್ಥಿಗಳಿಗೆ ಒಂದು ವಾರದ ರಂಗ ಚಟುವಟಿಕೆಯ ಶಿಬಿರವನ್ನು ಖ್ಯಾತ ರಂಗ ನಿರ್ದೇಶಕ ಡಾ| ಶ್ರೀಪಾದ ಭಟ್‌ ಅವರ ನೇತೃತ್ವದಲ್ಲಿ ಏರ್ಪಡಿಸಲಾಗಿತ್ತು. ಶಿಬಿರದ ಕೊನೆಯ ದಿನ ಕೊಲಾಜ್‌ ಕಲಾಕೃತಿ (ವಿವಿಧ ಬಣ್ಣದ ಕಾಗದದ ಚೂರುಗಳನ್ನು ಜೋಡಿಸಿ ಮಾಡುವ ಕಲಾಕೃತಿ) ಯಂತೆ ನಾಲ್ಕು ಬೇರೆ ಬೇರೆ ಭಾಷೆಗಳ ಚಿಕ್ಕ ಚಿಕ್ಕ ಕಥೆ ಮತ್ತು ಕವನಗಳನ್ನು ಜೋಡಿಸಿ ಒಂದು ಗಂಟೆಯ ಅವಧಿಯ ಕೊಲಾಜ್‌ ನಾಟಕವನ್ನು ಪ್ರದರ್ಶಿಸಿದರು. 

ಎಳೆಯರ ಮನಸ್ಸೆಂಬುದು ಬಹಳ ನಿಷ್ಕಲ್ಮಶ ಮತ್ತು ನಿಷ್ಕಪಟ. ಅವರಲ್ಲಿರುವ ದಯಾಪರತೆ, ಸ್ನೇಹಶೀಲತೆ, ಪರೋಪಕಾರ ಗುಣಗಳನ್ನು ಗುರುತಿಸದೇ ಅವರ ಸುತ್ತ ಶಿಸ್ತು ಎನ್ನುವ ಬೇಲಿಯನ್ನು ನಿರ್ಮಿಸುವುದು, ಎಳೆಯ ಮನಗಳ ನಡುವೆ ಶ್ರೇಷ್ಠತೆ ಮತ್ತು ಕನಿಷ್ಠತೆ ಎನ್ನುವ ವಿಷ ಬೀಜ ಬಿತ್ತುವುದು, ತರಗತಿ ಕೊಠಡಿಯೊಳಗೆ ಎಳೆಯ ಮನಸ್ಸುಗಳ ನಡುವೆ ಅನಾರೋಗ್ಯಕರ ಸ್ಪರ್ಧೆಯಿಂದ ಉಂಟಾಗುವ ಅನಾಹುತ, ಭಾಷೆ-ಜನಾಂಗಗಳ  ನಡುವೆ ಅಡ್ಡ ಗೋಡೆ ನಿರ್ಮಿಸುವುದು ಇವೆಲ್ಲವೂ ನಮ್ಮನ್ನು ಮತ್ತೂಮ್ಮೆ ಎಚ್ಚರಿಸುವಂತಿದೆ. ಕೇವಲ ಏಳು ದಿನಗಳಲ್ಲಿ ಶ್ರೀಪಾದ ಭಟ್ಟರ ಮಾಂತ್ರಿಕ ನಿರ್ದೇಶನದಲ್ಲಿ ಪಳಗಿದ ಇಪ್ಪತ್ತೈದಕ್ಕೂ ಅಧಿಕ ಎಳೆಯರು ರಂಗದ ಮೇಲೆ ಬಹಳ ಲವಲವಿಕೆಯೊಂದಿಗೆ ಪಾತ್ರಗಳನ್ನು ನಿರ್ವಹಿಸುತ್ತಾ ಜತೆಗೆ ಸಂಗೀತವನ್ನು ಭಾವಾಭಿವ್ಯಕ್ತಿಯೊಂದಿಗೆ ಹಾಡುತ್ತಾ ಪ್ರೇಕ್ಷಕರನ್ನು ಮಂತ್ರ ಮುಗ್ಧಗೊಳಿಸಿದರು. ವಿಶೇಷವೆಂದರೆ ಯಾವುದೇ ಪ್ರಸಾಧನಗಳಿಲ್ಲದೇ ಸಹಜ ಶಾಲಾ ಸಮವಸ್ತ್ರದಲ್ಲೆ ನಟಿಸಿ, ಕಥೆಯಿಂದ ಕಥೆಗೆ ಬೇಕಾಗುವ ಹಿನ್ನೆಲೆಯ ರಂಗ ಪರಿಕರಗಳನ್ನು ತಾವೇ ಕ್ಷಣದೊಳಗೆ ಬದಲಾಯಿಸುತ್ತಾ ಮುಂದೆ ಸಾಗುತ್ತಿದ್ದುದು ಪ್ರಶಂಸಾರ್ಹವಾಗಿತ್ತು. 

ಇಂತಹ ಹೊಸತನದ ನಾಟಕಕ್ಕೆ ಎಳೆಯರನ್ನು ಅಣಿಗೊಳಿಸಿದ ಡಾ| ಶ್ರೀಪಾದ ಭಟ್‌ ಮತ್ತು ಅವರ ತಂಡ, ರಂಗ ಪರಿಕರ ತಜ್ಞ ರಾಜು ಮಣಿಪಾಲ ಹಾಗೂ ತನ್ನ ಶಾಲಾ ಎಳೆಯರೊಂದಿಗೆ ಇತರ ಎಳೆಯರಲ್ಲಿಯೂ ರಂಗ ಚಟುವಟಿಕೆಗಳ ಬಗ್ಗೆ ಆಸಕ್ತಿ ಹುಟ್ಟಿಸಿ, ಅಂತಹ ಶಿಬಿರಗಳನ್ನು ಏರ್ಪಡಿಸುತ್ತಾ ಅವರಲ್ಲಿ ರಂಗಾಸಕ್ತಿಯನ್ನು ಮೂಡಿಸುತ್ತಿರುವ ಸಾಹಿತಿ, ರಂಗ ನಿರ್ದೇಶಕಿ ಹಾಗೂ ಶಾಲಾ ಪ್ರಂಶುಪಾಲೆ ಅಭಿಲಾಷಾ ಮತ್ತು ಶಾಲಾ ಆಡಳಿತ ಮಂಡಳಿಯನ್ನು ಅಭಿನಂದಿಸಲೇಬೇಕು.

ಕೆ. ದಿನಮಣಿ ಶಾಸ್ತ್ರೀ