ಸಿನಿಯಕೋವಾ ಚಾಂಪಿಯನ್‌; ವೋಜ್ನಿಯಾಕಿಗೆ ಈ ವರ್ಷದ 5ನೇ ಫೈನಲ್‌ ಸೋಲು!

ಬಸ್ಟಾಡ್‌ (ಸ್ವೀಡನ್‌): ಜೆಕ್‌ ಗಣರಾಜ್ಯದ ಕ್ಯಾಥರಿನಾ ಸಿನಿಯ ಕೋವಾ “ಬಸ್ಟಾಡ್‌ ಕ್ಲೇ ಕೋರ್ಟ್‌ ಟೆನಿಸ್‌’ ಪ್ರಶಸ್ತಿಯನ್ನೆತ್ತಿದ್ದಾರೆ. ಭಾರೀ ಮಳೆಯಿಂದ ವಿಳಂಬ ಗೊಂಡ ರವಿವಾರ ರಾತ್ರಿಯ ಫೈನಲ್‌ನಲ್ಲಿ ಅವರು ಡೆನ್ಮಾರ್ಕ್‌ನ ಕ್ಯಾರೋಲಿನ್‌ ವೋಜ್ನಿಯಾಕಿ ವಿರುದ್ಧ 6-3, 6-4 ಅಂತರದ ಜಯ ಸಾಧಿಸಿದರು. 

ಇದು 21ರ ಹರೆಯದ, ವಿಶ್ವ ರ್‍ಯಾಂಕಿಂಗ್‌ನಲ್ಲಿ 56ನೇ ಕ್ರಮಾಂಕ ದಲ್ಲಿರುವ ಸಿನಿಯಕೋವಾ ಪಾಲಾದ ಟೆನಿಸ್‌ ಬಾಳ್ವೆಯ ಕೇವಲ 2ನೇ ಪ್ರಶಸ್ತಿ. ಇದಕ್ಕೂ ಮುನ್ನ ಅವರು ಕಳೆದ ವರ್ಷ “ಶೆಂಜೆನ್‌ ಟೆನಿಸ್‌ ಟೂರ್ನಿ’ಯಲ್ಲಿ ಚಾಂಪಿಯನ್‌ ಆಗಿ ಮೂಡಿಬಂದಿದ್ದರು. ಕಳೆದ ವರ್ಷ ಬಸ್ಟಾಡ್‌ ಫೈನಲ್‌ನಲ್ಲಿ ಸಿನಿಯಕೋವಾ ಜರ್ಮನಿಯ ಲಾರಾ ಸಿಗ¾ಂಡ್‌ ಕೈಯಲ್ಲಿ ಸೋಲನುಭವಿಸಿದ್ದರು.

ಇನ್ನೊಂದೆಡೆ ಕ್ಯಾರೋಲಿನ್‌ ವೋಜ್ನಿಯಾಕಿ ಈ ವರ್ಷ ಸರ್ವಾಧಿಕ 42 ಪಂದ್ಯಗಳನ್ನು ಗೆದ್ದ ದಾಖಲೆ ಹೊಂದಿದ್ದರೂ 5ನೇ ಫೈನಲ್‌ನಲ್ಲಿ ಸೋಲು ಕಾಣಬೇಕಾಯಿತು. ಈ ವರ್ಷದ ದೋಹಾ ದುಬಾೖ, ಮಯಾಮಿ ಮತುತ ಈಸ್ಟ್‌ಬರ್ನ್ ಟೆನಿಸ್‌ ಪಂದ್ಯಾವಳಿಯ ಪ್ರಶಸ್ತಿ ಸಮರದಲ್ಲಿ ವೋಜ್ನಿಯಾಕಿಗೆ ಸೋಲೇ ಸಂಗಾತಿಯಾಗಿತ್ತು.

“ಇದೊಂದು ಕಠಿನ ಪಂದ್ಯವಾಗಿತ್ತು. ಸಿನಿಯಕೋವಾ ಅತ್ಯುತ್ತಮ ಪ್ರದರ್ಶನ ವಿತ್ತರು. ಅವರಿಗೆ ಅಭಿನಂದನೆಗಳು’ ಎಂದಿದ್ದಾರೆ ವೋಜ್ನಿಯಾಕಿ.