ಯಾರತ್ತ ಗುರಿ ಅಮೆರಿಕ, ಭಾರತ:ಯುದ್ಧಕ್ಕೆ ಸಿದ್ಧತೆ ನಡೆಸಿ…ಚೀನಾ ಸೇನೆಗೆ ಅಧ್ಯಕ್ಷ ಕ್ಸಿ ಸೂಚನೆ

ಬೀಜಿಂಗ್/ನವದೆಹಲಿ:ಒಂದೆಡೆ ಅಮೆರಿಕ ಜತೆ ಚೀನಾ ಸಂಘರ್ಷಕ್ಕೆ ಇಳಿದಿದ್ದು, ಮತ್ತೊಂದೆಡೆ ಲಡಾಖ್ ನ ಎಲ್ ಎಸಿ ಗಡಿ ವಿಚಾರದಲ್ಲಿ ಭಾರತದ ವಿರುದ್ಧ ಸೆಡ್ಡು ಹೊಡೆಯುತ್ತಿರುವ ನಡುವೆಯೇ ಎಲ್ಲಾ ರೀತಿಯಿಂದಲೂ “ಯುದ್ಧಕ್ಕೆ ಸಿದ್ಧತೆ” ನಡೆಸಿ ಎಂದು ಚೀನಾ ಅಧ್ಯಕ್ಷ ಕ್ಸಿ ಜಿನ್ ಪಿಂಗ್ ಸೇನೆಗೆ ಸೂಚನೆ ನೀಡಿರುವುದಾಗಿ ಕ್ಸಿನ್ ಹುವಾ ವರದಿ ಮಾಡಿದೆ.

ದೇಶದ ಸೇನಾಪಡೆ ಹೈ ಅಲರ್ಟ್ ಆಗಿದ್ದು, ನಿಮ್ಮೆಲ್ಲಾ ಮನಸ್ಸು ಮತ್ತು ಶಕ್ತಿಯನ್ನು ಯುದ್ಧದ ಸಿದ್ಧತೆಗೆ ವಿನಿಯೋಗಿಸಬೇಕು ಎಂದು ಕ್ಸಿ ನಿರ್ದೇಶನ ನೀಡಿರುವುದಾಗಿ ವರದಿ ವಿವರಿಸಿದೆ.

ನಮ್ಮ ಸೇನಾಪಡೆ ಸಂಪೂರ್ಣವಾಗಿ ನಿಷ್ಠಾವಂತ, ಸಂಪೂರ್ಣ ಶುದ್ಧ ಮತ್ತು ಸಂಪೂರ್ಣ ವಿಶ್ವಾಸಾರ್ಹವಾಗಿರಬೇಕು ಎಂದು ಕ್ಸಿ ಜಿನ್ ಪಿಂಗ್ ಅವರು ಚಾಝೌ ನಗರದ ಪಿಎಲ್ ಎ ಮೆರೈನ್ ಕಾರ್ಪ್ಸ್ ಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಮಾತನಾಡುತ್ತ ತಿಳಿಸಿರುವುದಾಗಿ ವರದಿ ಹೇಳಿದೆ.

ಮೂಲಗಳ ಪ್ರಕಾರ, ಚೀನಾ ಅಧ್ಯಕ್ಷ ಕ್ಸಿ ಈ ಹೇಳಿಕೆ ಭಾರತವನ್ನು ನೇರವಾಗಿ ಉದ್ದೇಶಿಸಿ ಹೇಳಿಲ್ಲ ಎನ್ನಲಾಗಿದೆ. ಆದರೂ ಲಡಾಖ್ ನಲ್ಲಿನ ಗಡಿ ವಿವಾದದ ಹಿನ್ನೆಲೆಯಲ್ಲಿ ಯುದ್ಧಕ್ಕೆ ಸಿದ್ದರಾಗಿರಿ ಎಂದು ಸೂಚನೆ ನೀಡಿರಬಹುದು ಎಂದು ವಿಶ್ಲೇಷಿಸಲಾಗುತ್ತಿದೆ.

ಇದನ್ನೂ ಓದಿ:ಬಿಹಾರ ರಾಜಕೀಯ ರಂಗು: ಮೂವರು ಸ್ಟಾರ್ ನಾಯಕರು… ಅಟಲ್ ಮೇಲಿನ ಕೋಪಕ್ಕೆ ಎಲ್ ಜೆಪಿ ಸ್ಥಾಪನೆ

ಅಮೆರಿಕ ಗುರಿ?

ಅಮೆರಿಕದ ಯುದ್ಧ ನೌಕೆ ತೈವಾನ್ ಜಲಸಂಧಿಯಲ್ಲಿ ಸಂಚರಿಸಿದ್ದು, ಅಮೆರಿಕ ಮತ್ತು ಚೀನಾ ನಡುವೆ ಸಂಘರ್ಷಕ್ಕೆ ಎಡೆಮಾಡಿಕೊಟ್ಟಿದೆ ಎಂದು ವರದಿ ಹೇಳಿದೆ. ಅಮೆರಿಕದ ಕ್ಷಿಪಣಿ ನಾಶಕ ಯುಎಸ್ ಎಸ್ ಅಕ್ಟೋಬರ್ 14ರಂದು ತೈವಾನ್ ಜಲಸಂಧಿ ಮೂಲಕ ಹಾದು ಹೋಗಿತ್ತು. ಈ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿರುವ ಚೀನಾ, ಎಚ್ಚರಿಕೆಯ ಸಂದೇಶವನ್ನು ರವಾನಿಸಿದೆ ಎಂದು ವರದಿ ಹೇಳಿದೆ.

ತೈವಾನ್ ನಲ್ಲಿ ಅಮೆರಿಕ ಯುದ್ಧ ನೌಕೆ ಸಂಚರಿಸಿರುವ ಘಟನೆ ಕಾಕತಾಳೀಯ ಎಂಬಂತೆ ಕ್ಸಿ ಜಿನ್ ಪಿಂಗ್ ಯುದ್ಧಕ್ಕೆ ಸಿದ್ದರಾಗಿ ಎಂಬ ಹೇಳಿಕೆ ನೀಡಿರುವುದು ಮೂರನೇ ಜಾಗತಿಕ ಯುದ್ಧದ ಮುನ್ಸೂಚನೆಯೇ ಎಂಬ ಬಗ್ಗೆ ವಿಶ್ಲೇಷಿಸಲಾಗುತ್ತಿದೆ.

ಲಡಾಖ್ ನಲ್ಲಿಯೂ ನಿಲ್ಲದ ಜಟಾಪಟಿ:

ಲಡಾಖ್ ಗಡಿಯಲ್ಲಿಯೂ ಸತತವಾಗಿ ಕಳೆದ ಮೂರು ತಿಂಗಳಿನಿಂದ ಭಾರತ ಮತ್ತು ಚೀನಾ ನಡುವೆ ಸಂಘರ್ಷ ನಡೆಯುತ್ತಲೇ ಇದೆ. ಅಷ್ಟೇ ಅಲ್ಲ ಗಡಿ ಪ್ರದೇಶದಲ್ಲಿ ಭಾರತ ಸೇನೆಯನ್ನು ಭಾರೀ ಪ್ರಮಾಣದಲ್ಲಿ ರವಾನಿಸಿದೆ. ಚೀನಾ ಕೂಡಾ ಸೇನೆಯನ್ನು ನಿಯೋಜಿಸಿದೆ. ಯುದ್ಧ ವಿಮಾನ, ಯುದ್ಧ ಟ್ಯಾಂಕ್, ರಫೇಲ್ ನಿಯೋಜನೆ ಯುದ್ಧದ ಭೀತಿಯನ್ನು ಮೂಡಿಸಿದೆ ಎಂದು ವರದಿ ತಿಳಿಸಿದೆ.