Dam: ವಿಶ್ವದ ಅತಿದೊಡ್ಡ ಅಣೆಕಟ್ಟೆ ಕಟ್ಟಲು ಮುಂದಾದ ಚೀನ

ಹೊಸದಿಲ್ಲಿ: ಭಾರತದ ಗಡಿಗೆ ಸಮೀಪವಿರುವ ಬ್ರಹ್ಮಪುತ್ರ ನದಿಗೆ ಅಡ್ಡಲಾಗಿ ಜಗತ್ತಿನ ಅತಿದೊಡ್ಡ ಅಣೆಕಟ್ಟು ನಿರ್ಮಿಸುವ ಜಲ ವಿದ್ಯುತ್‌ ಯೋಜನೆಗೆ ಅಧ್ಯಕ್ಷ ಕ್ಸಿ-ಜಿನ್‌ ಪಿಂಗ್‌ ನೇತೃತ್ವದ ಸರಕಾರ ಅನುಮೋದನೆ ನೀಡಿದೆ. ಈ ಮೂಲಕ ಭಾರತಕ್ಕೆ ಚೀನದಿಂದ ಮತ್ತೊಂದು ಅಪಾಯ ಎದುರಾದಂತಾಗಿದೆ.

ವಿಶ್ವದ ಅತಿದೊಡ್ಡ ಅಣೆಕಟ್ಟಾದ ಚೀನದ ತ್ರೀ ಗಾರ್ಜಸ್‌ ಅಣೆಕಟ್ಟಿಗಿಂತ ಈ ಅಣೆಕಟ್ಟು ದೊಡ್ಡದಾಗಿರಲಿದ್ದು, 11.67 ಲಕ್ಷ ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲು ಯೋಜಿಸಲಾಗಿದೆ. ಇದರಿಂದ ಬ್ರಹ್ಮಪುತ್ರ ನದಿಯ ಸಂಪೂರ್ಣ ನಿಯಂತ್ರಣ ಚೀನದ ಹಿಡಿತಕ್ಕೆ ಸಿಲುಕುವ ಮೂಲಕ ನದಿ ಪಾತ್ರದ ಕೆಳಗಿರುವ ದೇಶಗಳಾದ ಭಾರತ, ಬಾಂಗ್ಲಾಗೆ ಪ್ರವಾಹದ ಭೀತಿ ಎದುರಾಗಲಿದೆ.

ಭಾರತಕ್ಕೇನು ತೊಂದರೆ?: ಬ್ರಹ್ಮಪುತ್ರ ನದಿ ಅರುಣಾಚಲ ಪ್ರವೇಶಿಸಲು “ಯು ಟರ್ನ್’ ತೆಗೆದುಕೊಳ್ಳುವ ಜಾಗದಲ್ಲಿ ಅಣೆಕಟ್ಟು ನಿರ್ಮಿಸಿದರೆ ನದಿಯ ಹರಿವಿನ ನಿಯಂತ್ರಣ ಚೀನದ ಕೈಯಲ್ಲಿ ಇರಲಿದೆ. ಹರಿವು ಹೆಚ್ಚಿಸಿದರೆ ಭಾರತದ ಗಡಿ ಪ್ರದೇಶಗಳು ಪ್ರವಾಹದಲ್ಲಿ ಮುಳುಗಿ ಹೋಗುವ ಸಾಧ್ಯತೆಗಳಿದೆ.