ಮೈಸೂರಲ್ಲಿ ಮಕ್ಕಳ ಹಬ್ಬದ ಸಂಭ್ರಮ 

ಮೈಸೂರು: ಪ್ರವಾಸಿಗರ ನೆಚ್ಚಿನ ತಾಣವಾಗಿರುವ ಸಾಂಸ್ಕೃತಿಕ ನಗರಿ ಮೈಸೂರಿನೆಲ್ಲೆಡೆ ಮಂಗಳವಾರ ಚಿಣ್ಣರ ಚಿಲಿಪಿಲಿ ಜೋರಾಗಿತ್ತು. ನಿತ್ಯವೂ ಶೈಕ್ಷಣಿಕ ಚಟುವಟಿಕೆಗಳಲ್ಲಿ ತೊಡಗಿರುವ ಪುಟಾಣಿಗಳು ಮಕ್ಕಳ ದಿನಾಚರಣೆ ಅಂಗವಾಗಿ ನಗರದ ವಿವಿಧೆಡೆಗಳಲ್ಲಿ ನಡೆದ ಹಲವು ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ ಸಂಭ್ರಮಿಸಿದರು.

ಆಟೋಟದಲ್ಲಿ ಮಿಂಚಿದರು: ಅವರೆಲ್ಲರೂ ಮನೆಯಿಲ್ಲದೆ ಅಲೆಮಾರಿ ಜೀವನ ಸಾಧಿಸುವ ಮಕ್ಕಳು, ಊರೂರು ಸುತ್ತುತ್ತಾ ಬದುಕು ಸಾಗಿಸುವ ಪುಟಾಣಿಗಳು ಮಕ್ಕಳ ದಿನಾಚರಣೆಯನ್ನು ವಿಭಿನ್ನವಾಗಿ ಆಚರಿಸಿದರು. ಗ್ರಾಮೀಣ ಶಿಕ್ಷಣ ಮತ್ತು ಆರೋಗ್ಯ ಸಂಸ್ಥೆ(ಆರ್‌ಎಲ್‌ಎಚ್‌ಪಿ)ಯಿಂದ ಮಕ್ಕಳ ದಿನಾಚರಣೆ ಅಂಗವಾಗಿ ಆಚರಿಸಲಾದ ವಿವಿಧ ಆಟೋಟ ಸ್ಪರ್ಧೆಗಳು ಎಲ್ಲರ ಗಮನ ಸೆಳೆಯಿತು.

ಹಗ್ಗಜಗ್ಗಾಟ, ಲಗೋರಿ, ಗೋಣಿಚೀಲದಲ್ಲಿ ಓಡುವ ಸ್ಪರ್ಧೆ, ಮ್ಯೂಸಿಕಲ್‌ ಚೇರ್‌ ಸ್ಪರ್ಧೆಗಳು ಮಕ್ಕಳ ಹಬ್ಬದ ಸಂಭ್ರಮವನ್ನು ಹೆಚ್ಚಿಸಿತು. ಈ ವಿಶೇಷ ಮಕ್ಕಳ ದಿನಾಚರಣೆ ಕಾರ್ಯಕ್ರಮದಲ್ಲಿ ರಾಜಸ್ಥಾನ, ಮಹಾರಾಷ್ಟ್ರ ಇನ್ನಿತರ ಕಡೆಗಳಿಂದ ವಲಸೆ ಬಂದಿರುವ 40ಕ್ಕೂ ಹೆಚ್ಚು ಮಕ್ಕಳು ಭಾಗವಹಿಸಿದ್ದರು. ನಗರದ ಕೋಟೆ ಆಂಜನೇಯಸ್ವಾಮಿ ದೇವಸ್ಥಾನದ ಆವರಣದಲ್ಲಿ ಮಕ್ಕಳ ಆರೋಗ್ಯ ತಪಾಸಣೆ ಹಾಗೂ ಪರಿಸರ ಸಂರಕ್ಷಣೆ, ಬಾಲಕಾರ್ಮಿಕ ಪದ್ಧತಿ ಕುರಿತು ಚಿತ್ರಕಲಾ ಸ್ಪರ್ಧೆ ನಡೆಸಲಾಯಿತು.

ಇದೇ ವೇಳೆ ಸಂಸ್ಥೆ ವತಿಯಿಂದ ಮಕ್ಕಳಿಗೆ ಕರ್ಚಿಪ್‌, ಸೋಪು, ಕೊಕನೆಟ್‌ಆಯಿಲ್‌, ಟೂತ್‌ಬ್ರೆಷ್‌, ನೈಲ್‌ಕಟರ್‌ ಒಳಗೊಂಡ ವಿಶೇಷ ಕಿಟ್‌ ವಿತರಿಸಲಾಯಿತು. ಇದಕ್ಕೂ ಮುನ್ನ ಕ್ಷೇತ್ರ ಶಿಕ್ಷಣಾಧಿಕಾರಿ ನಾಗರಾಜ್‌, ಡಿಸಿಪಿಒ ಕುಮಾರಸ್ವಾಮಿ, ಕಾರ್ಯಕ್ರಮದ ಸಂಯೋಜಕ ನಾಗೇಂದ್ರ, ಆಶಾಕಿರಣ್‌, ಮಮತ, ಶಿವರಾಜ್‌, ಪ್ರವೀಣ್‌, ಯೋಗೇಶ್‌ ಇದ್ದರು.

ತಾರೇ ಜಮೀನ್‌ ಪರ್‌: ರೌಂಡ್‌ಟೇಬಲ್‌ ಇಂಡಿಯಾ ಮೈಸೂರು ಶಾಖೆ ಅಮಿಟಿರೌಂಡ್‌ಟೇಬಲ್‌ ಮತ್ತು ಮೈಸೂರು ಅಮಿಟಿ ಲೇಡಿಸ್‌ ಸರ್ಕಲ್‌ ವತಿಯಿಂದ ವಿಶೇಷ ಮಕ್ಕಳಿಗಾಗಿ ತಾರೆಜಮೀನ್‌ ಪರ್‌ ಚಿತ್ರಕಲಾ ಸ್ಪರ್ಧೆ ನಡೆಸಲಾಯಿತು. ಸ್ಪರ್ಧೆಯ ಪ್ರಾಥಮಿಕ ವಿಭಾಗದಲ್ಲಿ ಮರ್ಸಿ ಶಾಲೆ ವಿದ್ಯಾರ್ಥಿಗಳಾದ ಜಿ.ಎಚ್‌.ನಾಗರಾಜ್‌(ಪ್ರ), ಅನಿತಾ(ದ್ವಿ), ಚೈತನ್ಯ(ತೃ) ಸ್ಥಾನ ಪಡೆದರು.

ಮಾಧ್ಯಮಿಕ ವಿಭಾಗದಲ್ಲಿ ಎಂ.ರಾಜು(ಪ್ರ), ರವಿತೇಜ(ದ್ವಿ) ಹಾಗೂ ದರ್ಶನ್‌(ತೃ) ಸ್ಥಾನ ಪಡೆದರು. ಪ್ರೌಢಶಾಲಾ ವಿಭಾಗದಲ್ಲಿ ಸಾಯಿರಂಗ ಶಾಲೆಯ ಗೌತಮ್‌, ಯುವರಾಜ್‌ ಹಾಗೂ ಪುಟ್ಟವೀರಮ್ಮ ಶಾಲೆಯ ಮೋನಿಶಾ ಮೊದಲ 3 ಬಹುಮಾನ ತಮ್ಮದಾಗಿಸಿಕೊಂಡರು. ಈ ವೇಳೆ ಮೈಸೂರು ಅಮಿಟಿರೌಂಡ್‌ಟೇಬಲ್‌ ಇಂಡಿಯಾದ ಅಧ್ಯಕ್ಷ ಅನಿರುದ್ಧ, ಪ್ರದೇಶ ಚೇರ್ಮನ್‌, ಮಯೂರ್‌ ಇದ್ದರು.

ಕಾಗದದ ದೋಣಿ ಬಿಟ್ಟರು: ರಾಜ್ಯ ಸರ್ಕಾರ ಮೈಸೂರು ನಗರದ ರಸ್ತೆಗಳಲ್ಲಿರುವ ಗುಂಡಿ ಮುಚ್ಚಬೇಕೆಂದು ಒತ್ತಾಯಿಸಿ ಮಕ್ಕಳು ರಸ್ತೆಯಲ್ಲಿನ ಗುಂಡಿಗಳಿಗೆ ನೀರು ತುಂಬಿ ಕಾಗದದ ದೋಣಿ ಬಿಟ್ಟು ಆಟವಾಡಿದರು. ನಗರದ ಪ್ರಜಾnವಂತ ನಾಗರಿಕ ವೇದಿಕೆ ವತಿಯಿಂದ ಮಕ್ಕಳ ದಿನಾಚರಣೆ ಅಂಗವಾಗಿ ಮಹಾರಾಜ ಕಾಲೇಜು ಮೈದಾನದ ಪಕ್ಕದ ರಸ್ತೆಯ ಗುಂಡಿಗಳಿಗೆ ನೀರು ತುಂಬಿ ಕಾಗದದ ದೋಣಿ ತೇಲಿಬಿಟ್ಟರು.

ಪ್ರಜಾವಂತ ನಾಗರಿಕ ವೇದಿಕೆ ಅಧ್ಯಕ್ಷ ಜಗದೀಶ್‌ ಕಡಕೊಳ, ಕೆಎಂಪಿಕೆ ಚಾರಿಟಬಲ್‌ ಅಧ್ಯಕ್ಷ ವಿಕ್ರಂ ಅಯ್ಯಂಗಾರ್‌, ಬಿಜೆಪಿ ಮುಖಂಡ ಜೋಗಿಮಂಜು, ರಾಜೇಶ್‌, ಶ್ರೀಕಾಂತ್‌ ಕಶ್ಯಪ್‌, ಮೋಹನ್‌, ರಾಜಶೇಖರ್‌, ಮಕ್ಕಳಾದ ಶೀತಲ್‌, ಸಂಜನಾ, ರಮ್ಯಾ, ರಾಜೇಶ, ಗಗನ್‌ ಇದ್ದರು.