ಉರುಳಿಗೆ ಸಿಲುಕಿ 3 ವರ್ಷದ ಗಂಡು ಚಿರತೆ ಸಾವು

ಹುಣಸೂರು: ಪ್ರಾಣಿ ಬೇಟೆಗೆ ಹಾಕಿದ್ದ ಉರುಳಿಗೆ ಸಿಲುಕಿದ್ದ ಮೂರು ವರ್ಷದ ಗಂಡು ಚಿರತೆ ಸಾವನ್ನಪ್ಪಿರುವ ಘಟನೆ ತಾಲೂಕಿನ ಗುರುಪುರ ಬಳಿಯ ಹಳೇವಾರಂಚಿ ರಸ್ತೆ ಬದಿಯ ಬೇಲಿ ಬಳಿಯಲ್ಲಿ ನಡೆದಿದೆ.

ಗ್ರಾಮದ ಸಾದಿಕ್‌ ಇಕ್ಬಾಲ್‌ ಅವರಿಗೆ ಸೇರಿದ ಜಮೀನಿನ ಬಳಿ ಹಾಕಿದ್ದ ಉರುಳಿಗೆ ಸಿಲುಕಿದ್ದ ಚಿರತೆಯು ಒದ್ದಾಡಿ, ಚೀರಾಟ ನಡೆಸುತ್ತಿದ್ದುದ್ದನ್ನು ಕಂಡ ಗ್ರಾಮಸ್ಥರು ಅರಣ್ಯ ಇಲಾಖೆಗೆ ಮಾಹಿತಿ  ನೀಡಿದರು. ಬಳಿಕ ಎಸಿಎಫ್‌ ಸೋಮಪ್ಪ, ಆರ್‌ಎಫ್‌ಒ ಸಂದೀಪ್‌ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ಧಾವಿಸುವಷ್ಟರಲ್ಲಿ ಚಿರತೆ ಸಾವನ್ನಪ್ಪಿತ್ತು. ಚಿರತೆಯ ಶವವನ್ನು ಮರಣೋತ್ತರ ಪರೀಕ್ಷೆ ನಡೆಸಿದ ನಂತರ ಕಲ್‌ಬೆಟ್ಟ ಅರಣ್ಯ ಪ್ರದೇಶದಲ್ಲಿ ಸುಟ್ಟು ಹಾಕಲಾಯಿತು ಎಂದು ಆರ್‌ಎಫ್‌ಒ ಸಂದೀಪ್‌ ತಿಳಿಸಿದ್ದಾರೆ.