ಚಾರ್ಮಾಡಿ ಘಾಟಿ: ಗೊಬ್ಬರ ಸಾಗಾಟದ ಲಾರಿ ಪಲ್ಟಿ

ಬೆಳ್ತಂಗಡಿ: ಚಾರ್ಮಾಡಿ ಘಾಟಿ  ರಸ್ತೆಯ 10ನೇ ತಿರುವಿನಲ್ಲಿ ಗೊಬ್ಬರ ಸಾಗಿಸುವ ಲಾರಿಯೊಂದು ರವಿವಾರ ಬೆಳಗ್ಗೆ ಪಲ್ಟಿಯಾಗಿ ಕೊಂಚ ಹೊತ್ತು ಟ್ರಾಫಿಕ್‌ ಜಾಮ್‌ ಉಂಟಾಗಿತ್ತು.

ರವಿವಾರ ಬೆಳಗ್ಗೆ 7.30ರ ಸುಮಾರಿಗೆ ಘಟನೆ ನಡೆದಿದ್ದು, 10.30ರ ತನಕ ಸುಗಮ ಸಂಚಾರಕ್ಕೆ ಅಡ್ಡಿಯಾಗಿತ್ತು. ಹಸನಬ್ಬ ಚಾರ್ಮಾಡಿ ಹಾಗೂ ಇತರ ಸ್ಥಳೀಯರು ಸ್ಥಳಕ್ಕೆ ತೆರಳಿ ಲಾರಿಯಲ್ಲಿ ತುಂಬಿದ್ದ ಕುರಿ ಗೊಬ್ಬರವನ್ನು ಖಾಲಿ ಮಾಡಿ ಲಾರಿಯನ್ನು ರಸ್ತೆಯಿಂದ ತೆರವುಗೊಳಿಸಲು ಶ್ರಮಿಸಿದರು.

ಲಾರಿಯನ್ನು ಕೊಟ್ಟಿಗೆಹಾರದಿಂದ ಕ್ರೇನ್‌ ತರಿಸಿ, ಸಮರ್ಪಕ ಸ್ಥಿತಿಗೆ ತರಲಾಯಿತು. ಚಾರ್ಮಾಡಿ ಘಾಟಿ ರಸ್ತೆಯಲ್ಲಿ ಬಹುತೇಕ ಕಡೆ ಬೃಹತ್‌ ಹೊಂಡಗಳು ಸೃಷ್ಟಿಯಾಗಿದ್ದು, ಪದೇಪದೆ ಲಾರಿಗಳು ಹೊಂಡಕ್ಕೆ ಸಿಲುಕಿ ಪಲ್ಟಿಯಾಗುವ ಘಟನೆಗಳು ನಡೆಯುತ್ತಲೇ ಇದೆ. ಹೀಗಾಗಿ ಹೆದ್ದಾರಿಯ ಹೊಂಡ ಮುಚ್ಚುವುದಕ್ಕೆ ಬೇಡಿಕೆ ಕೇಳಿಬರುತ್ತಿದೆ.