ವಿಚ್ಛೇದನಕ್ಕೆ ಕುಷ್ಠರೋಗ ಕಾರಣ ನೀಡುವಂತಿಲ್ಲ

ಹೊಸದಿಲ್ಲಿ: ವಿಚ್ಛೇದನ ಪಡೆಯಲು ಬಾಳಸಂಗಾತಿಗೆ ಕುಷ್ಠ ರೋಗವಿದೆ ಎಂಬ ಕಾರಣವನ್ನು ಇನ್ನು ನೀಡುವಂತಿಲ್ಲ. ಈ ಸಂಬಂಧ ಹೊಸ ಮಸೂದೆಗೆ ಕೇಂದ್ರ ಸಂಪುಟ ಅನುಮೋದನೆ ನೀಡಿದೆ. ವೈಯಕ್ತಿಕ ಕಾನೂನು (ತಿದ್ದುಪಡಿ) ಮಸೂದೆ 2018ರ ಅಡಿಯಲ್ಲಿ ಈ ವಿವರವನ್ನು ಸೇರಿಸಲಾಗಿದೆ. ಈ ಕಾನೂನು ರೂಪಿಸುವಾಗ ಕುಷ್ಠರೋಗವನ್ನು ಸಂಪೂರ್ಣವಾಗಿ ನಿವಾರಿಸುವ ಚಿಕಿತ್ಸೆ ಲಭ್ಯವಿರಲಿಲ್ಲ. ಹೀಗಾಗಿ ವಿಚ್ಛೇದನಚಕ್ಕೆ ಕಾರಣಗಳ ಪಟ್ಟಿಯಲ್ಲಿ ಕುಷ್ಠರೋಗವನ್ನೂ ಸೇರಿಸಲಾಗಿತ್ತು. ಆದರೆ ಈಗ ಕುಷ್ಠರೋಗದಿಂದ ವ್ಯಕ್ತಿ ಸಂಪೂರ್ಣ ಗುಣವಾಗಬಹುದಾದ್ದರಿಂದ ಕಾನೂನಿಗೆ ತಿದ್ದುಪಡಿ ತರಲು ನಿರ್ಧರಿಸಲಾಗಿದೆ.

96 ಸಾವಿರ ಕೋಟಿ ಸಂಗ್ರಹ: ಜುಲೈ ತಿಂಗಳಿನಲ್ಲಿ ಜಿಎಸ್‌ಟಿ 96,483 ಕೋಟಿ ರೂ. ಸಂಗ್ರಹವಾಗಿದೆ. ಇದು ಕಳೆದ ತಿಂಗಳಿಗಿಂತಲೂ ಹೆಚ್ಚಿನ 873 ಕೋಟಿ ರೂ. ಹೆಚ್ಚಾಗಿದೆ. ಅಲ್ಲದೆ ಜುಲೈನಲ್ಲಿ ಜಿಎಸ್‌ಟಿ ಸಲ್ಲಿಸಿದವರ ಸಂಖ್ಯೆಯೂ 66 ಲಕ್ಷಕ್ಕೆ ಏರಿಕೆಯಾಗಿದೆ. ಜೂನ್‌ನಲ್ಲಿ ಇದು 64.69  ಲಕ್ಷ ಆಗಿತ್ತು.  

ಸಂಪುಟ ಒಪ್ಪಿಗೆ: ಐಡಿಬಿಐ ಬ್ಯಾಂಕ್‌ನಲ್ಲಿ ಶೇ. 51ರಷ್ಟು ಹೂಡಿಕೆ ಮಾಡಲು ಎಲ್‌ಐಸಿ ಪ್ರಸ್ತಾವನೆಯನ್ನೂ ಸಂಪುಟ ಅನುಮೋದಿ ಸಿದೆ. ನಷ್ಟದಲ್ಲಿರುವ ಐಡಿಬಿಐ ಬ್ಯಾಂಕ್‌ನಲ್ಲಿ ಎಲ್‌ಐಸಿ ಪಾಲನ್ನು ಹೆಚ್ಚಿಸುವುದಕ್ಕೆ ಸಂಬಂಧಿಸಿದಂತೆ ಈಗಾಗಲೇ ವಿಮಾ ನಿಯಂತ್ರಕ ಪ್ರಾಧಿಕಾರ ಐಆರ್‌ಡಿಎ ಅನುಮೋದನೆ ನೀಡಿತ್ತು.