ನಾಳೆ ಗರೀಬ್‌ ಕಲ್ಯಾಣ್‌ ರೋಜ್‌ಗಾರ್‌ ಯೋಜನೆ ಶುರು

ಹೊಸದಿಲ್ಲಿ: ಪ್ರಧಾನಿ ನರೇಂದ್ರ ಮೋದಿ  ಜೂ.­20ರಂದು 50 ಸಾವಿರ ಕೋಟಿ ರೂ. ಮೌಲ್ಯದ ಗರೀಬ್‌ ಕಲ್ಯಾಣ್‌ ರೋಜ್‌ಗಾರ್‌ ಅಭಿಯಾನಕ್ಕೆ ಚಾಲನೆ ನೀಡಲಿದ್ದಾರೆ.

ಲಾಕ್‌ಡೌನ್‌ ಸಮಯ­ದಲ್ಲಿ ತವರು ರಾಜ್ಯಗಳಿಗೆ ಮರಳಿ­ರುವ ವಲಸೆ ಕಾರ್ಮಿಕರಿಗೆ ಉದ್ಯೋಗ ಕಲ್ಪಿಸುವ ಸಂಬಂಧ ರೂಪಿಸಲಾದ ಈ ಯೋಜನೆಯು 6 ರಾಜ್ಯಗಳ ಕಾರ್ಮಿಕರಿಗೆ ನೆರವಾಗಲಿದೆ.

ಈ ಬಗ್ಗೆ ಸುದ್ದಿಗೋಷ್ಠಿ ನಡೆಸಿದ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಮಾಹಿತಿ ನೀಡಿದ್ದಾರೆ.

ಬಿಹಾರದ ಖಗಾರಿಯಾ ಜಿಲ್ಲೆಯ ತೆಲಿಹಾರ್‌ ಗ್ರಾಮದಲ್ಲಿ ವಿಡಿಯೊ ಕಾನ್ಫರೆನ್ಸ್‌ ಮೂಲಕ ಪ್ರಧಾನಿ ಅಭಿಯಾನಕ್ಕೆ ಚಾಲನೆ ನೀಡಲಿದ್ದಾರೆ. ಬಿಹಾರದ ಸಿಎಂ ನಿತೀಶ್‌ ಕುಮಾರ್‌ ಹಾಗೂ ಡಿಸಿಎಂ ಸುಶೀಲ್‌ ಮೋದಿ ಉಪಸ್ಥಿತರಿರುವರು. ಒಟ್ಟು 125 ದಿನಗಳ ಬೃಹತ್‌ ಅಭಿಯಾನ ಇದಾ­ಗಿದೆ.

ಬಿಹಾರ, ಉತ್ತರ ಪ್ರದೇಶ, ಮಧ್ಯಪ್ರದೇಶ, ರಾಜಸ್ಥಾನ, ಜಾರ್ಖಂಡ್‌ ಮತ್ತು ಒಡಿಶಾ ರಾಜ್ಯದ 116 ಜಿಲ್ಲೆಗಳನ್ನು ಈ ಯೋಜನೆಗೆ ಆಯ್ಕೆಮಾಡ­ಲಾಗಿದೆ. ವಲಸೆ ಕಾರ್ಮಿಕರಿಗೆ ತಾವು ಇರುವ ಸ್ಥಳದಲ್ಲಿಯೇ 25 ಬಗೆಯ ಉದ್ಯೋಗ ಸೃಷ್ಟಿಸು­ವುದು ಯೋಜನೆಯ ಗುರಿಯಾಗಿದೆ.