ಸಿನಿಮಾ ಪೈರಸಿ ನಿಯಂತ್ರಣಕ್ಕೆ ಕೇಂದ್ರ ಸಜ್ಜು

ನವದೆಹಲಿ: ಭಾರತದಲ್ಲಿ ಸಿನಿಮಾ ಪೈರಸಿಗಳ ಕಡಿವಾಣಕ್ಕೆ ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವಾಲಯ ಹೊಸ ಹೆಜ್ಜೆ ಇಟ್ಟಿದೆ, ಸಿನಿಮ್ಯಾಟೋಗ್ರಫಿ ತಿದ್ದುಪಡಿ ಮಸೂದೆ: 2023 ಅನ್ನು ಪರಿಚಯಿಸಲು ನಿರ್ಧರಿಸಿದೆ.

ಈ ತಿದ್ದುಪಡಿಯಲ್ಲಿ ಪೈರಸಿಗೆ ದಂಡವನ್ನು ವಿಧಿಸುವುದರ ಬಗ್ಗೆಯೂ ಪ್ರಸ್ತಾಪಿಸಲಿದೆ. ವರದಿಗಳ ಪ್ರಕಾರ, ನೂತನ ತಿದ್ದುಪಡಿ ಅನ್ವಯ ಪೈರಸಿಗೆ ಕಾರಣವಾದವರು ಅಥವಾ ಪೈರಸಿ ಮಾಡಿದವರು ತಮ್ಮ ತಪ್ಪಿಗೆ ಭಾರೀ ಪ್ರಮಾಣದ ದಂಡ ತೆರಬೇಕಾಗುತ್ತದೆ. ಅದು ಸಿನಿಮಾ ನಿರ್ಮಾಣದ ಒಟ್ಟು ವೆಚ್ಚದ ಶೇ.5ರಷ್ಟು ಭಾಗ ಅಥವಾ 3 ಲಕ್ಷ ರೂ. ಆಗಿರಲಿದೆ. ಒಟ್ಟಾರೆ ಸಿನಿಮಾದ ನಿರ್ಮಾಣ ವೆಚ್ಚದ ಮೇಲೆ ಅದು ನಿರ್ಧರಿತವಾಗಲಿದ್ದು, ಯಾವುದು ಹೆಚ್ಚಿರುತ್ತದೋ ಅದನ್ನು ಪೈರಸಿ ಮಾಡಿದವರು ಭರಿಸಬೇಕಾಗುತ್ತದೆ ಎನ್ನಲಾಗಿದೆ.