ಕರಾಯ: ಚಿರತೆ ಹಿಡಿಯಲು ಬೋನಿಟ್ಟ ಅರಣ್ಯ ಇಲಾಖೆ 

ಉಪ್ಪಿನಂಗಡಿ: ಒಂದು ವಾರದಿಂದ ಪದೇ ಪದೇ ಕಾಣಿಸುತ್ತಿದ್ದ ಚಿರತೆ ತಣ್ಣೀರುಪಂತ ಗ್ರಾ.ಪಂ. ವ್ಯಾಪ್ತಿಯ ಅಳಕೆ ಎಂಬಲ್ಲಿ ಶನಿವಾರ ಹಗಲಲ್ಲೇ ಕಾಣಿಸಿದ್ದು, ಅರಣ್ಯ ಇಲಾಖೆ ಬೋನು ತಂದಿರಿಸಿ, ಚಿರತೆ ಸೆರೆಹಿಡಿಯಲು ಮುಂದಾಗಿದೆ.

ಕರಾಯ ಆಸುಪಾಸಿನಲ್ಲಿ ಒಂದು ವಾರದಿಂದ ಗ್ರಾಮಸ್ಥರ ಭೀತಿಗೆ ಕಾರಣವಾಗಿದ್ದ ಚಿರತೆ, ಸಾಕು ನಾಯಿಗಳನ್ನು ಬೇಟೆಯಾಡಿ, ಮರೆಯಾಗುತ್ತಿತ್ತು. ಶನಿವಾರ ಎರಡು ಚಿರತೆಗಳು ಗೋಚರಿಸಿವೆ ಎಂದು ಗ್ರಾಮಸ್ಥರು ಮಾಹಿತಿ ನೀಡಿದ ಹಿನ್ನೆಲೆಯಲ್ಲಿ ಅರಣ್ಯ ಇಲಾಖೆ ಬೋನು ತಂದಿರಿಸಿದೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಉಪ್ಪಿನಂಗಡಿ ವಲಯ ಅರಣ್ಯಾಧಿಕಾರಿ ಸಂಧ್ಯಾ, ಗ್ರಾಮಸ್ಥರಿಗೆ ಕಾಣಸಿಕ್ಕ ಪ್ರಾಣಿ ಚಿರತೆ ಎಂಬ ಕುರಿತು ಇಲಾಖೆಗೆ ಖಚಿತತೆ ಇಲ್ಲ. ಆದರೂ ಬೋನು ತಂದಿರಿಸಿ, ಸೆರೆಹಿಡಿಯುವ ಪ್ರಯತ್ನ ಮಾಡಿದ್ದೇವೆ. ಸ್ಥಳೀಯರು ‘ನಾಯಿ ಪಿಲಿ’ ಎಂದು ಕರೆಯುವ ಕತ್ತೆ ಕಿರುಬ ಆಗಿರುವ ಸಾಧ್ಯತೆಯೂ ಇದೆ ಎಂದು ತಿಳಿಸಿದ್ದಾರೆ.