ಟಿಪ್ಪು ಬದಲು ಒಡೆಯರ್‌ ಜಯಂತಿ ಆಚರಿಸಿ

ಬೆಂಗಳೂರು: ಪರ್ಷಿಯನ್‌ ಭಾಷೆಯನ್ನ ಆಡಳಿತ ಭಾಷೆಯನ್ನಾಗಿ ಮಾಡಿದ್ದ ಟಿಪ್ಪು ಜಯಂತಿಯನ್ನ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಆಚರಣೆ ಮಾಡೋದು, ಅರಣ್ಯ ಇಲಾಖೆ ಕಾಡುಗಳ್ಳ ವೀರಪ್ಪನ್‌ ಜಯಂತಿ ಆಚರಣೆ ಮಾಡಿದಂತೆ ಎಂದು ಸಂಸದ ಪ್ರತಾಪ್‌ಸಿಂಹ ಹೇಳಿದ್ದಾರೆ.

ಅಡ್ವೋಕೇಟ್ಸ್‌ ಫಾರ್‌ ಡೆಮೊಕ್ರಸಿ ಸಂಘಟನೆ ಆಯೋಜಿಸಿದ್ದ ವಿಚಾರ ಸಂಕೀರ್ಣದಲ್ಲಿ ಮಾತನಾಡಿ, ನಾವು ಕನಕ, ರಾಮ, ಹನುಮಂತ ಜಯಂತಿ ಆಚರಿಸುತ್ತೇವೆ. ಮಾಜಿ ಸಿಎಂ ಯಡಿಯೂರಪ್ಪ ಕನಕ ಜಯಂತಿ ಆಚರಣೆಗೆ ತಂದರು.

ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೈಸೂರಿನವರಾಗಿ, ನಾಲ್ವಡಿ ಕೃಷ್ಣರಾಜರ ಜಯಂತಿ ಆಚರಣೆ ಮಾಡುವುದಕ್ಕೆ ಆಗಲಿಲ್ಲವೇ ಎಂದು ಪ್ರಶ್ನಿಸಿದರು. ಟಿಪ್ಪು ಜಯಂತಿ ಆಚರಣೆ ಮೂಲಕ ಸಿದ್ದರಾಮಯ್ಯ ಕೇವಲ ರಾಜಕೀಯ ಮಾಡ್ತಿಲ್ಲ. ನಮ್ಮನ್ನ ಅಭಿಮಾನ ಶೂನ್ಯರನ್ನಾಗಿ ಮಾಡುತ್ತಿದ್ದಾರೆ ಎಂದರು.

ವಿಮರ್ಶಕ ಡಾ.ಜಿ.ಬಿ.ಹರೀಶ್‌ ಮಾತನಾಡಿ, ಬ್ರಿಟಿಷರು ಟಿಪ್ಪು ಹತ್ಯೆಗೈದು ಮನುಕುಲ ಒಳಿತು ಮಾಡಿದ್ದಾರೆ. ಟಿಪ್ಪು ಸಾವಿಗೀಡಾಗದಿದ್ದರೆ ಇಂದು ಮೈಸೂರು ಉಳಿಯುತ್ತಿರುಲಿಲ್ಲ. ಟಿಪ್ಪು ಕಾಟ ತಾಳಲಾರದೆ ಚಾಮರಾಜನಗರದ ಜೈನರು ವೈನಾಡಿಗೆ ಓಡಿಹೋದರು. ಟಿಪ್ಪು ಒಬ್ಬ ದಕ್ಷಿಣದ ಔರಂಗಾಜೇಬ… ಎಂದು ಹೇಳಿದರು. ನಿವೃತ್ತ ನ್ಯಾ.ಪದ್ಮರಾಜ್‌, ವಕೀಲರಾದ ಅಮೃತೇಶ್‌, ನಟರಾಜ್‌ಶರ್ಮಾ ಇತರರಿದ್ದರು.