ಶಾಲೆಗಳಲ್ಲಿ ಆಧಾರ್‌ ನೋಂದಣಿ ಕೇಂದ್ರ ತೆರೆಯಲು ಸಿಬಿಎಸ್‌ಇ ಸೂಚನೆ

ಹೊಸದಿಲ್ಲಿ: ಆಧಾರ್‌ ನೋಂದಣಿಗಾಗಿ ಸಿಬಿಎಸ್‌ಇ (ಕೇಂದ್ರೀಯ ಪ್ರೌಢ ಶಿಕ್ಷಣ ಮಂಡಳಿ) ಮಾನ್ಯತೆ ಪಡೆದಿರುವ ಶಾಲೆಗಳಲ್ಲಿ ಕೇಂದ್ರಗಳನ್ನು ತೆರೆಯುವಂತೆ ಸೂಚನೆ ನೀಡಲಾಗಿದೆ. ಆದರೆ ಇದನ್ನು ಕಡ್ಡಾಯಗೊಳಿಸಲಾಗಿಲ್ಲ. ಆಧಾರ್‌ ಕಾರ್ಡ್‌ ಹೊಂದಿರದ ವಿದ್ಯಾರ್ಥಿಗಳು ಆದಷ್ಟು ಬೇಗ ನೋಂದಣಿ ಮಾಡಲು ಅನುಕೂಲವಾಗುವಂತೆ ಈ ಕೇಂದ್ರಗಳನ್ನು ತೆರೆಯಲಾಗುತ್ತಿದೆ. ಇದೀಗ ಸಿಬಿಎಸ್‌ಇ ಭಾರತೀಯ ವಿಶಿಷ್ಟ ಗುರುತು ಚೀಟಿ ಪ್ರಾಧಿಕಾರದ ಪ್ರಮುಖ ಪಾಲುದಾರನಾಗಿರುವುರಿಂದ ವಿದ್ಯಾರ್ಥಿಗಳ ಬಯೋಮೆಟ್ರಿಕ್‌ ಮತ್ತು ವಿಳಾಸದ ಕುರಿತ ಮಾಹಿತಿಗಳನ್ನು ನೋಂದಾಯಿತ ಸಂಸ್ಥೆಗಳಿಂದಲೇ ನೇರವಾಗಿ ಪಡೆಯಬಹುದಾಗಿದೆ.  

ನಾಗರಿಕರ ಬಯೋಮೆಟ್ರಿಕ್‌ಗಳನ್ನು ನೇರವಾಗಿ ಇಲ್ಲವೇ ನೋಂದಾಯಿತಿ ಸಂಸ್ಥೆಗಳಿಂದ ಪಡೆಯಬಹುದಾಗಿದೆ. ಸದ್ಯ ಸಿಬಿಐಎಸ್‌ ದೇಶದಲ್ಲಿ 18,546 ನೋಂದಾಯಿತ ಶಾಲೆಗಳನ್ನು ಹೊಂದಿದ್ದರೆ, 25 ವಿವಿಧ ದೇಶಗಳಲ್ಲಿ 210 ಶಾಲೆಗಳನ್ನು ಹೊಂದಿವೆ. ಇನ್ನು ಆಧಾರ್‌ ನೋಂದಣಿಗಾಗಿ ಯಾವುದೇ ಶುಲ್ಕ ಪಡೆಯುವಂತಿಲ್ಲ. ಪ್ರತಿ ವಿದ್ಯಾರ್ಥಿಯ ನೋಂದಣಿಗೆ ತಲಾ 30 ರೂ.ಅನ್ನು ಸಿಬಿಎಸ್‌ಇ ಪಾವತಿ ಮಾಡಲಿದೆ.