ಸಿಬಿಎಸ್‌ಇ 10ನೇ ತರಗತಿ ಪರೀಕ್ಷೆವಿಪಿಎಂಗೆ ಸತತ ಶೇ. 100 ಫಲಿತಾಂಶ

ಮುಂಬಯಿ: ಮುಲುಂಡ್‌ ಪೂರ್ವದ ವಿದ್ಯಾ ಪ್ರಸಾರಕ ಮಂಡಳ ಹಾಗೂ ಮುಲುಂಡ್‌ ಕನ್ನಡ ಸಂಘದ ಬಿ. ಆರ್‌. ಟೋಲ್‌ ಆಂಗ್ಲ ಮಾಧ್ಯಮಕ್ಕೆ ಸಿಬಿಎಸ್‌ಇ 10ನೇ ತರಗತಿಯ ಪರೀಕ್ಷೆ ಯಲ್ಲಿ ಶೇ. 100 ಫಲಿತಾಂಶ ಲಭಿಸಿದೆ.

ಕಳೆದ 25 ವರ್ಷಗಳಿಂದ ಶತಪ್ರತಿಶತ ಫಲಿತಾಂಶ ಪಡೆಯುತ್ತಿರುವ ಈ ಶೈಕ್ಷಣಿಕ ಸಂಸ್ಥೆಗೆ 2018- 2019ನೇ ಶೈಕ್ಷಣಿಕ ಸಾಲಿನ ಪರೀಕ್ಷೆಯಲ್ಲಿ ಶೇ. 100 ಫಲಿತಾಂಶದೊಂದಿಗೆ ಇತಿಹಾಸ ನಿರ್ಮಿಸಿದೆ. ಶಾಲೆಯ ಪ್ರಣಿತಾ ರಾವ್‌ ಇವರು 500 ರಲ್ಲಿ 495 ಅಂಕಗಳನ್ನು ಪಡೆದು ಶಾಲೆಗೆ ಪ್ರಥಮ ಸ್ಥಾನಿಯಾದರೆ, ಆಫ್ರೀನ್‌ ಕೆರೋಸೆನೆವಾಲಾ ಅವರು 500ರಲ್ಲಿ 485 ಅಂಕಗಳನ್ನು ಗಳಿಸಿ ದ್ವಿತೀಯ ಸ್ಥಾನಿಯಾಗಿದ್ದಾರೆ. ವಿದ್ಯಾರ್ಥಿಗಳ ವಿಶೇಷ ಸಾಧನೆಯನ್ನು ಸಂಸ್ಥೆಯ ಶಿಕ್ಷಕ ವೃಂದದವರು ಅಭಿನಂದಿಸಿದ್ದಾರೆ.

ವಿಪಿಎಂ ಸುಂದರಿಬಾಯಿ ಮಂಜುನಾಥ್‌ ಕಾಮತ್‌ ಕನ್ನಡ ಪ್ರಾಥಮಿಕ ಶಾಲೆ, ವಿಪಿಎಂ ಕಣ್ಣನೂರ ಕೃಷ್ಣ ಪೈ ಕನ್ನಡ ಪ್ರೌಢಶಾಲೆ, ವಿಪಿಎಂ ವನಜಾ ಸುಂದರ ಶೆಟ್ಟಿ ಮೆಮೋರಿಯಲ್‌ ಜ್ಯೂನಿಯರ್‌ ಕಾಲೇಜು, ವಿಪಿಎಂಆರ್‌ಝಡ್‌ ಶಾØ ಕಲಾ, ವಿಜ್ಞಾನ ಹಾಗೂ ವಾಣಿಜ್ಯ ಮಹಾವಿದ್ಯಾಲಯ, ವಿಪಿಎಂ ಅರವಿಂದ ಮೆನನ್‌ ಅಂತಾ ರಾಷ್ಟ್ರೀಯ ಶಾಲೆ ಐರೋಲಿ, ವಿಪಿಎಂ ಅಂತಾರಾಷ್ಟ್ರೀಯ ಅಧ್ಯಯನ ಕೇಂದ್ರ, ವಿಪಿಎಂ ವೃತ್ತಿಪರ ಶಿಕ್ಷಣ ಸಂಸ್ಥೆಯನ್ನು ಹೊಂದಿರುವ ಈ ಶೈಕ್ಷಣಿಕ ಸಂಸ್ಥೆಯು 1957 ರಿಂದ ಶೈಕ್ಷಣಿಕ ಕ್ಷೇತ್ರದಲ್ಲಿ ವಿಶೇಷ ಸಾಧನೆಗಳನ್ನು ಮಾಡುತ್ತಿದೆ.