ಕಾರ್ಟೂನ್‌ ಕ್ಯಾಂಪ್‌ ವಿದ್ಯಾರ್ಥಿಗಳು ನಕ್ಕು ನಲಿದರು 

ಮಕ್ಕಳ ಪ್ರತಿಭಾ ವಿಕಸನದ ಮೊದಲ ಹೆಜ್ಜೆಯೇ ಶಾಲೆ. ಎಲ್ಲ ರೀತಿಯ ಜೀವನ ಕೌಶಲಗಳು ಮತ್ತು ಮೌಲ್ಯಶಿಕ್ಷಣ ಮಕ್ಕಳಿಗೆ ಶಾಲೆಯಲ್ಲಿ ಸಿಗುತ್ತದೆ. ಮಗು ಮನೆಯಲ್ಲಿ ಎಷ್ಟು ಕಲಿತರೂ ಅದು ಏಕಮುಖ ಶಿಕ್ಷಣವಾಗುತ್ತದೆ. ಶಾಲೆಯಲ್ಲಿ ವಿವಿಧ ವ್ಯಕ್ತಿತ್ವದ ಮಕ್ಕಳೊಂದಿಗೆ ಬೆರೆತು ಕಲಿಯುವ ಶಿಕ್ಷಣ ಬಹುಮುಖೀಯಾಗಿ ಪರಿಣಾಮಕಾರಿಯಾಗಿರುತ್ತದೆ. ಪಾಠಗಳೊಂದಿಗೆ ಪಠ್ಯೇತರ ಚಟುವಟಿಕೆಗಳೂ ಸೇರಿ ಶಾಲೆಯಲ್ಲಿ ವಿದ್ಯಾರ್ಥಿ ಪ್ರತಿಭೆ ಅರಳುತ್ತದೆ. 

ಮೆದುಳಿನ ಅರ್ಧಭಾಗದ ವಿಕಸನ ಪಾಠೇತರ ಚಟುವಟಿಕೆ ಯಿಂದ ಆಗುತ್ತದೆ ಎಂದು ಮನೋತಜ್ಞರು ಹೇಳುತ್ತಾರೆ. ಬರೇ ಪಾಠಗಳನ್ನು ಉರು ಹೊಡೆದು ಪರೀಕ್ಷೆಯಲ್ಲಿ ಹೆಚ್ಚು ಅಂಕ ಪಡೆದ ಮಾತ್ರಕ್ಕೆ ಮಕ್ಕಳು ಪ್ರತಿಭಾಸಂಪನ್ನರೆಂದು ಹೇಳಲಾಗದು. ಲಲಿತಕಲೆ- ಕುಶಲಕಲೆಗಳಲ್ಲಿ ಅವರ ತೊಡಗಿಸಿಕೊಳ್ಳುವಿಕೆ ಎಷ್ಟರ ಮಟ್ಟಿಗಿದೆ ಎನ್ನುವುದೂ ಮುಖ್ಯವಾಗುತ್ತದೆ. ಏಕೆಂದರೆ ಮನುಷ್ಯ ಭಾವಜೀವಿ. ಅವನಲ್ಲಿ ಭಾವನೆಗಳು ಅರಳಿದಾಗ ಅದನ್ನು ಪ್ರಸ್ತುತಪಡಿಸಲು ಇರುವ ಮಾಧ್ಯಮವೆಂದರೆ ಲಲಿತಕಲೆಗಳು. ಇವುಗಳಲ್ಲಿ ತನ್ನನ್ನು ತೊಡಗಿಸಿಕೊಳ್ಳುವ ಮೂಲಕ ನಮ್ಮ ಜೀವನದ ಬೇಸರಗಳನ್ನು ಮರೆತು ಪುನಶ್ಚೇತನಗೊಳ್ಳಲು ಸಾಧ್ಯವಾಗುತ್ತದೆ. ವಿದ್ಯಾರ್ಥಿಗಳಿಗೂ ಶಾಲಾ ಪಾಠಗಳ ಬೇಸರ ಮರೆತು ಪುನಶ್ಚೇತನಗೊಳ್ಳಲು ಮಧ್ಯೆ ಮಧ್ಯೆ ಕಲಾಚಟುವಟಿಕೆಗಳು ಅತ್ಯವಶ್ಯಕ. ಈ ಕ್ರಿಯೆ ಶಾಲೆಗಳಲ್ಲಿ ನಿರಂತರವಾದಾಗ ಮಕ್ಕಳ ಪ್ರತಿಭೆಯ ಅನಾವರಣವಾಗುತ್ತದೆ. ಅದಕ್ಕಾಗಿ ವಿಕಸನ ಶಿಬಿರಗಳು ಶಾಲೆಗಳಲ್ಲಿ ಆಗಾಗ್ಗೆ ನಡೆಯುತ್ತಿದ್ದರೆ ಚೆನ್ನ. ಇದಕ್ಕೆ ಪೂರಕವಾಗಿ ಉಡುಪಿ ವಳಕಾಡಿನ ಸರಕಾರಿ ಸಂಯುಕ್ತ ಪ್ರೌಢಶಾಲೆಯಲ್ಲಿ  ಒಂದು ದಿನದ ವ್ಯಂಗ್ಯಚಿತ್ರ (ಕಾರ್ಟೂನ್‌) ರಚನಾ ಶಿಬಿರ ನಡೆದು ಮಕ್ಕಳು ಖುಷಿಪಟ್ಟರು. ಅವರಲ್ಲಿ ಸುಪ್ತವಾಗಿರುವ ಪ್ರತಿಭೆಗಳು ಅನಾವರಣಗೊಂಡವು.

ಸಂಪನ್ಮೂಲ ವ್ಯಕ್ತಿಯಾಗಿ ಕಲಾವಿದ ಉಡುಪಿಯ ಜೀವನ್‌ ಶೆಟ್ಟಿ ಆಗಮಿಸಿ ವ್ಯಂಗ್ಯಚಿತ್ರ ಕಲೆಯನ್ನು ವೈಶಿಷ್ಟ್ಯಪೂರ್ಣವಾಗಿ ಕಲಿಸಿಕೊಟ್ಟರು. ವ್ಯಂಗ್ಯ ಚಿತ್ರ ರಚನೆಯ ಆರಂಭಿಕ ಹಂತಗಳು, ಬಳಸುವ ಚಿಹ್ನೆಗಳು, ವಿಕಸಿಸಿ ಬಿಡಿಸುವ ಭಾಗಗಳು, ನವರಸ ಭಾವಗಳನ್ನು ರೂಪಿಸುವ ನಕ್ಷೆಗಳನ್ನು ಚಿತ್ರಿಸಿ ತೋರಿಸಿದರು. ವಿದ್ಯಾರ್ಥಿಗಳಿಂದ ಮಾಡಿಸಿದರು. ಒಂದು ವಿಷಯವನ್ನು ಕೊಟ್ಟು ಅದರ ಬಗ್ಗೆ ವಿದ್ಯಾರ್ಥಿಗಳೇ ವ್ಯಂಗ್ಯಚಿತ್ರ ಬರೆಯುವಂತೆ ಪ್ರೇರೇಪಿಸಿದರು. ಕಿರು ವ್ಯಂಗ್ಯಚಿತ್ರ ಸ್ಪರ್ಧೆಯನ್ನೂ ನಡೆಸಿ ಬಹುಮಾನ ನೀಡಿದರು. ಶಿಬಿರದಲ್ಲಿ ಭಾಗವಹಿಸಿದ ಇನ್ನೂರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಆಸಕ್ತಿಯಿಂದ ಕಲಿತು ವೈಶಿಷ್ಟ್ಯಪೂರ್ಣ ವ್ಯಂಗ್ಯಚಿತ್ರಗಳನ್ನು ಚಿತ್ರಿಸಿದರು. ಒಬ್ಬರಿಗೊಬ್ಬರು ಚಿತ್ರ ತೋರಿಸಿ ಖುಷಿಪಟ್ಟರು. ನಕ್ಕು ನಲಿದರು. ಶಾಲಾ ಮುಖ್ಯೋಪಾಧ್ಯಾಯಿನಿ ನಿರ್ಮಲಾ ಬಿ. ಹಾಗೂ ಶಿಕ್ಷಕರು ಉಪಸ್ಥಿತರಿದ್ದು ವಿದ್ಯಾರ್ಥಿಗಳನ್ನು ಪ್ರೋತ್ಸಾಹಿಸಿದರು. ಚಿತ್ರಕಲಾ ಶಿಕ್ಷಕರು ಕಾರ್ಯಕ್ರಮವನ್ನು ಆಯೋಜಿಸಿದ್ದರು. ಕಾಟೂìನ್‌ ಶಿಬಿರ ವಿದ್ಯಾರ್ಥಿ ಪ್ರತಿಭಾ ವಿಕಸನಕ್ಕೆ ಪೂರಕವಾಯಿತು.

ಉಪಾಧ್ಯಾಯ ಮೂಡುಬೆಳ್ಳೆ