ಬೆಂಗಳೂರು: ಬಸ್ ಗೆ ಹಿಂಬದಿಯಿಂದ ಢಿಕ್ಕಿ ಹೊಡೆದ ಕಾರು; ಇಬ್ಬರು ಸ್ಥಳದಲ್ಲೇ ಸಾವು

ಬೆಂಗಳೂರು: ಬಸ್ ಗೆ ಕಾರು ಢಿಕ್ಕಿಯಾಗಿ ಇಬ್ಬರು ಸ್ಥಳದಲ್ಲೇ ಮೃತಪಟ್ಟ ಘಟನೆ ಕೆಂಗೇರಿ ನೈಸ್ ರಸ್ತೆಯಲ್ಲಿ ಗುರುವಾರ ಸಂಜೆ ನಡೆದಿದೆ.

ಚಾಲಕ ಸುಮುಖ್ (22) ಆತನ ಸ್ನೇಹಿತೆ  ಲೀನಾನಾಯ್ಡು (19) ಮೃತ ದುರ್ಧೈವಿಗಳು.

ಗುರುವಾರ ಸಂಜೆ 5:05 ಸುಮಾರಿಗೆ ಹೊಂಡಸಿಟಿ ಕಾರು ಕೆಂಗೇರಿಯ ನೈಸ್ ರಸ್ತೆಯಲ್ಲಿ ಪಿಇಎಸ್ ಕಾಲೇಜು ಕಡೆಯಿಂದ ಸೊಂಪುರ ಕಡೆಗೆ ವೇಗ ಹಾಗೂ ನಿರ್ಲಕ್ಷದಿಂದ ಚಾಲನೆ ಮಾಡಿಕೊಂಡು ಹೋಗುತ್ತಿದ್ದ ವೇಳೆ  ಬಿಡಿಎ ಟೋಲ್ ಬಳಿ ನಿಯಂತ್ರಣ ತಪ್ಪಿ  ಎದುರು ದಿಕ್ಕಿನಿಂದ ಪಕ್ಕದ ರಸ್ತೆಯಲ್ಲಿ ಚಾಲನೆ ಮಾಡಿಕೊಂಡು ಬರುತ್ತಿದ್ದ ಬಸ್ ಗೆ ಢಿಕ್ಕಿ ಹೊಡೆದು ಎರಡು ವಾಹನಗಳು ಪಲ್ಟಿಯಾಗಿದ್ದು, ಪರಿಣಾಮ ಕಾರಿನಲ್ಲಿದ್ದ ಇಬ್ಬರು ತೀವ್ರ ತರದ ರಕ್ತಗಾಯಗಳಿಂದ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ.

ಘಟನೆಯಲ್ಲಿ ಬಸ್ ಚಾಲಕನ ಕಾಲಿಗೆ ತೀವ್ರವಾದ ರಕ್ತಗಾಯಗಳಾಗಿದ್ದು, ಅದರಲ್ಲಿ ಪ್ರಯಾಣಿಸುತ್ತಿದ್ದವರಿಗೂ ಸಹ ಸಣ್ಣಪುಟ್ಟ ರಕ್ತಗಾಯಗಳಾಗಿವೆ.

ಕಾರು ಢಿಕ್ಕಿಯಾದ ಕಾರಣ ಕಾರಿನ ಟೈರ್ ಕಿತ್ತುಕೊಂಡು ಈ ಕಾರಿನ ಮುಂದೆ ಹೊಗುತ್ತಿದ್ದ ಮತ್ತೊಂದು ಕಾರಿನ ಹಿಂಭಾಗಕ್ಕೆ ಢಿಕ್ಕಿ ಹೊಡೆದು ಆ ವಾಹನ ಜಖಂಗೊಂಡಿದೆ.

ಕೆಂಗೇರಿ ಸಂಚಾರಿ ಠಾಣಾ ವ್ಯಾಪ್ಪತಿಯಲ್ಲಿ ಪ್ರಕರಣ ನಡೆದಿದೆ.