Asia Cup ; ನೇಪಾಲ ಎದುರು 10 ವಿಕೆಟ್‌ಗಳಿಂದ ಗೆದ್ದ ಭಾರತಕ್ಕೆ ಸೂಪರ್‌ ಫೋರ್‌ ಟಿಕೆಟ್‌

ಪಲ್ಲೆಕೆಲೆ (ಶ್ರೀಲಂಕಾ): ನೇಪಾಲ ಎದುರಿನ ಮಳೆಪೀಡಿತ ಪಂದ್ಯವನ್ನು ಡಿಎಲ್‌ಎಸ್‌ ನಿಯಮದಂತೆ 10 ವಿಕೆಟ್‌ಗಳಿಂದ ಗೆದ್ದ ಭಾರತ ಏಷ್ಯಾ ಕಪ್‌ ಕ್ರಿಕೆಟ್‌ ಪಂದ್ಯಾವಳಿಯ ಸೂಪರ್‌ ಫೋರ್‌ ಹಂತ ಪ್ರವೇಶಿಸಿದೆ.

ಭಾರತದ ಸಾಮಾನ್ಯ ಮಟ್ಟದ ಬೌಲಿಂಗ್‌ ಮತ್ತು ಕಳಪೆ ಕ್ಷೇತ್ರರಕ್ಷಣೆಯ ಲಾಭವೆತ್ತಿದ ನೇಪಾಲ 48.2 ಓವರ್‌ಗಳಲ್ಲಿ 230 ರನ್‌ ಪೇರಿಸಿತು. ಭಾರತಕ್ಕೆ 23 ಓವರ್‌ಗಳಲ್ಲಿ 145 ರನ್‌ ಗುರಿ ಲಭಿಸಿತು. 20.1 ಓವರ್‌ಗಳಲ್ಲಿ ಯಾವುದೇ ವಿಕೆಟ್‌ ಕಳೆದುಕೊಳ್ಳದೆ 147 ರನ್‌ ಬಾರಿಸಿತು. ಆಗ ರೋಹಿತ್‌ ಶರ್ಮ 74 ಮತ್ತು ಶುಭಮನ್‌ ಗಿಲ್‌ 67 ರನ್‌ ಬಾರಿಸಿ ಅಜೇಯರಾಗಿದ್ದರು.

ಮಳೆಯಿಂದಾಗಿ ನೇಪಾಲದ ಇನ್ನಿಂಗ್ಸ್‌ ವೇಳೆ ಒಂದು ಗಂಟೆಯಷ್ಟು ಆಟ ನಷ್ಟವಾಯಿತು. ಚೇಸಿಂಗ್‌ ವೇಳೆ ಭಾರತ 2.1 ಓವರ್‌ಗಳಲ್ಲಿ ವಿಕೆಟ್‌ ನಷ್ಟವಿಲ್ಲದೆ 17 ರನ್‌ ಗಳಿಸಿದ ವೇಳೆ ಮತ್ತೆ ಮಳೆಯಾಯಿತು. ರಾತ್ರಿ 10.15ಕ್ಕೆ ಪರಿಷ್ಕೃತ ಗುರಿಯೊಂದಿಗೆ ಪಂದ್ಯ ಪುನರಾರಂಭಗೊಂಡಿತು.

ಬೌಲಿಂಗ್‌ ಆಯ್ಕೆ
ಟಾಸ್‌ ಗೆದ್ದ ಭಾರತ ಮೊದಲು ಬೌಲಿಂಗ್‌ ಆಯ್ದುಕೊಂಡಿತು. ಬಹುಶಃ ಪಾಕಿಸ್ಥಾನ ವಿರುದ್ಧ ಬೌಲಿಂಗ್‌ ಅವಕಾಶ ಸಿಗದ ಕಾರಣ ರೋಹಿತ್‌ ಶರ್ಮ ಈ ನಿರ್ಧಾರ ತೆಗೆದುಕೊಂಡರೆಂಬುದು ಸ್ಪಷ್ಟ. ಆದರೆ ಇದೇ ನೇಪಾಲ ತಂಡ ಪಾಕಿಸ್ಥಾನ ವಿರುದ್ಧ 104ಕ್ಕೆ ಆಲೌಟ್‌ ಆಗಿತ್ತು. ಭಾರತದ ವಿರುದ್ಧ ಚೇತೋಹಾರಿ ಬ್ಯಾಟಿಂಗ್‌ ಪ್ರದರ್ಶಿ ಸಿತು. ಇದು ಭಾರತ-ನೇಪಾಲ ನಡುವಿನ ಮೊದಲ ಅಂತಾರಾಷ್ಟ್ರೀಯ ಪಂದ್ಯ ಎಂಬುದು ಉಲ್ಲೇಖನೀಯ.

ಭಾರತ 5 ಓವರ್‌ ಆಗುವಷ್ಟರಲ್ಲಿ ನೇಪಾಲದ ಆರಂಭಿಕರಿಗೆ 3 ಜೀವದಾನ ನೀಡಿ ತನ್ನ ಫೀಲ್ಡಿಂಗ್‌ ವೈಫ‌ಲ್ಯವನ್ನು ತೆರೆದಿರಿಸಿತು. 5ನೇ ಎಸೆತದಲ್ಲೇ ಅಯ್ಯರ್‌ ಕ್ಯಾಚ್‌ ಬಿಟ್ಟರು. ಬಳಿಕ ಕೊಹ್ಲಿ ಮತ್ತು ಇಶಾನ್‌ ಕಿಶನ್‌ ಕೂಡ ಕ್ಯಾಚನ್ನು ನೆಲಕ್ಕೆ ಚೆಲ್ಲಿದರು. ಪರಿಣಾಮ, ವಿಕೆಟ್‌ ಕೀಪರ್‌ ಬ್ಯಾಟರ್‌ ಆಸಿಫ್ ಶೇಖ್‌-ಕುಶಲ್‌ ಭುರ್ತೆಲ್‌ 9.5 ಓವರ್‌ ನಿಭಾಯಿಸಿ 65 ರನ್‌ ಪೇರಿ ಸಿದರು. ನೇಪಾಲದ ಇನ್ನಿಂಗ್ಸ್‌ಗೆ ಭದ್ರ ಬುನಾದಿಯೊಂದನ್ನು ನಿರ್ಮಿಸಿದರು.

ಭುರ್ತೆಲ್‌ 25 ಎಸೆತಗಳಿಂದ 38 ರನ್‌ ಬಾರಿಸಿದರು. ಆಸಿಫ್ ಶೇಖ್‌ 30ನೇ ಓವರ್‌ ತನಕ ಭಾರತದ ಬೌಲಿಂಗ್‌ ದಾಳಿಯನ್ನು ದಿಟ್ಟವಾಗಿ ನಿಭಾಯಿಸಿ ನಿಂತರು. 97 ಎಸೆತ ಎದುರಿಸಿ 58 ರನ್‌ ಹೊಡೆದರು.

ನೇಪಾಲದ ಬ್ಯಾಟಿಂಗ್‌ ಸರದಿಗೆ ಬಿಸಿ ಮುಟ್ಟಿಸಿದವರು ರವೀಂದ್ರ ಜಡೇಜ. ಅವರು 16ನೇ ಹಾಗೂ 21ನೇ ಓವರ್‌ ನಡುವೆ 3 ವಿಕೆಟ್‌ ಉಡಾಯಿಸಿದರು. ನಾಯಕ ರೋಹಿತ್‌ ಪೌದೆಲ್‌ (5), ಕುಶಲ್‌ ಮಲ್ಲ (2) ಮತ್ತು ಭೀಮ್‌ ಶಾರ್ಕಿ (7) ವಿಕೆಟ್‌ಗಳು ಜಡೇಜ ಪಾಲಾದವು. ಆದರೆ ಮತ್ತೋರ್ವ ಎಡಗೈ ಸ್ಪಿನ್ನರ್‌ ಕುಲದೀಪ್‌ ಯಾದವ್‌ ಯಾವುದೇ ಯಶಸ್ಸು ಕಾಣಲಿಲ್ಲ.

144ಕ್ಕೆ 6 ವಿಕೆಟ್‌ ಕಳೆದುಕೊಂಡ ನೇಪಾಲ ಇನ್ನೂರರೊಳಗೆ ಆಲೌಟ್‌ ಆಗುವ ಸ್ಥಿತಿ ತಲುಪಿತು. ಆದರೆ ಕೆಳ ಸರದಿಯ ಆಟಗಾರರಾದ ಸೋಮ್‌ಪಾಲ್‌ ಕಾಮಿ (48), ದೀಪೇಂದ್ರ ಸಿಂಗ್‌ ಐರಿ (29) ಮತ್ತು ಗುಲ್ಶನ್‌ ಝಾ (23) ಸೇರಿಕೊಂಡು ಇನ್ನಿಂಗ್ಸ್‌ ಬೆಳೆಸಿದರು. ಜಡೇಜ ಮತ್ತು ಸಿರಾಜ್‌ ತಲಾ 3 ವಿಕೆಟ್‌ ಉರುಳಿಸಿದರು. ಶಮಿ, ಪಾಂಡ್ಯ ಮತ್ತು ಠಾಕೂರ್‌ ಒಂದೊಂದು ವಿಕೆಟ್‌ ಕಿತ್ತರು.

ಸಂಕ್ಷಿಪ್ತ ಸ್ಕೋರ್‌: ನೇಪಾಲ-48.2 ಓವರ್‌ಗಳಲ್ಲಿ 230 (ಆಸಿಫ್ ಶೇಖ್‌ 58, ಸೋಮ್‌ಪಾಲ್‌ ಕಾಮಿ 48, ಕುಶಲ್‌ ಬುರ್ತೆಲ್‌ 38, ದೀಪೇಂದ್ರ ಸಿಂಗ್‌ 29, ಗುಲ್ಶನ್‌ ಝಾ 23, ರವೀಂದ್ರ ಜಡೇಜ 40ಕ್ಕೆ 3, ಮೊಹಮ್ಮದ್‌ ಸಿರಾಜ್‌ 61ಕ್ಕೆ 3). ಭಾರತ 20.1 ಓವರ್‌ಗಳಲ್ಲಿ ವಿಕೆಟ್‌ ನಷ್ಟವಿಲ್ಲದೆ 147 (ರೋಹಿತ್‌ ಶರ್ಮ ಔಟಾಗದೆ 74, ಶುಭಮನ್‌ ಗಿಲ್‌ ಔಟಾಗದೆ 67).