ಬಿಡಬ್ಲ್ಯುಎಫ್ ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌: ಸೈನಾ, ಗಾಯತ್ರಿ-ಟ್ರೀಸಾ ಗೆಲುವು

ಟೋಕಿಯೊ: ಬಿಡಬ್ಲ್ಯುಎಫ್ ವಿಶ್ವ ಬ್ಯಾಡ್ಮಿಂಟನ್‌ ಚಾಂಪಿಯನ್‌ಶಿಪ್‌ನಲ್ಲಿ ಸೈನಾ ನೆಹ್ವಾಲ್‌ ಗೆಲುವಿನ ಆರಂಭದೊಂದಿಗೆ ಪ್ರಿ-ಕ್ವಾರ್ಟರ್‌ ಫೈನಲ್‌ ತಲುಪಿದ್ದಾರೆ. ವನಿತಾ ಡಬಲ್ಸ್‌ನಲ್ಲಿ ಗಾಯತ್ರಿ ಗೋಪಿಚಂದ್‌-ಟ್ರೀಸಾ ಜಾಲಿ ಕೂಡ ಮೊದಲ ಸುತ್ತನ್ನು ಯಶಸ್ವಿಯಾಗಿ ದಾಟಿದ್ದಾರೆ.

ಮಂಗಳವಾರದ ಮೊದಲ ಸುತ್ತಿನ ಪಂದ್ಯದಲ್ಲಿ ಸೈನಾ ನೆಹ್ವಾಲ್‌ ಹಾಂಕಾಂಗ್‌ನ ಚೆಯುಂಗ್‌ ಎನ್‌ಗಾನ್‌ ಯಿ ವಿರುದ್ಧ 21-19, 21-9 ಅಂತರದಿಂದ ವಿಜಯ ಸಾಧಿಸಿದರು. ದ್ವಿತೀಯ ಸುತ್ತಿನ ಎದುರಾಳಿ, ಜಪಾನಿನ ನೊಜೊಮಿ ಒಕುಹಾರಾ ಗಾಯಾಳಾಗಿ ಹಿಂದೆ ಸರಿದುದರಿಂದ ಸೈನಾಗೆ ಬೈ ಲಭಿಸಿದೆ.

ವನಿತಾ ಡಬಲ್ಸ್‌ನಲ್ಲಿ ಗಾಯತ್ರಿ ಗೋಪಿಚಂದ್‌-ಟ್ರೀಸಾ ಜಾಲಿ ಮಲೇಷ್ಯಾದ ಯೀನ್‌ ಯಾನ್‌ ಲೋ-ವಲೇರಿ ಸ್ಯೊ ವಿರುದ್ಧ 21-11, 21-13ರಿಂದ ಗೆದ್ದು ಬಂದರು. ಯುವ ಜೋಡಿ ಅಶ್ವಿ‌ನಿ ಭಟ್‌ ಕೆ.-ಶಿಖಾ ಗೌತಮ್‌ ಕೂಡ ದ್ವಿತೀಯ ಸುತ್ತು ತಲುಪಿದ್ದಾರೆ. ಅವರು ಇಟಲಿಯ ನಾರ್ಟಿನಾ ಕೋರ್ಸಿನಿ-ಜುಡಿತ್‌ ಮೈರ್‌ ಜೋಡಿಗೆ 21-8, 21-14 ಅಂತರದ ಸೋಲುಣಿಸಿದರು.

ಡಬಲ್ಸ್‌ನಲ್ಲಿ ಸೋಲು
ಮಿಶ್ರ ಡಬಲ್ಸ್‌ನಲ್ಲಿ ವೆಂಕಟ್‌ ಗೌರವ್‌ ಪ್ರಸಾದ್‌-ಜೂಹಿ ದೇವಾಂಗನ್‌ ಸೋಲಿನ ಸುಳಿಗೆ ಸಿಲುಕಿದರು. ಭಾರತೀಯ ಜೋಡಿಯನ್ನು ಇಂಗ್ಲೆಂಡಿನ ಗ್ರೆಗರಿ ಮೈರ್-ಜೆನ್ನಿ ಮೂರ್‌ 21-10, 23-21 ಅಂತರದಿಂದ ಪರಾಭವಗೊಳಿಸಿದರು.
ಇನ್ನೊಂದು ಜೋಡಿ ತನಿಷಾ ಕ್ರಾಸ್ಟೊ-ಇಶಾನ್‌ ಭಟ್ನಾಗರ್‌ ಜೋಡಿಗೂ ಗೆಲುವು ಒಲಿಯಲಿಲ್ಲ. ಇವರೆದುರು ಥಾಯ್ಲೆಂಡ್‌ನ‌ ಸುಪಾಕ್‌ ಜೊಮೊR-ಸುಪಿಸ್ಸರ ಪೆವ್ಸಂಪ್ರಣ್‌ 21-14, 21-17ರಿಂದ ಗೆದ್ದು ಬಂದರು.

ಸುದ್ದಿಗಳು