ಪಂಜಾಬ್‌ ಗಡಿಯಲ್ಲಿ ಪಾಕ್‌ ಡ್ರೋಣ್‌ ಹೊಡೆದುರುಳಿಸಿದ ಭಾರತ

ಪಂಜಾಬ್‌ ನ ತರನ್‌ ತಾರನ್‌ ಜಿಲ್ಲೆಯ ಖೇಮ್‌ ಕರನ್‌ ಪ್ರದೇಶದಲ್ಲಿ ಸಂಶಯಾಸ್ಪದವಾಗಿ ಪತ್ತೆಯಾದ ಪಾಕಿಸ್ಥಾನಕ್ಕೆ ಸೇರಿದ ಡ್ರೋಣ್‌ ಒಂದನ್ನು ಬುಧವಾರ ರಾತ್ರಿ ಭಾರತೀಯ ಗಡಿ ಭದ್ರತಾ ಪಡೆ ಹೊಡೆದುರುಳಿಸಿದೆ. ಘಟನೆಯ ಬಳಿಕ ಈ ಭಾಗದ ಗಡಿ ಗ್ರಾಮಗಳಲ್ಲಿ ಮತ್ತು ಸುತ್ತಲಿನ ಪ್ರದೇಶಗಳಲ್ಲಿ ‘ಹೈ ಅಲರ್ಟ್‌’ ಘೋಷಿಸಿಲಾಗಿದೆ. ಘಟನೆ ನಡೆದ ಬಳಿಕ ಈ ಭಾಗದಲ್ಲಿ ಅಂತರ್ಜಾಲ ಸೇವೆಗಳನ್ನು ಜಿಲ್ಲಾಡಳಿತ ಸ್ಥಗಿತಗೊಳಿಸಿದೆ.

ತರನ್‌ ತಾರನ್‌ ಜಿಲ್ಲೆಯ ರಾಟೊಕೆ ಗ್ರಾಮದಲ್ಲಿ ಪಾಕಿಸ್ಥಾನದ ಈ ಡ್ರೋಣ್‌ ಪತ್ತೆಯಾಗುತ್ತಿದ್ದಂತೆ ಬಿ.ಎಸ್‌.ಎಫ್. ಜವಾನರು ವಿಮಾನ ನಿರೋಧಕ ಗನ್‌ ಗಳ ಮೂಲಕ ಇದನ್ನು ಹೊಡೆದುರುಳಿಸಿದರು ಎಂದು ತಿಳಿದುಬಂದಿದೆ. ಹೀಗೆ ಹೊಡೆದುರುಳಿಸಿದ ಡ್ರೋಣ್‌ ಭಾರತದ ಭೂಪ್ರದೇಶದಲ್ಲಿ ಪತನಗೊಂಡಿದೆಯೇ ಅಥವಾ ಪಾಕಿಸ್ಥಾನದ ಭೂಭಾಗದಲ್ಲಿ ಬಿದ್ದಿದೆಯೇ ಎಂದು ಇನ್ನೂ ಖಚಿತಗೊಂಡಿಲ್ಲ.

ಆದರೆ ಗ್ರಾಮ ಮುಖ್ಯಸ್ಥ ಲಖ್ಬೀರ್‌ ಸಿಂಗ್‌ ಅವರು ಹೇಳುವಂತೆ ನಮ್ಮ ಯೋಧರು ಫೈರಿಂಗ್‌ ಮಾಡುವ ಸಂದರ್ಭದಲ್ಲಿ ಆ ಸಂಶಯಾಸ್ಪದ ಡ್ರೋಣ್‌ ಅನ್ನು ಅವರು ಭಾರತದ ಭೂಭಾಗದಲ್ಲೇ ನೋಡಿದ್ದಾರೆ. ಹಾಗಾಗಿ ಅದು ಗಡಿ ಭಾಗದಲ್ಲೇ ಪತನಗೊಂಡಿರುವ ಶಂಕೆ ಇದೀಗ ವ್ಯಕ್ತವಾಗಿದೆ. ಪಾಕಿಸ್ಥಾನ ದ ಡ್ರೋಣ್‌ ಅನ್ನು ಹೊಡೆದುರುಳಿಸಿರುವ ವಿಷಯಕ್ಕೆ ಸಂಬಂಧಿಸಿದಂತೆ ಗಡಿ ಭದ್ರತಾ ಪಡೆ ಅಧಿಕಾರಿಗಳು ಇದುವರೆಗೂ ಯಾವುದೇ ಖಚಿತ ಮಾಹಿತಿಯನ್ನು ನೀಡಿಲ್ಲ. ವಿವರಗಳನ್ನು ನಿರೀಕ್ಷಿಸಲಾಗುತ್ತಿದೆ.