ಮರೆಯಾದ ವಾಣಿಜ್ಯ ಸಮರ ಭೀತಿ: ಸೆನ್ಸೆಕ್ಸ್‌ 300 ಅಂಕ ಜಿಗಿತ

ಮುಂಬಯಿ : ಜಾಗತಿಕ ವಾಣಿಜ್ಯ ಸಮರ ಭೀತಿ ಮರೆಯಾದ ಕಾರಣ ಜಾಗತಿಕ ಶೇರು ಪೇಟೆಗಳು ಮತ್ತೆ ಚುರುಕಾಗಿರುವ ಹಿನ್ನೆಲೆಯಲ್ಲಿ ಮುಂಬಯಿ ಶೇರು ಪೇಟೆ ಇಂದು ಮಂಗಳವಾರದ ಆರಂಭಿಕ ವಹಿವಾಟಿನಲ್ಲಿ 300 ಅಂಕಗಳ ಜಿಗಿತವನ್ನು ದಾಖಲಿಸಿತು.

ಜಿಂದಾಲ್‌  ಸ್ಟೀಲ್‌, ವೇದಾಂತ, ಜೆಎಸ್‌ಡಬ್ಲ್ಯು ಸ್ಟೀಲ್‌, ಟಾಟಾ ಸ್ಟೀಲ್‌, ಎನ್‌ಎಂಡಿಸಿ, ನ್ಯಾಲ್ಕೋ, ಸೆಯ್ಲ, ಹಿಂಡಾಲ್ಕೊ ಮತ್ತು ಹಿಂದುಸ್ಥಾನ್‌ ಝಿಂಕ್‌ ಮುಂತಾದ ಲೋಹ ಉದ್ಯಮದ ಶೇರುಗಳು ಇಂದು ಉತ್ತಮ ಮುನ್ನಡೆ ಕಂಡವು. 

ಕಳೆದ ನಾಲ್ಕು ದಿನಗಳ ನಿರಂತರ ಕುಸಿತದಲ್ಲಿ ಸೆನ್ಸೆಕ್ಸ್‌ 698.97 ಅಂಕಗಳ ನಷ್ಟಕ್ಕೆ ಗುರಿಯಾಗಿತ್ತು. ಇಂದು ಬಹುತೇಕ ಎಲ್ಲ ಕ್ಷೇತ್ರದ ಶೇರುಗಳು ಮುನ್ನಡೆ ಸಾಧಿಸಿದವು.  ಇವುಗಳಲ್ಲಿ ಮೆಟಲ್‌, ರಿಯಲ್ಟಿ, ಕನ್ಸೂಮರ್‌ ಡ್ನೂರೇಬಲ್ಸ್‌, ಕ್ಯಾಪಿಟಲ್‌ ಗೂಡ್ಸ್‌, ಮತ್ತು ಬ್ಯಾಂಕಿಂಗ್‌ ರಂಗದ ಶೇರುಗಳು ಮುಖ್ಯವಾಗಿದ್ದವು. 

ಬೆಳಗ್ಗೆ 10.45ರ ಹೊತ್ತಿಗೆ ಸೆನ್ಸೆಕ್ಸ್‌ 123.75 ಅಂಕಗಳ ಮುನ್ನಡೆಯೊಂದಿಗೆ 33,8703 ಅಂಕಗಳ ಮಟ್ಟದಲ್ಲೂ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 50.25 ಅಂಕಗಳ ಮುನ್ನಡೆಯೊಂದಿಗೆ 10,408.55ಅಂಕಗಳ ಮಟ್ಟದಲ್ಲೂ ವ್ಯವಹಾರ ನಿರತವಾಗಿದ್ದವು.