ಸ್ವಿಟೋಲಿನಾಗೆ ಬ್ರಿಸ್ಬೇನ್‌ ಸಿಹಿ

ಬ್ರಿಸ್ಬೇನ್‌: ಉಕ್ರೇನಿನ ಎಲಿನಾ ಸ್ವಿಟೋಲಿನಾ ಮೊದಲ ಬಾರಿಗೆ “ಬ್ರಿಸ್ಬೇನ್‌ ಇಂಟರ್‌ನ್ಯಾಶನಲ್‌ ಟೆನಿಸ್‌’ ಪಂದ್ಯಾವಳಿಯಲ್ಲಿ ಚಾಂಪಿಯನ್‌ ಆಗಿ ಕಿರೀಟ ಏರಿಸಿಕೊಂಡಿದ್ದಾರೆ. ಶನಿವಾರ ರಾತ್ರಿ “ಪ್ಯಾಟ್‌ ರಾಫ್ಟರ್‌ ಅರೆನಾ’ದಲ್ಲಿ ನಡೆದ ಪ್ರಶಸ್ತಿ ಕಾಳಗದಲ್ಲಿ ಅವರು ಬೆಲರೂಸ್‌ನ ಅಚ್ಚರಿಯ ಫೈನಲಿಸ್ಟ್‌ ಅಲೆಕ್ಸಾಂಡ್ರಾ ಸಾನ್ಸೋವಿಕ್‌ ವಿರುದ್ಧ 6-2, 6-0 ಅಂತರದ ಸುಲಭ ಜಯ ಸಾಧಿಸಿದರು.

ಈವರೆಗೆ ಬ್ರಿಸ್ಬೇನ್‌ನಲ್ಲಿ 4 ಸಲ ಆಡಿ ಯಶಸ್ಸು ಕಾಣದ ಸ್ವಿಟೋಲಿನಾಗೆ ಇದು ಮೊದಲ ಫೈನಲ್‌ ಆಗಿತ್ತು. ಇನ್ನೊಂದೆಡೆ ಸಾನ್ಸೋವಿಕ್‌ ಕೂಡ ಪ್ರಥಮ ಬಾರಿಗೆ ಈ ಕೂಟದ ಪ್ರಶಸ್ತಿ ಸಮರಕ್ಕೆ ಇಳಿದಿದ್ದರು. ಸ್ವಿಟೋಲಿನಾ ಸೆಮಿಫೈನಲ್‌ನಲ್ಲಿ ಹಾಲಿ ಚಾಂಪಿಯನ್‌ ಪೆಟ್ರಾ ಕ್ವಿಟೋವಾ ಅವರನ್ನು ಮಣಿಸಿದಾಗಲೇ ನೆಚ್ಚಿನ ಆಟಗಾರ್ತಿಯಾಗಿ ಗುರುತಿಸಲ್ಪಟ್ಟಿದ್ದರು. ಇದು ಹುಸಿಯಾಗಲಿಲ್ಲ. ಇನ್ನೊಂದು ಉಪಾಂತ್ಯದಲ್ಲಿ ಸಾನ್ಸೋವಿಕ್‌ ಲಾತ್ವಿಯಾದ ಅನಸ್ತಾಸಿಜಾ ಸೆವಸ್ತೋವಾಗೆ ಸೋಲುಣಿಸಿದ್ದರು.

ಇದು ಸ್ವಿಟೋಲಿನಾ ಗೆದ್ದ ಟೆನಿಸ್‌ ಬಾಳ್ವೆಯ 10ನೇ ಪ್ರಶಸ್ತಿ. ಇದರೊಂದಿಗೆ ವರ್ಷಾರಂಭದ ಆಸ್ಟ್ರೇಲಿಯನ್‌ ಓಪನ್‌ ಚಾಂಪಿಯನ್‌ಶಿಪ್‌ನಲ್ಲಿ ಸೆಣಸಾಡಲು ಸ್ವಿಟೋಲಿನಾಗೆ ಹೊಸ ಹುಮ್ಮಸ್ಸು ಲಭಿಸಿದಂತಾಗಿದೆ.