ದ್ವೀಪದಂತಿದ್ದ ಅರಂಬೂರಿಗೀಗ ಸೇತುವೆ

ಸುಳ್ಯ : ತಾಲೂಕಿನ ಅತಿ ದೊಡ್ಡ ಗ್ರಾಮ ವಾದ ಅರಂಬೂರಿನಲ್ಲಿ ಸೇತುವೆ ನಿರ್ಮಾಣ ಕಾಮಗಾರಿ ಭರದಿಂದ ನಡೆಯುತ್ತಿದೆ.

ಇದರಿಂದ ದ್ವೀಪದಂತಿದ್ದ ಅರಂಬೂರು ಪ್ರದೇಶದ ಜನರಿಗೆ ಸುಳ್ಯ ನಗರವನ್ನು ಸಂಪರ್ಕಿ ಸಲು ಇದ್ದ ಸಮಸ್ಯೆ ಬಗೆಹರಿಯಲಿದೆ. 

ಸುಮಾರು 4.95 ಕೋಟಿ ರೂ. ಅನುದಾನದಲ್ಲಿ ಸೇತುವೆ ಮತ್ತು ರಸ್ತೆ ಅಭಿವೃದ್ಧಿ ಕಾಮಗಾರಿ ಪ್ರಗತಿಯಲ್ಲಿದೆ. ಆಲೆಟ್ಟಿ ಗ್ರಾಮದ ಅರಂಬೂರು ಪರಿಸರವನ್ನು ಪಯಸ್ವಿನಿ ನದಿ ಇಬ್ಭಾಗಿಸಿತ್ತು. ಎರಡು ದಶಕಗಳ ಹಿಂದೆ ಅಲ್ಲಿನ ನಿವಾಸಿಗಳು ಪಿಂಡಿ ದಾಟಿ ಸುಳ್ಯಕ್ಕೆ ಬರಬೇಕಿತ್ತು. ಅಲ್ಲಿನ ಮಕ್ಕಳಿಗೆ ಕಾಲೇಜು ಶಿಕ್ಷಣಕ್ಕೂ ತೊಡಕಾಗಿತ್ತು. ಅವೆಲ್ಲವೂ ಇನ್ನು ಬಗೆಹರಿಯಲಿವೆ.

ವಾಹನ ಸೇತು
1989ರಲ್ಲಿ ತಾನು ಹುಟ್ಟಿದ ಗ್ರಾಮದಲ್ಲಿ ಮೊತ್ತಮೊದಲ ತೂಗುಸೇತುವೆಯನ್ನು ನಿರ್ಮಿ ಸಿದ ಪದ್ಮಶ್ರೀ ಗಿರೀಶ ಭಾರದ್ವಾಜ ಅವರು ಜನರ ಕಣ್ಮಣಿಯಾದರು. ಈ ತೂಗುಸೇತುವೆ ಮೂಲಕ ಜನರಿಗೆ ಸುಳ್ಯಕ್ಕೆ ಬರಲು ಮತ್ತು ಮಕ್ಕಳಿಗೆ ಉನ್ನತ ಶಿಕ್ಷಣ ಪಡೆಯಲು ಅನುಕೂಲವಾಯಿತು. ಈ ಊರಿನ ಯುವಕರಿಗೆ ಹೆಣ್ಣು ಕೊಡಲು ಹಿಂಜರಿಯುತ್ತಿದ್ದ ಕಾಲವೂ ಬದಲಾಯಿತು.  ಆದರೆ ಈಗ ಪ್ರತಿಯೊಬ್ಬರಲ್ಲೂ ವಾಹನವಿರು ವುದರಿಂದ ತೂಗು ಸೇತುವೆ ಮೂಲಕ ಸಾಗಲಾ ಗದೇ ನದಿಯ ಈ ದಂಡೆಯಲ್ಲಿ ವಾಹನವಿರಿಸಿ, ನಡೆದು ಹೋಗುವ ಅನಿವಾರ್ಯ ಇದೆ.

ಕಲ್ಲುಮಣ್ಣು ತುಂಬಿ ರಸ್ತೆ 
ಬೇಸಗೆಯಲ್ಲಿ ಪಯಸ್ವಿನಿಯಲ್ಲಿನ ನೀರು ಇಳಿ ಮುಖವಾದಾಗ ಕಲ್ಲುಮಣ್ಣು ತುಂಬಿ ತಾತ್ಕಾಲಿಕ ರಸ್ತೆ ನಿರ್ಮಿಸಿ ಆ ಮೂಲಕ ವಾಹನಗಳಲ್ಲಿ ಮತ್ತೂಂದು ದಡವನ್ನು ಗ್ರಾಮಸ್ಥರು ಸೇರುತ್ತಿದ್ದರು. ವಾಹನ ಸಂಚಾರಕ್ಕೆ ಯೋಗ್ಯವಾಗುವ ಸೇತುವೆ ಬೇಕೆಂದು ಆಗ್ರಹಿಸುತ್ತಿದ್ದರು. ಅದೀಗ ನನಸಾಗುತ್ತಿದೆ.

ಈ ಸೇತುವೆ ಮೂಲಕ ಹೊಸತಾಗಿ ನಿರ್ಮಾಣಗೊಳ್ಳುತ್ತಿರುವ ರಸ್ತೆಗೆ ಸುಮಾರು 25 ಕ್ಕೂ ಹೆಚ್ಚು ಕೃಷಿಕರು ತಮ್ಮ ಜಾಗವನ್ನು ಬಿಟ್ಟುಕೊಟ್ಟಿದ್ದಾರೆ. ರಾಜ್ಯ ಸಮಾಜ ಕಲ್ಯಾಣ ಮಂಡಳಿ ಅಧ್ಯಕ್ಷೆ ದಿವ್ಯಪ್ರಭಾ ಚಿಲ್ತಡ್ಕ ಅವರು ಅನುದಾನ ತರುವಲ್ಲಿ ಪ್ರಯತ್ನಿಸಿದ್ದರು.

- ಗಂಗಾಧರ ಮಟ್ಟಿ