ಉಕ್ರೇನ್‌ ಫುಟ್ಬಾಲಿಗನಿಗೆ ಭಾವುಕ ಸ್ವಾಗತ

ನಮ್ಮಲ್ಲಿ ಐಪಿಎಲ್‌ ಕ್ರಿಕೆಟ್‌ ಟೂರ್ನಿ ನಡೆಯುವಂತೆ, ಪೋರ್ಚುಗಲ್‌ನಲ್ಲಿ ಪ್ರೀಮಿಯೆರಾ ಲೀಗಾ ಎಂಬ ಫುಟ್ಬಾಲ್‌ ಟೂರ್ನಿ ನಡೆಯುತ್ತದೆ.

ಐಪಿಎಲ್‌ ತಂಡಗಳಲ್ಲಿರುವಂತೆ ಅಲ್ಲಿಯೂ ಪ್ರತಿಯೊಂದು ತಂಡದಲ್ಲಿ ಹಲವಾರು ದೇಶ, ವಿದೇಶಿ ಆಟಗಾರರಿರುತ್ತಾರೆ. ಟೂರ್ನಿಯ ಅಂಗವಾಗಿ ಭಾನುವಾರ ನಡೆದ ಬೆನ್ಫಿಯಾ ಹಾಗೂ ವಿಟೋರಿಯಾ ಎಸ್‌ಸಿ ತಂಡಗಳ ನಡುವಿನ ಪಂದ್ಯದ ವೇಳೆ, ಬೆನ್ಫಿಯಾ ತಂಡದವನೊಬ್ಬ ಗಾಯಾಳುವಾದ. ಆಗ, ಆತನ ಬದಲಿಗೆ ಉಕ್ರೇನ್‌ನ ರೋಮನ್‌ ಮೈದಾನಕ್ಕಿಳಿದರು. ಅವರು ಬರುತ್ತಲೇ ಕ್ರೀಡಾಂಗಣದಲ್ಲಿದ್ದ ಎಲ್ಲರೂ ಎದ್ದು ನಿಂತು ಚಪ್ಪಾಳೆ ತಟ್ಟುತ್ತಾ ರೋಮನ್‌ಗೆ ಸ್ವಾಗತ ಕೋರಿದರು. ಇದು, ಉಕ್ರೇನ್‌ಗೆ ಪೋರ್ಚುಗಲ್‌ ಜನತೆಯ ನೈತಿಕ ಬೆಂಬಲವನ್ನು ತೋರ್ಪಡಿಸುತ್ತಿತ್ತು. ಅತ್ತ, ಮೈದಾನದಲ್ಲಿದ್ದ ರೋಮನ್‌ ಭಾವುಕರಾಗಿ ಗಳಗಳನೆ ಅತ್ತರು. ಒಂದೆರಡು ನಿಮಿಷಗಳ ತರುವಾಯ ಆಟ ಆರಂಭವಾಯಿತು. ಆದರೆ, ಈ ದೃಶ್ಯ ಮಾತ್ರ ಎಲ್ಲರಲ್ಲೂ ಹೃದಯಂಗಮವಾಗಿ ಉಳಿಯಿತು.