ಅಂಡರ್‌ 17 ವಿಶ್ವಕಪ್‌ ಫ‌ುಟ್ಬಾಲ್‌: ಬ್ರಝಿಲ್‌ಗೆ ಕಂಚು

ಕೋಲ್ಕತಾ: ಮಾಲಿ ತಂಡವನ್ನು 2-0 ಗೋಲುಗಳಿಂದ ಸೋಲಿಸಿದ ಬ್ರಝಿಲ್‌ ತಂಡವು ಅಂಡರ್‌ 17 ವಿಶ್ವಕಪ್‌ ಫ‌ುಟ್ಬಾಲ್‌ ಕೂಟದಲ್ಲಿ ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡಿದೆ.ಪಂದ್ಯದ 55ನೇ ನಿಮಿಷದಲ್ಲಿ ಮಾಲಿ ಗೋಲ್‌ಕೀಪರ್‌ ಯೂಸುಫ್ ಕೊಯಿಟ ಅವರು ಅಲನ್‌ ಅವರಿಗೆ ಗೋಲೊಂದನ್ನು ಉಡುಗೊರೆಯಾಗಿ ನೀಡಿದರೆ 88ನೇ ನಿಮಿಷದಲ್ಲಿ ಆಲ್ಬರ್ಟೊ ಗೋಲನ್ನು ಹೊಡೆದು ಬ್ರಝಿಲ್‌ ಗೆಲುವಿನ ಅಂತರವನ್ನು 2-0ಕ್ಕೇರಿಸಿದರು.

ಇಲ್ಲಿನ ಸಾಲ್ಟ್ಲೇಕ್‌ ಕ್ರೀಡಾಂಗಣದಲ್ಲಿ ನಡೆದ ಈ ಪಂದ್ಯವನ್ನು ವೀಕ್ಷಿಸಲು 56,432 ಮಂದಿ ಬಂದಿದ್ದರು. ಫಿಫಾ ಅಂಡರ್‌ 17 ವಿಶ್ವಕಪ್‌ ಇತಿಹಾಸದಲ್ಲಿ ಪಂದ್ಯವೊಂದನ್ನು ಗರಿಷ್ಠ ಸಂಖ್ಯೆಯಲ್ಲಿ ವೀಕ್ಷಿಸಿದ ಪಂದ್ಯ ಇದಾಗಿದೆ.ಆದರೆ ಬ್ರಝಿಲ್‌ ತನ್ನ ನೈಜ ಆಟ ಆಡದೇ ನಿರಾಶೆಗೊಳಿಸಿದೆ. ಆದರೆ ಮಾಲಿ ಗೆಲುವಿಗಾಗಿ ಬಹಳಷ್ಟು ಆಕ್ರಮಣಕಾರಿಯಾಗಿ ಆಡಿ ಬ್ರಝಿಲ್‌ಗೆ ಒತ್ತಡ ಹೇರಲು ಪ್ರಯತ್ನಿಸಿತು.

ಈ ಪಂದ್ಯದಲ್ಲಿ ಬ್ರಝಿಲ್‌ ಕೇವಲ  ಮೂರು ಬಾರಿ ಗೋಲು ಹೊಡೆಯುವ ಪ್ರಯತ್ನ ನಡೆಸಿತ್ತು. ಆದರೆ ಮಾಲಿ ತೀವ್ರ ಪೈಪೋಟಿಯಿಂದ ಆಡಿತಲ್ಲದೇ 10 ಬಾರಿಯಾದರೂ ಗೋಲು ಹೊಡೆಯುವ ಪ್ರಯತ್ನ ಮಾಡಿತ್ತು.

ಪ್ರಶಸ್ತಿ ಗೆಲ್ಲುವ ಫೇವರಿಟ್‌ ತಂಡವಾಗಿ ಭಾರತಕ್ಕೆ ಆಗಮಿಸಿದ್ದ ಬ್ರಝಿಲ್‌ ಸೆಮಿಫೈನಲ್‌ನಲ್ಲಿ ಇಂಗ್ಲೆಂಡಿಗೆ ಶರಣಾಗಿ ಮೂರನೇ ಸ್ಥಾನ ಪಡೆಯಲಷ್ಟೇ ಶಕ್ತವಾಯಿತು. 1985ರಲ್ಲಿ ಈ ಕೂಟ ಆರಂಭವಾದ ಬಳಿಕ ಬ್ರಝಿಲ್‌ ಎರಡನೇ ಬಾರಿ ಮೂರನೇ ಸ್ಥಾನ ಪಡೆದಿದೆ. ಮಾಲಿ ಈ ಹಿಂದಿನ ಕೂಟದಲ್ಲಿ ರನ್ನರ್‌ ಅಪ್‌ ಸ್ಥಾನ ಪಡೆದಿತ್ತು.