ಬೊಂಗಾವ್‌ ಬಿಜೆಪಿ ಅಭ್ಯರ್ಥಿ ಶಂತನು ಠಾಕೂರ್‌ ಕಾರು ಅಪಘಾತ, ತಲೆಗೆ ಏಟು

ಕೋಲ್ಕತ : ಲೋಕಸಭಾ ಚುನಾವಣೆಯ ಐದನೇ ಹಂತದ ಮತದಾನಕ್ಕೆ ಇನ್ನು ಕೇವಲ 48 ತಾಸು ಬಾಕಿ ಇರುವಂತೆಯೇ ಪಶ್ಚಿಮ ಬಂಗಾಲದ ಬೊಂಗಾವ್‌ (ಎಸ್‌ಸಿ) ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಶಂತನು ಠಾಕೂರ್‌ ಅವರು ನಾದಿಯಾ ಜಿಲ್ಲೆಯ ಹಂಸಖಲಿ ಎಂಬಲ್ಲಿ ಇಂದು ಶನಿವಾರ ಮಧ್ಯಾಹ್ನ 12.15ರ ಸುಮಾರಿಗೆ ವಾಹನ ಅಪಘಾತಕ್ಕೆ ಗುರಿಯಾಗಿ ಆಸ್ಪತ್ರೆಗೆ ದಾಖಲಾದರು.

ಮತುವಾ ಸಮದಾಯದ ಮಹಾಮಾತೆ ದಿವಂಗತ ಬೀಣಾಪಾಣಿ ದೇವಿ ಅವರ ಮೊಮ್ಮಗನಾಗಿರುವ ಶಂತನು ಠಾಕೂರ್‌ ಅವರ ಕಾರಿನ ಚಾಲಕ ಮತ್ತು ಇನ್ನಿಬ್ಬರು ಕೂಡ ಗಾಯಗೊಂಡರೆಂದು ಪೊಲಿಸರು ತಿಳಿಸಿದ್ದಾರೆ.

ಶಂತನು ಅವರಿಗೆ ತಲೆಗೆ ಏಟು ಬಿದ್ದಿದೆ ಮತ್ತು ಅವರನ್ನು ಬೊಂಗಾಂವ್‌ ನ ಉಪ ವಿಭಾಗೀಯ ಆಸ್ಪತ್ರೆಗೆ ಒಯ್ಯಲಾಗಿದೆ ಎಂದವರು ಹೇಳಿದರು.. ಶಂತನು ಅವರ ಕಾರಿಗೆ ಪೊಲೀಸ್‌ ವ್ಯಾನ್‌ ಢಿಕ್ಕಿಯಾಗಿದ್ದು ಎರಡೂ ವಾಹನಗಳ ಚಾಲಕರನ್ನು ಪೊಲೀಸರು ಪ್ರಶ್ನಿಸುತ್ತಿದ್ದಾರೆ. ಈ ತನಕ ಯಾರನ್ನೂ ಬಂಧಿಸಲಾಗಿಲ್ಲ. ಕೇಸು ದಾಖಲಾಗಿದ್ದು ತನಿಖೆ ನಡೆಯುತ್ತಿದೆ.