ನಟಿ ಮತ್ತು ಆಶಾ

ನಟಾಶಾ ಸುರಿ ಎಂಬ ನಟಿ ಹೆಚ್ಚು ಸುದ್ದಿಯಾದದ್ದು ಈ ವರ್ಷದ ಆದಿಯಲ್ಲಿ ವೆಸ್ಟ್‌ ಇಂಡೀಸ್‌ನ ಕ್ರಿಕೆಟಿಗ ಡ್ವಾಯ್ನ ಬ್ರಾವೊ ಜತೆಗೆ ಡೇಟಿಂಗ್‌ ಮಾಡುತ್ತಿದ್ದಾಳೆ ಎಂಬ ಗಾಸಿಪ್‌ನಿಂದ. ಈ ಗಾಸಿಪ್‌ ಎಷ್ಟು ದಟ್ಟವಾಗಿತ್ತು ಎಂದರೆ, ಸ್ವತಃ ನಟಾಶಾಳೇ ಅನಂತರ ಮಾಧ್ಯಮಗಳಿಗೆ, “ನಮ್ಮ ನಡುವೆ ಅಂಥ ಸಂಬಂಧವೇನೂ ಇಲ್ಲ, ನಾವಿಬ್ಬರು ಜಸ್ಟ್‌ ಫ್ರೆಂಡ್ಸ್‌ ಮಾತ್ರ. ಒಂದು ಗಂಡು ಮತ್ತು ಹೆಣ್ಣು ಜತೆಗಿದ್ದಾರೆ ಎಂದ ಕೂಡಲೇ ಸಂಬಂಧ ಕಲ್ಪಿಸುವ ಅಗತ್ಯವಿಲ್ಲ. ಗಂಡು-ಹೆಣ್ಣು ಸ್ನೇಹಿತರಾಗಿಯೂ ಇರಬಹುದು’ ಎಂದೆಲ್ಲ ಸ್ಪಷ್ಟೀಕರಣ ಕೊಟ್ಟಿದ್ದಳು. 

ಇಂತಿಪ್ಪ ನಟಾಶಾ ಈಗ ಸುದ್ದಿಯಾಗಿರುವ ಆದತ್‌ ಎಂಬ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗುವ ಮೂಲಕ ಈ ಚಿತ್ರಕ್ಕಾಗಿ ನಟಾಶಾ ಪೋಲ್‌ ಡ್ಯಾನ್ಸ್‌ ಕೂಡಾ ಕಲಿಯುತ್ತಿದ್ದಾಳಂತೆ. ಹಾಗೆಂದು, ಇದು ನಟಾಶಾಳ ಮೊದಲ ಚಿತ್ರವಂತೂ ಅಲ್ಲ. ನಟಾಶಾಳನ್ನು ಬೆಳ್ಳಿತೆರೆಗೆ ಪರಿಚಯಿಸಿದ್ದು ಮಲಯಾಳ ಚಿತ್ರರಂಗ. ದಿಲೀಪ್‌ ಎದುರು ಕಿಂಗ್‌ ಲಯರ್‌ ಎಂಬ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿದ್ದಳು. ಆದರೆ, ಒಂದೇ ಚಿತ್ರಕ್ಕೆ ದಕ್ಷಿಣದ ಸಹವಾಸವನ್ನು ಮುಗಿಸಿ ಮರಳಿ ಮುಂಬಯಿಗೆ ಬಂದವಳಿಗೆ ಬಾ ಬಾ ಬ್ಲ್ಯಾಕ್‌ಶೀಪ್‌ ಚಿತ್ರದಲ್ಲಿ ಮುಖ್ಯ ಪಾತ್ರ ಸಿಕ್ಕಿದರೂ ಚಿತ್ರ ಹೇಳಿಕೊಳ್ಳುವಂತಹ ಹೆಸರು ಮಾಡಲಿಲ್ಲ. ಹೀಗೆ, ಮೂಲೆಗುಂಪಾಗಿದ್ದ ನಟಾಶಾ ಈಗ ಆದತ್‌ನಲ್ಲಿ ಮರಳಿ ಬರುವ ಪ್ರಯತ್ನ ಮಾಡುತ್ತಿದ್ದಾಳೆ. ನಟಿಯಾಗಲು ಎಲ್ಲ ಅರ್ಹತೆ ಇರುವ ಹುಡುಗಿ ನಟಾಶಾ, ಹತ್ತಾರು ಸೌಂದರ್ಯ ಸ್ಪರ್ಧೆಯ ಕಿರೀಟಗಳನ್ನು ಮುಡಿಗೇರಿಸಿಕೊಂಡಿದ್ದಾಳೆ. ಹಲವು ಪ್ರಸಿದ್ಧ ಪತ್ರಿಕೆಗಳ ಮುಖಪುಟ ಅಲಂಕರಿಸಿದ್ದಾಳೆ, 600ಕ್ಕೂ ಹೆಚ್ಚು ರ್‍ಯಾಂಪ್‌ಶೋಗಳಲ್ಲಿ ಭಾಗವಹಿಸಿದ್ದಾಳೆ. ಮಾರಿಷಸ್‌ನ ಟೂರಿಸ್ಟ್‌ ಅಂಬಾಸಿಡರ್‌ ಕೂಡಾ ಆಗಿದ್ದಳು. ಫ್ರೆಂಡ್ಸ್‌ ಆಫ್ ಮಾರಿಷಸ್‌ ಎಂಬ ಪ್ರಶಸ್ತಿಗೂ ಪಾತ್ರಳಾಗಿದ್ದಾಳೆ. ಕಿರುತೆರೆಯಲ್ಲಿ ಹಲವು ಶೋಗಳಲ್ಲಿ ಭಾಗವಹಿಸಿದ್ದಲ್ಲದೆ ತನ್ನದೇ ಆದ ಶೋಗಳನ್ನು ಕೂಡಾ ನಡೆಸಿಕೊಟ್ಟಿದ್ದಾಳೆ. ಹೀಗೆ ಎಲ್ಲ ಅರ್ಹತೆ ಹೊಂದಿದ್ದರೂ ನಟಾಶಾ ಬಾಲಿವುಡ್‌ನ‌ಲ್ಲಿ ಕಾಡ ಬೆಳದಿಂಗಳಾಗಿರುವುದು ಆಶ್ಚರ್ಯವೇ ಸರಿ.