ಪೂಜಾ ಸಮಯ

ತುಳುನಾಡಿನ ಹುಡುಗಿ ಪೂಜಾ ಹೆಗ್ಡೆ ಬಾಲಿವುಡ್‌ನ‌ಲ್ಲಿ ಮತ್ತೂಮ್ಮೆ ಅದೃಷ್ಟ ಪರೀಕ್ಷೆಗಿಳಿದಿದ್ದಾಳೆ. ಅಶುತೋಶ್‌ ಗೋವರಿಕರ್‌ ನಿರ್ದೇಶಿಸಿದ ಮೊಹೆಂಜದಾರೊ ಚಿತ್ರದಲ್ಲಿ ಮೊದಲ ಬಾರಿಗೆ ಬಾಲಿವುಡ್‌ನ‌ಲ್ಲಿ ಕಾಣಿಸಿಕೊಂಡಿದ್ದ ಪೂಜಾಳಿಗೆ ಅದೃಷ್ಟವೇಕೊ ಕೈಕೊಟ್ಟಿತ್ತು. ಖ್ಯಾತ ನಿರ್ದೇಶಕ, ಸೂಪರ್‌ಹಿಟ್‌ ಚಿತ್ರಗಳ ಹೀರೊ ಹೃತಿಕ್‌ ರೋಶನ್‌  ನಾಯಕನಾಗಿದ್ದ ಹೊರತಾಗಿಯೂ ಮೊಹಂಜದಾರೊ ಬಾಕ್ಸಾಫೀಸಿನಲ್ಲಿ ಹೇಳಿಕೊಳ್ಳುವಂತಹ ಸಾಧನೆ ಮಾಡಲಿಲ್ಲ. 

ಹೀಗೆ ಮೊದಲ ಚಿತ್ರದಿಂದ ನಿರಾಶೆ ಅನುಭವಿಸಿದ ಪೂಜಾ ಇನ್ನೊಂದು ಚಿತ್ರ ಸಿಗಲು ಬರೋಬ್ಬರಿ ಎರಡು ವರ್ಷ ಕಾಯಬೇಕಾಯಿತು. ಹಾಗೆಂದು ಅವಕಾಶ ಇರಲಿಲ್ಲ ಎಂದಲ್ಲ. ಆದರೆ, ಮೊದಲ ಚಿತ್ರದ ಅನುಭವದಿಂದ ಅವಳು ಪಾಠ ಕಲಿತಿದ್ದಳು. ಸ್ಕ್ರಿಪ್ಟ್ ಉತ್ತಮವಾಗಿದ್ದರೆ ಮಾತ್ರ ಸಾಲದು ಆಯಾಯ ಕಾಲದ ಟ್ರೆಂಡ್‌ಗೆ ಅನುಗುಣವಾಗಿರಬೇಕೆನ್ನುವುದೇ ಈ ಪಾಠ. ಹೀಗಾಗಿ ಬಂದ ಹಲವು ಅವಕಾಶಗಳನ್ನು ನಿರಾಕರಿಸಿದ ಪೂಜಾ ಈಗ ಹೌಸ್‌ಫ‌ುಲ್‌  ಸರಣಿಯ ನಾಲ್ಕನೇ ಚಿತ್ರಕ್ಕೆ ನಾಯಕಿಯಾಗಿದ್ದಾಳೆ. ಫ‌ುಲ್‌ ಕಾಮೆಡಿ ಚಿತ್ರ ಹೌಸ್‌ಫ‌ುಲ್‌ನ ಮೊದಲ ಮೂರೂ ಆವೃತ್ತಿಗಳು ಸೂಪರ್‌ಹಿಟ್‌ ಆಗಿವೆ. ಹೀಗಾಗಿ, ನಾಲ್ಕನೇ ಭಾಗದ ಮೇಲೂ ಭಾರೀ ಭರವಸೆ ಇದೆ. ಚಿತ್ರದಲ್ಲಿ ಕೃತಿ ಕರಬಂಧಾ ಮತ್ತು ಕೃತಿ ಸನೋನ್‌ ಕೂಡಾ ಇದ್ದಾರೆ. ಮೂವರು ನಾಯಕಿಯರ ಈ ಚಿತ್ರಕ್ಕಾಗಿ ಪೂಜಾ ಬಹಳ ತಯಾರಿ ಮಾಡಿದ್ದಾಳೆ. 

ದೇಹತೂಕವನ್ನು ಸಮತೋಲನದಲ್ಲಿಟ್ಟುಕೊಳ್ಳುವ ಸಲುವಾಗಿ ನಿತ್ಯ ಸುಮಾರು 5 ಗಂಟೆ ಜಿಮ್‌ನಲ್ಲಿ ಬೆವರಿಳಿಸುತ್ತಿದ್ದಾಳಂತೆ. ಇದರ ಜತೆಗೆ ಯೋಗವನ್ನೂ ಮಾಡುತ್ತಿದ್ದಾಳೆ. ಶೂಟಿಂಗ್‌ ನಡುವೆಯೇ ವ್ಯಾಯಾಮವೂ ಸಾಗಬೇಕಿರುವುದರಿಂದ ನಸುಕಿನ 4 ಗಂಟೆಗೆ ಎದ್ದು ತಯಾರಾಗುತ್ತಿದ್ದಾಳೆ. ಜತೆಗೆ ಮನೆಯೂಟವನ್ನೇ ಸೇವಿಸುತ್ತಿದ್ದಾಳೆ. ಕನ್ನಡನಾಡಿನಿಂದ ಬಾಲಿವುಡ್‌ಗೆ ಹೋದ ಬಹುತೇಕ ನಾಯಕಿಯರು ಯಶಸ್ವಿಯಾಗಿದ್ದಾರೆ. ಪೂಜಾ ಕೂಡಾ ಈ ಸಾಲಿಗೆ ಸೇರಲು ಕಾತರಳಾಗಿದ್ದಾಳೆ.