ಪವರ್‌ ಸ್ಟಾರ್‌ ಪುನೀತ್‌ ರಾಜಕುಮಾರ್‌ ಅಭಿನಯದ “ಜೇಮ್ಸ್’ ಚಿತ್ರದ ಚಿತ್ರೀಕರಣಕ್ಕೆ ಸದ್ದಿಲ್ಲದೆ ಚಾಲನೆ ಸಿಕ್ಕಿದೆ. ಈಗಾಗಲೇ ಚಿತ್ರದ ಮೊದಲ ಹಂತದ ಚಿತ್ರೀಕರಣ ಪೂರ್ಣಗೊಳಿಸಿರುವ ಚಿತ್ರತಂಡ, ಇದೇ ನ.23 ರಿಂದ ಎರಡನೇ ಹಂತದ ಚಿತ್ರೀಕರಣಕ್ಕೆ ಅಣಿಯಾಗುತ್ತಿದೆ.
ಇದರ ನಡುವೆಯೇ “ಜೇಮ್ಸ್’ ಚಿತ್ರದ ಪ್ರಮುಖ ಪಾತ್ರವೊಂದರಲ್ಲಿ ಬಾಲಿವುಡ್‌ ಖ್ಯಾತ ನಟನಾಸಿರುದ್ದೀನ್‌ ಶಾ ಅಭಿನಯಿಸುತ್ತಿದ್ದಾರೆ ಎಂಬ ಸುದ್ದಿಕೆಲ ದಿನಗಳಿಂದ ಗಾಂಧಿನಗರದಲ್ಲಿ ಹರಿದಾಡುತ್ತಿತ್ತು. ಆದರೆ ಇದೀಗ ಈ ಸುದ್ದಿಗೆ ಚಿತ್ರತಂಡ ಫ‌ುಲ್‌ಸ್ಟಾಪ್‌ ಇಟ್ಟಿದೆ.
ಹೌದು, ಇತ್ತೀಚಿಗಷ್ಟೆ ಬಹುಭಾಷಾ ನಟ ಮುಖೇಶ್‌ ರಿಷಿ ಮತ್ತು ಮಧುಸೂಧನ್‌ ಚಿತ್ರದ ಎರಡು ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ ಎಂಬ ಸುದ್ದಿ “ಜೇಮ್ಸ್’ ಚಿತ್ರತಂಡದಿಂದ ಹೊರಬಿದ್ದಿತ್ತು. ಅದರ ಹಿಂದೆಯೇ ಮತ್ತೂಂದು ಪ್ರಮುಖ ಪಾತ್ರಕ್ಕೆ ನಾಸಿರುದ್ದೀನ್‌ ಶಾ ಹೆಸರು ಕೂಡಕೇಳಿ ಬಂದಿತ್ತು.
ಇದನ್ನೂ ಓದಿ : ಒಂದು ಕೊಲೆಯ ಸುತ್ತ… : ಸ್ನೇಹಿತರ ಕಾಮಿಡಿ ಕಮಾಲ್‌
ಆದರೆ ಈ ಬಗ್ಗೆ “ಉದಯವಾಣಿ’ಗೆ ಪ್ರತಿಕ್ರಿಯಿಸಿರುವ ಚಿತ್ರದ ನಿರ್ದೇಶಕ ಚೇತನ್‌ ಕುಮಾರ್‌, “ಆರಂಭದಲ್ಲಿ “ಜೇಮ್ಸ್’ ಸಿನಿಮಾದ ಪ್ರಮುಖ ಪಾತ್ರವೊಂದಕ್ಕೆ ನಾಸಿರುದ್ದೀನ್‌ ಶಾ ಅವರನ್ನುಕರೆತರುವ ಯೋಚನೆಯಿತ್ತು. ನಾಸಿರುದ್ದೀನ್‌ ಶಾ ಅವರಿಗೆ ಚಿತ್ರದಕಥೆ ಮತ್ತು ಅವರ ಪಾತ್ರವನ್ನುಕೂಡ ವಿವರಿಸಲಾಗಿತ್ತು. ಅವರು ಕೂಡ ಚಿತ್ರಕಥೆ ಮತ್ತು ಪಾತ್ರವನ್ನುಕೇಳಿ ಮೆಚ್ಚಿಕೊಂಡಿದ್ದರು. ಆದರೆ ನಂತರ ಬಂದ ಕೋವಿಡ್ ಆತಂಕ, ಲಾಕ್‌ಡೌನ್‌ ಮತ್ತಿತರ ಕಾರಣಗಳಿಂದ, “ಜೇಮ್ಸ್’ ತಂಡಕ್ಕೆ ಅವರನ್ನುಕರೆತರಲು ಸಾಧ್ಯವಾಗಲಿಲ್ಲ. ಸದ್ಯ “ಜೇಮ್ಸ್’ ಸಿನಿಮಾದ ಯಾವ ಪಾತ್ರಗಳಲ್ಲೂ ನಾಸಿರುದ್ದೀನ್‌ ಶಾ ಅಭಿನಯಿಸುತ್ತಿಲ್ಲ’ ಎಂದು ಸ್ಪಷ್ಟಪಡಿಸಿದ್ದಾರೆ.
ಒಟ್ಟಾರೆ ಈ ಮೂಲಕ “ಜೇಮ್ಸ್’ ಚಿತ್ರಕ್ಕೆ ನಾಸಿರುದ್ದೀನ್‌ ಶಾ ಬರುತ್ತಾರೆ ಎಂಬ ಸುದ್ದಿಯನ್ನು ಚಿತ್ರತಂಡ ಅಲ್ಲಗಳೆದಿದೆ. ಚೇತನ್‌ಕುಮಾರ್‌ ನಿರ್ದೇಶನದ “ಜೇಮ್ಸ್’ ಚಿತ್ರಕ್ಕೆ ಕಿಶೋರ್‌ ಪತ್ತಿಕೊಂಡ ಬಂಡವಾಳ ಹೂಡಿ ನಿರ್ಮಿಸುತ್ತಿದ್ದಾರೆ. ಚಿತ್ರದಲ್ಲಿ ಪುನೀತ್‌ ರಾಜಕುಮಾರ್‌ ಅವರಿಗೆ ಪ್ರಿಯಾ ಆನಂದ್‌ ಜೋಡಿಯಾಗಿ ಅಭಿನಯಿಸುತ್ತಿದ್ದಾರೆ.
