ಬೋಟ್‌ ನಾಪತ್ತೆ: ಸಚಿವದ್ವಯರ ದ್ವಂದ್ವ ಹೇಳಿಕೆ​​​​​​​

ಬೆಂಗಳೂರು: ಉಡುಪಿಯಿಂದ ನಾಪತ್ತೆಯಾಗಿರುವ ಮೀನುಗಾರರ ಸುಳಿವಿನ ಬಗ್ಗೆ ಮೈತ್ರಿ ಸರ್ಕಾರದ ಇಬ್ಬರು ಸಚಿವರ ಹೇಳಿಕೆಗಳು ಗೊಂದಲ ಮೂಡಿಸಿವೆ. ಮೀನುಗಾರರ ಸುಳಿವಿನ ಕುರಿತಾಗಿ ಇಬ್ಬರು ಪರಸ್ಪರ ವೈರುಧ್ಯದ ಹೇಳಿಕೆ ನೀಡಿದ್ದು, ಪ್ರಕರಣದ ತನಿಖೆ ಸಂಬಂಧ ಸಮನ್ವಯದ ಕೊರತೆ ಎದ್ದು ಕಾಣುತ್ತಿದೆ.

ಮೀನುಗಾರಿಕೆ ಸಚಿವ ವೆಂಕಟರಾವ್‌ ನಾಡಗೌಡ ಅವರು ನಾಪತ್ತೆಯಾಗಿರುವ ಮೀನುಗಾರರನ್ನು ಮಹಾರಾಷ್ಟ್ರದವರು ಹಿಡಿದಿಟ್ಟಿರುವ ಸಾಧ್ಯತೆಯಿದೆ ಎಂಬ ಮಾಹಿತಿಯಿದೆ ಎಂದು ಹೇಳಿದ್ದಾರೆ.

ಇನ್ನೊಂದೆಡೆ ಮಾತನಾಡಿದ ಗೃಹ ಸಚಿವ ಎಂ.ಬಿ.ಪಾಟೀಲ್‌, ನಾಪತ್ತೆಯಾಗಿರುವ ಮೀನುಗಾರರ ಸುಳಿವು ಸಿಕ್ಕಿದೆ ಎನ್ನುವುದು ಸುಳ್ಳು.ಮೀನುಗಾರರ ಹುಡುಕಾಟ ಮುಂದುವರಿದಿದೆ ಎಂದು ತಿಳಿಸಿದ್ದಾರೆ.

ಜೆಡಿಎಸ್‌ ಕಚೇರಿಯಲ್ಲಿ ಆಯೋಜಿಸಿದ್ದ ಸ್ವಾಮಿ ವಿವೇಕಾನಂದ ಜಯಂತಿ ಕಾರ್ಯ ಕ್ರಮದಲ್ಲಿ ಪಾಲ್ಗೊಂಡ ನಂತರ ಸುದ್ದಿಗಾರರ ಜತೆ ಮಾತನಾಡಿದ ವೆಂಕಟರಾವ್‌ ನಾಡಗೌಡ, ಆಗಾಗ ಮಹಾರಾಷ್ಟ್ರದವರು ನಮ್ಮ ಮೀನುಗಾರರನ್ನು ಹಿಡಿದು ದಂಡ ಹಾಕುತ್ತಾರೆ.

ಈಗಲೂ ನಾಪತ್ತೆಯಾಗಿರುವ ಮೀನುಗಾರರನ್ನು ಅವರೇ ಹಿಡಿದಿಟ್ಟುಕೊಂಡಿರುವ ಶಂಕೆಯಿದೆ. ಕಾಣೆಯಾದ ಬೋಟ್‌ನಿಂದ μಶ್‌ ಕೇಸ್‌ ಗಳೂ ಮೀನುಗಾರರಿಗೆ ಸಿಕ್ಕಿವೆ. ಈ ಎಲ್ಲ ಮಾಹಿತಿ ಇಟ್ಟುಕೊಂಡು ತನಿಖೆ ಮಾಡಲಾಗುತ್ತಿದೆ. ಮಹಾರಾಷ್ಟ್ರ ಸರ್ಕಾರದ ಮೇಲೂ ಒತ್ತಡ ಹಾಕುವಂತೆ ಮುಖ್ಯಮಂತ್ರಿ ಜತೆ ಚರ್ಚಿಸಿದ್ದೇನೆ. ಗುಜರಾತ್‌, ಗೋವಾ ಸರ್ಕಾರದ ಜತೆಯೂ ಮಾತನಾಡಿದ್ದೇನೆ ಎಂದರು.

ದೋಣಿಯಲ್ಲಿ ರೇಡಿಯೇಟರ್‌ ಸಮಸ್ಯೆ ಅಂತ ವಾಪಸ್‌ ಬಂದು ಮತ್ತೆ ಹೋಗಿದ್ದು ಅಲ್ಲಿಂದ ಸಂಪರ್ಕ ಕಳೆದುಕೊಂಡಿದೆ. 12 ನಾಟಿಕಲ್‌ ಮೈಲು ಬೋಟ್‌ ದಾಟಿ ಹೋಗಿದೆ. ಕೇಂದ್ರ ಸರ್ಕಾರದ ಮೇಲೂ ಈ ಕುರಿತು ಹೆಚ್ಚಿನ ಜವಾಬ್ದಾರಿ ಇದೆ. ಕೋಸ್ಟ್‌ ಕಾರ್ಡ್‌, ನೌಕಾ ಪಡೆ ನೆರವು ಕೇಳಿದ್ದೇವೆ. ಅವರೂ ಬಂದು ಹೆಲಿಕಾಪ್ಟರ್‌ ಮೂಲಕ ಶೋಧನೆ ಮಾಡಿದ್ದಾರೆ ಎಂದು ಹೇಳಿದರು.

ಸುಳಿವು ಸಿಕ್ಕಿದೆ ಎನ್ನುವುದು ಸುಳ್ಳು: ಇನ್ನೊಂದೆಡೆ ಸುದ್ದಿಗಾರರ ಜತೆ ಮಾತನಾಡಿದ ಗೃಹ ಸಚಿವ ಎಂ.ಬಿ. ಪಾಟೀಲ್‌, ನಾಪತ್ತೆಯಾಗಿರುವ ಮೀನುಗಾರರ ಸುಳಿವು ಸಿಕ್ಕಿದೆ ಎನ್ನುವುದು ಸುಳ್ಳು. ಮೀನುಗಾರರ ಹುಡುಕಾಟ ಮುಂದುವರಿದಿದೆ. ಮೀನುಗಾರರನ್ನು ಪತ್ತೆ ಹಚ್ಚಲು ಸರ್ಕಾರ ಸರ್ವ ಪ್ರಯತ್ನ ಮಾಡುತ್ತಿದೆ. ಮಹಾರಾಷ್ಟ್ರ ಸರ್ಕಾರ ಹಾಗೂ ಗೋವಾ ಸರ್ಕಾರಕ್ಕೂ ಪತ್ರ ಬರೆಯುತ್ತೇವೆ ಎಂದು ಹೇಳಿದರು.

ರಾಜ್ಯ ಮುಖ್ಯ ಕಾರ್ಯದರ್ಶಿಯಿಂದ ಇಸ್ರೋಗೂ ಸಹಕಾರ ಕೋರಿ ಪತ್ರ ಬರೆಸಲಾಗುವುದು. ರಾಜ್ಯ ಸಚಿವ ಸಂಪುಟದಲ್ಲೂ ಆ ಬಗ್ಗೆ ಚರ್ಚೆಯಾಗಿದೆ.ಮೀನುಗಾರರ ಕುಟುಂಬಗಳು ಆತಂಕದಲ್ಲಿವೆ.ಕೇರಳದ ಕೊಚ್ಚಿನಲ್ಲೂ ಹುಡುಕಾಟ ನಡೆದಿದೆ.ಯಾವುದೇ ಕಾರಣಕ್ಕೂ ತಪ್ಪು ಸಂದೇಶ ಕೊಡುವುದು ಬೇಡ ಎಂದು ಮನವಿ ಮಾಡಿದರು.