`X’ ನಲ್ಲಿ “ಬ್ಲಾಕ್‌” ಆಯ್ಕೆಯೇ ಬ್ಲಾಕ್‌!

ನವದೆಹಲಿ: ಕಳೆದ ವರ್ಷ 44 ಬಿಲಿಯನ್‌ ಡಾಲರ್‌ಗಳಿಗೆ ಟ್ವಿಟರನ್ನು ಕೊಂಡಿದ್ದ ಎಲಾನ್‌ ಮಸ್ಕ್, ಈ ವರ್ಷ ಟ್ವಿಟರ್‌ ಚಿಹ್ನೆ, ಹೆಸರನ್ನೂ ಬದಲಿಸಿ ಎಕ್ಸ್‌ ಎಂದು ಮಾಡಿಬಿಟ್ಟಿದ್ದಾರೆ. ದಿನೇದಿನೆ ಹಲವು ಬದಲಾವಣೆ ಮಾಡುತ್ತಿರುವ ಅವರು, ಈಗ ಮಾಡಿರುವ ಹೊಸತೊಂದು ಘೋಷಣೆ ಎಲ್ಲರನ್ನೂ ಆತಂಕಕ್ಕೆ ದೂಡಿದೆ.

ಎಕ್ಸ್‌ನಲ್ಲಿ ನಮಗಿಷ್ಟವಿಲ್ಲದ ವ್ಯಕ್ತಿಗಳ ಖಾತೆಯನ್ನು ಬ್ಲಾಕ್‌ ಮಾಡುವ ಅವಕಾಶವಿತ್ತು. ಈ ಆಯ್ಕೆಯನ್ನೇ ಅಳಿಸುವುದಾಗಿ ಮಸ್ಕ್ ಪ್ರಕಟಿಸಿದ್ದಾರೆ. ನಾವು ಯಾವ ಖಾತೆಯನ್ನು ಬ್ಲಾಕ್‌ ಮಾಡುತ್ತೇವೋ ಅವರಿಗೆ ನಮ್ಮ ಪೋಸ್ಟ್‌ಗಳನ್ನು ನೋಡಲು, ನಮಗೆ ಅವರ ಪೋಸ್ಟ್‌ಗಳನ್ನು ನೋಡಲು ಅವಕಾಶ ಸಿಗುವುದಿಲ್ಲ. ಜತಗೆ, ನಮ್ಮ ಪೋಸ್ಟ್‌ಗೆ ನೇರವಾಗಿ ಪ್ರತಿಕ್ರಿಯಿಸುವ ಅವಕಾಶವೂ ಅವರಿಗೆ ಇರುವುದಿಲ್ಲ. ಆದರೆ, ಪ್ರಸ್ತುತ ಈ ಆಯ್ಕೆಯನ್ನೇ ತೆಗೆದುಹಾಕಲು ಮಸ್ಕ್ ನಿರ್ಧರಿಸಿದ್ದಾರೆ.

ಈಗಾಗಲೇ ಅವರು ವಿಷಯಗಳ ನಿರೂಪಕರನ್ನು ಕಿತ್ತುಹಾಕಿದ್ದಾರೆ. ನಿಷೇಧಕ್ಕೊಳಗಾಗಿದ್ದ ಖಾತೆದಾರರಿಗೆ ಮರು ಅವಕಾಶ ನೀಡಿದ್ದಾರೆ. ಮಾತ್ರವಲ್ಲ ಟ್ವಿಟರ್‌ ಹಿಂದೆ ಹಾಕಿದ್ದ ಹಲವು ಸುರಕ್ಷಾ ವ್ಯವಸ್ಥೆಗಳನ್ನು ರದ್ದು ಮಾಡಿದ್ದಾರೆ.