ಬಿಜೆಪಿ ಅಭ್ಯರ್ಥಿ ಹರ್ಷವರ್ಧನ ನಾಮಪತ್ರ

ನಂಜನಗೂಡು: ನಂಜನಗೂಡು ವಿಧಾನಸಭಾ ಕ್ಷೇತ್ರಕ್ಕೆ ಬಿಜೆಪಿ ಅಭ್ಯರ್ಥಿ ಹರ್ಷವರ್ಧನ್‌ ಶನಿವಾರ ಮೆರವಣಿಗೆಯೊಂದಿಗೆ ನಂಜನಗೂಡು ತಾಲೂಕು ಕಚೇರಿಗೆ ಆಗಮಿಸಿ ಚುನಾವಣಾಧಿಕಾರಿ ಶಿವರಾಮೇಗೌಡರಿಗೆ ತಮ್ಮ ಉಮೇದುವಾರಿಕೆ ಸಲ್ಲಿಸಿದರು.  

ಶನಿವಾರ ಮಧ್ಯಾಹ್ನ 12 ಗಂಟೆಗೆ ನಗರಕ್ಕೆ ಆಗಮಿಸಿದ ಅವರು, ಸಹಸ್ರಾರು ಬೆಂಬಲಿಗರ ಜಯಘೋಷದ ಮಧ್ಯೆ ರಾಷ್ಟ್ರೀಯ ಹೆದ್ದಾರಿಯಲ್ಲಿರುವ ನಗರದ ಚಿಂತಾಮಣಿ ಗಣಪತಿ ದೇವಾಲಯದಲ್ಲಿ ಪೂಜೆ ಸಲ್ಲಿಸಿದ ಬಳಿಕ ಮೆರವಣಿಗೆಯಲ್ಲಿ ಆಗಮಸಿ ನಾಮಪತ್ರ ಸಲ್ಲಿಸಿದರು. ಮರವಣಿಗೆಯಲ್ಲಿ ನಂಜನಗೂಡು ವಿಧಾನ ಸಭಾ ಕ್ಷೇತ್ರದ ಕಾರ್ಯಾಲಯಕ್ಕೆ ಆಗಮಿಸಿ ಮಾವ ಶ್ರೀನಿವಾಸ್‌ ಪ್ರಸಾದ್‌ ಆಗಮನಕ್ಕಾಗಿ 20 ನಿಮಿಷ ಕಾದಿದ್ದರು.

ಶ್ರೀನಿವಾಸ ಪ್ರಸಾದ ಆಗಮಿಸಿದ ಬಳಿಕ ತಾಲೂಕು ಬಿಜೆಪಿ ಅಧ್ಯಕ್ಷ ಕೆಂಡಗಣ್ಣಪ್ಪ, ಪಟ್ಟಣ ಅಧ್ಯಕ್ಷ ಬಾಲಚಂದ್ರ,  ಸೋಮಣ್ಣ, ಜಿಪಂ ಮಾಜಿ ಸದಸ್ಯ ಚಿಕ್ಕರಂಗನಾಯಕ ಅವರೊಂದಿಗೆ ಚುನಾವಣಾ ಕಾರ್ಯಾಲಯ ಪ್ರವೇಶಿಸಿ ಚುನಾವಣಾಧಿಕಾರಿ ಶಿವರಾಮೇಗೌಡರಿಗೆ ನಾಮಪತ್ರ ನೀಡಿದರು. ಅವರನ್ನು ಕೂಡಿಕೊಂಡ ಪ್ರಸಾದ್‌ ಆತ್ಮೀಯ ಶಂಕರ್‌ ನಾಮಪತ್ರ ಸಲ್ಲಿಕೆಗೆ ಸಾಕ್ಷಿಯಾದರು.

ಹೆದ್ದಾರಿ ಬಂದ್‌: ನಾಮಪತ್ರ ಸಲ್ಲಿಸಲು ಆಗಮಿಸಿದ ಹರ್ಷವರ್ಧನ್‌ ಜತೆ ಆಗಮಿಸಿದ ಅಪಾರ ಬೆಂಬಲಿಗರು ಕಾಂಗ್ರೆಸ್ಸಿಗಿಂತ ನಾವೇನು ಕಡಿಮೆ ಎನ್ನುತ್ತ ಪಠಾಕಿ ಸಿಡಿಸಿ ಜೈಕಾರ ಕೂಗಿದರು. ಬೆಂಬಲಿಗರ ನಿಯಂತ್ರಣಕ್ಕಾಗಿ ಹರಸಹಾಸ ಪಟ್ಟ ಪೊಲೀಸರು ಚುನಾವಣಾ ಕಾರ್ಯಾಲಯದ ಮುಂಭಾಗದ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಸಂಚಾರ ಕೆಲಕಾಲ ಸ್ಥಗಿತಗೊಳಿಸಿದರು.

ತಾಯಿಯೂ ಭಾಗಿ: ಹರ್ಷವರ್ಧನನ ನಾಮಪತ್ರ ಸಲ್ಲಿಸುವ ವೇಳೆ ಅವರ ತಾಯಿ ಶೀಲಾಬಸವರಾಜು ಮಿನಿ ವಿಧಾನಸೌಧದ ಆವರಣಕ್ಕೆ ಆಗಮಿಸಿ ಮಗನನ್ನು ಹರಿಸಿದರು. ಬಳಿಕ ಮಾತನಾಡಿದ ಅವರು, ತಮ್ಮ ಮಗನಿಗೆ ರಾಷ್ಟ್ರೀಯ ಪಕ್ಷ ಬಿಜೆಪಿ ಟಿಕಿಟ್‌ ನೀಡಿದ್ದು ಖುಷಿಯಾಗಿದ್ದು ತಾವು ಆತನ ಗೆಲುವಿಗಾಗಿ ಕ್ಷೇತ್ರಾದ್ಯಂತ ಪ್ರಚಾರಕ್ಕಿಳಿಯುವುದಾಗಿ ಘೋಷಿಸಿದರು.

ಅಳಿಯನನ್ನು ಆಶೀರ್ವದಿಸಿದ ಮಾವ: ಅಳಿಯ ಹರ್ಷವರ್ಧನ ನಾಮಪತ್ರ ಸಲ್ಲಿಸುವ ವೇಳೆ ಚುನಾವಣಾ ಕಾರ್ಯಾಲಯದ ಹೊರಾವರಣಕ್ಕೆ ಆಗಮಿಸಿದ ಮಾಜಿ ಸಚಿವ ಶ್ರೀನಿವಾಸ್‌ ಪ್ರಸಾದ್‌ ಅಲ್ಲಿಯೇ ಅಳಿಯನನ್ನು ಆಶಿರ್ವದಿಸಿ ಮೈಸೂರಿನ ಕೃಷ್ಣರಾಜನಗರದ ಅಭ್ಯರ್ಥಿ ರಾಮದಾಸರ ನಾಮಪತ್ರ ಸಲ್ಲಿಕೆಗಾಗಿ ತರಾತುರಿಯಲ್ಲಿ  ತೆರಳಿದರು.

ನಾಮಪತ್ರ ಸಲ್ಲಿಸಿ ಹೊರಬಂದ ಹರ್ಷವರ್ಧನ ಮಾತನಾಡಿ, ಜೀವನದಲ್ಲಿ ಇದೇ ಪ್ರಥಮ ಬಾರಿಗೆ ಚುನಾವಣಾ ಆಖಾಡಕ್ಕಿಳಿಯುತ್ತಿದ್ದೇನೆ. ಇದು ನನ್ನ ಸೌಭಾಗ್ಯ. ಮಾವ ಶ್ರೀನಿವಾಸ್‌ ಪ್ರಸಾದ್‌ ಈ ಕ್ಷೇತ್ರದ ಪ್ರತಿನಿಧಿಯಾಗಿ ಕೈ ಗೊಂಡ ಅಭಿವೃದ್ಧಿ, ಪ್ರಧಾನಿ ಮೋದಿಯವರ ಜನಪ್ರಿಯ ರಾಜಕಾರಣ ಮತ್ತು ಪಕ್ಷದ ರಾಜ್ಯಾಧ್ಯಕ್ಷ ಯಡಯೂರಪ್ಪ ಸರ್ಕಾರದ ಸಾಧನೆಗಳು ನನ್ನ ಗೆಲುವಿಗೆ ಸಹಕಾರಿಯಾಗಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.