Bigg Boss: ಊರ ಹಬ್ಬ ‘ಬಿಗ್ ಬಾಸ್ ಸೀಸನ್ 10’ ಆರಂಭಕ್ಕೆ ಡೇಟ್ ಫಿಕ್ಸ್

ಬೆಂಗಳೂರು: ಕನ್ನಡದ ಜನಪ್ರಿಯ ಶೋಗಳಲ್ಲಿ ಒಂದಾಗಿರುವ ಬಿಗ್ ಬಾಸ್ 10ನೇ ಸೀಸನ್ ಆರಂಭಕ್ಕೆ ದಿನಾಂಕ ನಿಗದಿಯಾಗಿದೆ.

ಕಿಚ್ಚ ಸುದೀಪ್ ನಡೆಸಿಕೊಡುವ ಬಿಗ್ ಬಾಸ್ ಕಾರ್ಯಕ್ರಮಕ್ಕೆ ಪ್ರತ್ಯೇಕ ನೋಡುಗರ ವರ್ಗವಿದೆ. ಸೆಲೆಬ್ರಿಟಿಗಳು ಸೇರಿದಂತೆ ವಿವಿಧ ಕ್ಷೇತ್ರದಲ್ಲಿ ಹೆಸರು ಮಾಡಿದ ಕಲಾವಿದರು ಬಿಗ್ ಬಾಸ್ ನಲ್ಲಿ ಸ್ಪರ್ಧಿಗಳಾಗಿ ನೂರು ದಿನ ಮನೆಯಲ್ಲಿ ಇರುತ್ತಾರೆ.

ಪ್ರತಿವರ್ಷ ಬಿಗ್ ಬಾಸ್ ಕಾರ್ಯಕ್ರಮ ವಿಭಿನ್ನವಾಗಿರುತ್ತದೆ. ಈ ಬಾರಿ ಹತ್ತನೇ ಸೀಸನ್ ಆಗಿರುವುದರಿಂದ ಹಲವು ವಿಶೇಷಗಳು ಈ ಬಾರಿ ಇರಲಿದೆ ಎಂದು ಇತ್ತೀಚೆಗೆ ವಾಹಿನಿ ಪ್ರೋಮೋವೊಂದನ್ನು ರಿಲೀಸ್ ಮಾಡಿ ಹೇಳಿತ್ತು.  ಇದೀಗ ಕಾರ್ಯಕ್ರಮ ಯಾವಾಗದಿಂದ ಆರಂಭವಾಗಲಿದೆ ಎನ್ನುವುದನ್ನು ಹೇಳಿದೆ.

“ಊರ ಹಬ್ಬಕ್ಕೆ ಇಲ್ಲಿದೆ ರೀಸನ್, ಶುರುವಾಗ್ತಿದೆ ಹ್ಯಾಪಿ ಬಿಗ್ ಬಾಸ್ ಕನ್ನಡ ಹತ್ತನೇ ಸೀಸನ್ ಅಕ್ಟೋಬರ್ 10 ರಿಂದ” ಎಂದು ಕಿಚ್ಚನ ಸ್ಟೈಲಿಸ್ಟ್ ಲುಕ್ ನೊಂದಿಗೆ ಪ್ರೋಮೋವೊಂದನ್ನು ಹಾಕಿ ಕಾರ್ಯಕ್ರಮ ಆರಂಭದ ದಿನಾಂಕವನ್ನು ರಿವೀಲ್ ಮಾಡಿದೆ.

ಯಾರೆಲ್ಲಾ ಇರಬಹುದು?:

ಪ್ರತಿಬಾರಿ ಬಿಗ್ ಬಾಸ್ ಆರಂಭವಾಗುತ್ತದೆ ಎನ್ನುವಾಗ ಅಲ್ಲೊಂದಿಷ್ಟು ಸ್ಪರ್ಧಿಗಳ ಹೆಸರುಗಳು ಕೇಳಿ ಬರುತ್ತದೆ. ಸೋಶಿಯಲ್ ಮೀಡಿಯಾದಲ್ಲಿ ಈ ಬಾರಿಯೂ ಬಿಗ್ ಬಾಸ್ ಸ್ಪರ್ಧೆಗಳು ಯಾರು ಎನ್ನುವುದರ ಬಗ್ಗೆ ಕುತೂಹಲ ಶುರುವಾಗಿದೆ.

ನಾಗಿಣಿ-2 ಸೀರಿಯಲ್ ಮೂಲಕ ಮಿಂಚಿರುವ  ನಮ್ರತಾ ಗೌಡ, ಹುಚ್ಚ ಚಿತ್ರದ ನಾಯಕಿ ರೇಖಾ, ಸೋಶಿಯಲ್ ಮೀಡಿಯಾದಲ್ಲಿ ತನ್ನ ಕಂಟೆಂಟ್ ನಿಂದ ಗಮನ ಸೆಳೆದಿರುವ ಭೂಮಿಕಾ ಬಸವರಾಜ್,ವರ್ಷ ಕಾವೇರಿ, ಅಗ್ನಿಸಾಕ್ಷಿ ರಾಜೇಶ್, ರೂಪ ರಾಯಪ್ಪ ಮುಂತಾದವರು ಭಾಗಿಯಾಗಲಿದ್ದಾರೆ ಎನ್ನಲಾಗುತ್ತಿದೆ. ಈ ಪಟ್ಟಿಯಲ್ಲಿ ಇನ್ನು ಅನೇಕರ ಹೆಸರಿದೆ.