Drone Prathap: ಸಿನಿಮಾರಂಗಕ್ಕೆ ಡ್ರೋನ್‌ ಪ್ರತಾಪ್ ಎಂಟ್ರಿ; ಮೊದಲ ಚಿತ್ರದಲ್ಲೇ ಹೀರೋ

ಬೆಂಗಳೂರು: ಬಿಗ್‌ ಬಾಸ್‌ ಸೀಸನ್‌ -10 (Bigg Boss Kannada) ಮೂಲಕ ಕರುನಾಡಿನಲ್ಲಿ ಮಿಂಚಿದ ಡ್ರೋನ್‌ ಪ್ರತಾಪ್‌ (Drone Prathap) ಸಿನಿಮಾರಂಗಕ್ಕೆ ಕಾಲಿಡುತ್ತಿದ್ದಾರೆ.

ಬಿಗ್‌ಬಾಸ್‌ ಕಾರ್ಯಕ್ರಮದಲ್ಲಿ ಪ್ರತಾಪ್‌ ತನ್ನ ಬುದ್ಧಿವಂತಿಕೆಯಿಂದ ಜನಮನವನ್ನು ಗೆದ್ದಿದ್ದರು. ಆ ಮೂಲಕ ತನ್ನ ಮೇಲೆ ಈ ಹಿಂದೆ ಕೇಳಿ ಬಂದ ಆರೋಪಗಳಿಗೆ ತನ್ನ ಮಾನವೀಯ ವ್ಯಕ್ತಿತ್ವದಿಂದಲೇ ಉತ್ತರಿಸಿದ್ದರು.

ಬಿಗ್‌ ಬಾಸ್‌ನಲ್ಲಿ ಕಾರ್ಯಕ್ರಮದಲ್ಲಿ ರನ್ನರ್‌ ಅಪ್‌ ಆದ ಬಳಿಕ ಅದರಲ್ಲಿ ಸಿಕ್ಕ ಬಹುಮಾನದ ಹಣವನ್ನು ಮಾನವೀಯ ಕಾರ್ಯಕ್ಕೆ ಪ್ರತಾಪ್‌ ಬಳಸಿದ್ದರು. ತಮಗೆ ಶೋ ಮೂಲಕ ಸಿಕ್ಕ ಎಲೆಕ್ಟ್ರಿಕ್‌ ಸ್ಕೂಟರ್‌ ಅನ್ನು ಫುಡ್‌ ಡೆಲಿವೆರಿ ಮಾಡುವ ಬಡ ಯುವಕನಿಗೆ ನೀಡಿದ್ದರು. ಜನುಮನ ದಿನದಂದು ಅಜ್ಜಿ ಸೇರಿದಂತೆ ಕೆಲ ಮಂದಿಗೆ ಕಣ್ಣಿನ ಆಪರೇಷನ್‌ ಮಾಡಿಸಿದ್ದರು. ಬಡ ಕುಟುಂಬಕ್ಕೆ ರೇಷನ್‌ ನೀಡಿದ್ದರು.

ಹೀಗೆ ಹತ್ತಾರು ಮಾನವೀಯ ಕಾರ್ಯದ ಮೂಲಕ ಪ್ರತಾಪ್‌ ಜನರ ಮನಸ್ಸು ಗೆಲ್ಲುತ್ತಾ ಬರುತ್ತಿದ್ದಾರೆ. ಇದೀಗ ಅವರು ಸಿನಿಮಾ ಕ್ಷೇತ್ರಕ್ಕೆ ಕಾಲಿಡುತ್ತಿದ್ದಾರೆ. ಸಿನಿಮಾವೊಂದರಲ್ಲಿ ನಾಯಕ ನಟನಾಗಿ ಅಭಿನಯಿಸಲಿದ್ದಾರೆ ಎಂದು ವಿಡಿಯೋ ಮೂಲಕ ಹೇಳಿದ್ದಾರೆ.

ಮಂಡ್ಯದ ಕೆ.ಆರ್ ಪೇಟೆಯ ಹನುಮಾನ್‌ ದೇವಸ್ಥಾನದ ಉದ್ಘಾಟನೆಗೆ ಅತಿಥಿಯಾಗಿ ಬಂದ ಅವರು, ಅಲ್ಲಿನ ಕಾರ್ಯಕ್ರಮದಲ್ಲಿ ಮಾತನಾಡುತ್ತಾ, “ಒಂದು ಸಿನಿಮಾಕ್ಕೆ ನಾಯಕ ನಟನಾಗಿ ಅಭಿನಯಿಸುತ್ತಿದ್ದೇನೆ. ಇದೆಲ್ಲ ನಿಮ್ಮೆಲ್ಲರ ಆರ್ಶೀವಾದ. ನನ್ನ ಬ್ಯುಸಿನೆಸ್‌ ಜತೆಗೆ ಸಿನಿಮಾರಂಗಕ್ಕೂ ಕಾಲಿಡುತ್ತಿದ್ದೇನೆ” ಎಂದಿದ್ದಾರೆ.

ದೇವರ ಮುಂದೆ ಸಿನಿಮಾಕ್ಕೆ ಸಹಿ ಹಾಕಿರುವುದನ್ನು ವಿಡಿಯೋದಲ್ಲಿ ತೋರಿಸಲಾಗಿದೆ. ಸದ್ಯ ಪ್ರತಾಪ್‌ ನಾಯಕ ನಟನಾಗಿ ಅಭಿನಯಿಸುತ್ತಿರುವ ಸಿನಿಮಾದ ಬಗ್ಗೆ ಮುಂದಿನ ದಿನಗಳಲ್ಲಿ ಹೆಚ್ಚಿನ ಮಾಹಿತಿ ಹೊರಬೀಳಬೇಕಿದೆ.