ಮಕ್ಕಳ ಚಿತ್ರ ಭೂ ನಾಟಕ ಮಂಡಳಿಗೆ ಮೆಚ್ಚುಗೆ

ಇತ್ತೀಚೆಗಷ್ಟೇ ತೆರೆಕಂಡಿರುವ ಕೌಟುಂಬಿಕ ಕಥಾಹಂದರ ಹೊಂದಿರುವ “ಭೂ ನಾಟಕ ಮಂಡಳಿ’ ಮಕ್ಕಳ ಚಿತ್ರಕ್ಕೆ ಪ್ರೇಕ್ಷಕರು ಮತ್ತು ವಿಮರ್ಶಕರಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.

“ಜಿ. ವಿ ಅಯ್ಯರ್‌ ಪ್ರೊಡಕ್ಷನ್ಸ್‌’ ಬ್ಯಾನರ್‌ನಲ್ಲಿ ಮೂಡಿಬಂದಿರುವ “ಭೂ ನಾಟಕ ಮಂಡಳಿ’ ಚಿತ್ರಕ್ಕೆ ಹಿರಿಯ ನಿರ್ದೇಶಕ ಜಿ. ವಿ. ಅಯ್ಯರ್‌ ಪುತ್ರ ಜಿ. ವಿ ರಾಘವೇಂದ್ರ ಅಯ್ಯರ್‌ ನಿರ್ದೇಶನ ಮಾಡಿದ್ದಾರೆ.

ಚಿತ್ರದ ಬಿಡುಗಡೆ ಬಳಿಕ ಸಿಗುತ್ತಿರುವ ಪ್ರತಿಕ್ರಿಯೆ ಬಗ್ಗೆ ಮಾತನಾಡುವ ನಿರ್ದೇಶಕ ಜಿ. ವಿ ರಾಘವೇಂದ್ರ ಅಯ್ಯರ್‌, “ಇದೊಂದು ಅಚ್ಚ ಕನ್ನಡದ ಅಪ್ಪಟ ಮಕ್ಕಳ ಸಿನಿಮಾ. ಪ್ರತಿ ಪೋಷಕರು ಮಕ್ಕಳು ಒಟ್ಟಾಗಿ ಕುಳಿತು ನೋಡುವಂಥ ವಿಷಯ ಸಿನಿಮಾದಲ್ಲಿದೆ. ಮೊದಲ ಹಂತದಲ್ಲಿ ರಾಜ್ಯ ಪ್ರಮುಖ ಕೇಂದ್ರಗಳಲ್ಲಿ ಮಾತ್ರ “ಭೂ ನಾಟಕ ಮಂಡಳಿ’ ಚಿತ್ರವನ್ನು ಬಿಡುಗಡೆ ಮಾಡಿದ್ದೇವೆ. ಬಿಡುಗಡೆ ಯಾಗಿರುವ ಎಲ್ಲ ಕಡೆಗಳಲ್ಲೂ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ. ಸಮಾಜದ ವಿವಿಧ ಕ್ಷೇತ್ರಗಳ ಗಣ್ಯರು, ಹಿರಿಯರು, ಅನುಭವಿಗಳು ಇಡೀ ಕುಟುಂಬ ಕುಳಿತು ನೋಡಬಹುದಾದ ಸಿನಿಮಾ ಮಾಡಿದ್ದೀರಿ ಎಂದು ಮೆಚ್ಚುಗೆ ಸೂಚಿಸುತ್ತಿದ್ದಾರೆ. ಅನೇಕರು ನಮ್ಮ ಬಾಲ್ಯದ ದಿನಗಳನು ತೆರೆಮೇಲೆ ನೋಡಿದಂತಾಯಿತು ಎಂದು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಸಿನಿಮಾಕ್ಕೆ ಸಿಗುತ್ತಿರುವ ಪ್ರತಿಕ್ರಿಯೆ ಚಿತ್ರತಂಡಕ್ಕೂ ಖುಷಿ ನೀಡಿದೆ’ ಎನ್ನುತ್ತಾರೆ.